محمد التاج - Mohamed Eltag

محمد التاج - Mohamed Eltag Contact information, map and directions, contact form, opening hours, services, ratings, photos, videos and announcements from محمد التاج - Mohamed Eltag, Digital creator, Dubai.
(10)

م.محمد التاج هو رجل أعمال ومدرب سوداني متخصص في إدارة الأعمال والتسويق
وهو مؤسس شركة ماسف تكنولوجي , سبيد تكنولوجي , لانتيرن للتدريب , ماسف إمباكت وشركة رويال إكسباند.
بالإضافة لأنه صانع محتوى في مجال البزنس والتسويق.

في شارك تانك في مستثمر إسمه مارك كيوبان .. الزول دا في مرة إتسأل (أول شي عملته شنو لمن بعت أول بزنس ليك؟)فرد عليه أول بز...
21/12/2025

في شارك تانك في مستثمر إسمه مارك كيوبان .. الزول دا في مرة إتسأل (أول شي عملته شنو لمن بعت أول بزنس ليك؟)
فرد عليه أول بزنس بنيته وبعته كان ب 6 مليون دولار .. مباشرة اتصلت لخطوط الطيران الأمريكية وسألتهم (هل عندكم إشتراك طيران مدى الحياة؟) ..

وبالفعل عمك مارك كيوبان دفع 125 ألف دولار مقابل إشتراك مدى الحياة بيسمح ليه يسافر مجان لأي حتة حول العالم هو ومعاه مرافق تاني ..

المقدم سأله هل حالياً لسا بتستعمل الإشتراك دا؟ .. رد ليه مارك (لا خلاص خليته .. أديته لصاحبي يستفيد منه هو)
فالمقدم عاين ليه نظرة (ليه مالك؟ 😳)
قال ليه (لا ماف شي بس خلاص بقا عندي طيارتي الخاصة فبقيت مامحتاج ليه حالياً ☺️)

فاااا ياخوانا الناس تجتهد في مشاريعها عشان تعمل ليها ملايين ..
او لو خلاص غلبك أبقا صاحب رجال اعمال زي مارك كيوبان دا .. عشان يوم يزهج من حاجة يديك اشتراك طيران مدى الحياة 😂

😌💰
#بزنس

يذكر انه في مرة عالم الفيزياء (نيل دغريس تايسون) كان مدعو لحفلة في يخت واقف على موانئ نيويورك .. فأثناء كان لافي في اليخ...
20/12/2025

يذكر انه في مرة عالم الفيزياء (نيل دغريس تايسون) كان مدعو لحفلة في يخت واقف على موانئ نيويورك .. فأثناء كان لافي في اليخت اتونس مع واحد من الجرسونات فسأل الجرسون (انت ساكن وين؟)
الجرسون قال ليه (ساكن هنا)
تايسون قال ليه (هنا في نيويورك يعني؟)
الجرسون قال ليه (لا هنا على اليخت)
تايسون عاين ليه (كيف ساكن في في اليخت؟ 😳)

طلع يا مؤمن ان اليخت ملك للملياردير "تشالز سميوني" .. وعمك دا دافع مرتبات للناس عشان يسكنو في اليخت .. ع اساس في اي يوم لو عنده حفلة ولا رحلة ولا عزومة يكونو جاهزين ..

الجرسون قال لتايسون انه هو أصلا من إيطاليا .. بس خلا بلده وهم كلهم بياخدو مرتب عشان يسكنو اليخت ويلفو العالم مع عمك الملياردير.

تايسون في نهاية القصة علق وقال (انا ماعايز احكم على الأغنياء .. بس تخيل انك تكون غني لدرجة تدفع لناس عشان يبقا اليخت دا وطنهم وبيتهم ويلفو العالم كلهم عشان يكونو مستعدين لأي حفلة تعملها فيه) ..

غايتو رأيي .. في ناس حتكون دي وظيفة الأحلام ليهم .. تحضو حفلات .. تلف العالم .. تاخد مرتب بالدولار .. وكن على الوطن والبلد فخلينا ساكتين 😶

فاللهم ثروة توصلنا ليفل التنين بتاع "سميوني" دا 🚶

😌💰
#بزنس

أمس كتبت بوست عن إنه ماتاكل من أرباح مشروعك .. فلقيت بعض الناس مستغربين وعندهم إحساس (انهم يدعون لدين جديد فماذا نحن فاع...
20/12/2025

أمس كتبت بوست عن إنه ماتاكل من أرباح مشروعك .. فلقيت بعض الناس مستغربين وعندهم إحساس (انهم يدعون لدين جديد فماذا نحن فاعلون 🤨) ..
وجا السؤال في كم تعليق (ما أصرف من أرباحي؟ الفايدة شنو من مشروعي طيب؟)

في البداية جاوب لي سؤال (إنت فاتح مشروعك ليه؟) .. هل إنت عايز تعمل ثروة .. ولا عايز تطلع منه مصاريفك؟
وإختار واحد لأن الإتنين مابيتلمو 😒

⭕ الحالة الأولى: فاتح مشروع عشان تصرف على نفسك
دا الطبيعي .. أنا في فترة من حياتي كان هدفي من البزنس اني أطلع مصاريفي ومصاريف ناس البيت ..
هنا ممكن أقول ليك خد راحتك .. أصرف من أرباحك (بدون تدخل في راس المال) .. والله يبارك ليك.

⭕ الحالة التانية: فاتح مشروع عشان تعمل ثروة
هنا الكلام إختلف .. كل ربح تحققه في المشروع حترحعه تاني في البزنس جوا وتكبر بيه الشغل .. (مره تجيب مواد خام أكتر .. مرة تحيب مكنة جديدة .. مرة تعين موظفين معاك .. تفتح فرع جديد) .. وهكذا تفضل تتوسع.
وفي الحالة دي لازم تشوف مصدر تاني لمصاريفك .. تشتغل وظيفة .. تشتغل عمل حر .. تعرسي مغترب خليجي يصرف عليك 🤭 (استغفر الله 🚶.. بهظر خلاص).

#الخلاصة ..
دا مفترق طرق .. حدد انت حالياً في اللحظة دي عايز شنو من مشروعك؟ .. عايز تبني ثروة يبقا ماتصرف من أرباحك .. عايز تمشي مصاريفك يبقا خد براحتك.

وتاني أقول .. الاتنين ما بيتلمو سوا .. لأنك ماممكن تشفط من أرباح مشروعك ونفس الوقت عايز تبني ثروة منه ويتوسع ..
ونتذكر جملة روبرت (أول شي بتصرف عليه هو البزنس .. وأخر شي بياخد قروش هو المالك).

وبس كدا 🚶..

طبعاً كل دا وأنا ماجبت سيرة الناس البياكلو راس مالهم .. دا في واحدة قالت انها عملت حلويات ودتها عشان تتباع .. اخر اليوم رجعت أكلتها هي وصاحبتها .. دي مش بتاكل رأس المال .. دي بتاكل البزنس حرفياً 🙂

(201)
😌💰
#بزنس

19/12/2025

في واحد من البوستات البكتبها عن الأحكام الشرعية في البزنس لقيت تعليق فيما معناه (مادام بالتراضي يبقا مافي حرمة في الموضوع)

أولا لازم تعرف أن التراضي لا يسقط الحرمة . بمعنى ..
لو إتنين متفقين على عمل حاجة الشريعة بتحرمها فإتفاقهم دا ما بيخلي الموضوع حلال

والا كل واحد كان يشتغل بمبدأ (انا راضي وهو راضي ايش دخلك انت يا حضرة الفاضي) .. ولا ماضي اظن 🤨 .. قاضي ايوا 😐☝️ .. المهم عرفت المثل

تخيل مثلا اتنين متفقين على انهم يعملو علاقة "خارج إطار الزواج" .. هل دا يجعل العلاقة دي حلال؟ .. لا طبعاً

نفس الشي في المعاملات المالية الممنوعة .. ماينفع تقول لي والله انا راضي بالزيادة .. يبقا مافي ربا .. لا في ربا وانت وصاحبك دا حتاخدو على راسكم يوم القيامة لو ما تبتو من المعاملة دي

فاااا شنو .. الناس تبطل إختراعات من دماغها.

واحد حيقول لي انت قلت أولا .. تانيا شنو؟
اااا .. لا ماف تانيا .. هو أولا بس وخلاص قفلنا ع كدا 🚶

😌💰
#بزنس

في واحد من حلقات شارك تانك (أمريكا) واحد قدم منتج رهيب جدا .. سألوه حققت مبيعات بكم؟ .. قال (بعنا ب 1.7 مليون دولار).الم...
19/12/2025

في واحد من حلقات شارك تانك (أمريكا) واحد قدم منتج رهيب جدا ..
سألوه حققت مبيعات بكم؟ .. قال (بعنا ب 1.7 مليون دولار).
المستثمرين عيونهم لمعت .. جميل جدا .. صافي الربح حقك كم من المبيعات دي؟

قال ليهم (الصافي 100 الف دولار) .. هنا كل المستثمرين سكتو شويه ..
الكلام دا مامنطقي 😐 .. زي لمن اقول ليك انا بعت بضاعة ب مليار و700 الف جنيه سوداني .. بس ربحت 100 الف والباقي مليار و600 كلها رايحة في تكاليف البضاعة.

المستثمرين سألو صاحب المشروع (قروش المبيعات طارت وين ياولدنا؟)
قال ليهم (والله نحنا عندنا تكاليف كتيرة للانتاج ودي بتأثر على الربح وكدا)

واحد من المستثمرين اسمه (روبرت) عاين ليه نظرة كداااا 😒 .. قال ليه (انت بتاخد لنفسك من قروش المشروع دا صح؟)
صاحب المشروع قال ليه (ايوا 🙈 بناخد من المشروع مرتبات) .. تقريبا كان بياخد من الأرباح حق تلفون جديد ويدي المدام كم ألف تجيب عبايات إستقبال.

كل المستثمرين انسحبو من الصفقة .. ولا واحد قرر يستثمر معاه ..
روبرت حب يديه درس فقال ليه (لمن تكون عندك بزنس .. أول حاجة بتصرف عليها هو البزنس نفسه .. واخر زول في الدنيا مفترض ياخد قروش هو صاحب المشروع .. انت بستنزف مشروعك لأنك بتاكل من أرباحك .. وعشان السبب دا أنا منسحب من الصفقة).

الله يمسيه بالخير كان معترض على ان الزول ياكل من الأرباح .. ماشاف ناس عندنا هنا بياكلو الأرباح وراس المال نفسه ويتلفتو .. ويفضل المشروع مشلول لحد ربك يحلها.

😌💰
#بزنس

18/12/2025

حصل شفت صندوق المفاجآت (مستري بوكس)؟ .. دا صندوق انت بتشتريه وانت ماعارف الجواه شنو .. ممكن يكون سماعة .. ممكن لعبة .. ممكن ملابس .. الخ
بالدارجي كدا صندوق (جرب حظك)

من أسبوع طلع فيديو في مكة لشاب مجتهد بيبيع صناديق مفاجآت انت وحظك .. (يطلع ليك تلفون .. مكنة حلاقة .. تاب .. الخ)

لكن النوع دا من البيع لا يجوز شرعاً .. لان دا إسمه بيع الغرر أو بيع الشيء المجهول
.. بمعنى ..
انا ببيع ليك شي انت ماعارف نوعه شنو .. ولا كميته كم .. ولا قيمته كم .. انت بتشتري وانت مغمض.

داخل في الحكم دا .. صناديق ألعاب الأطفال بتاعت جرب حظك .. ادفع اختار رقم واخد بلونة .. ماكينات اللعب اللي بتدفع فيها عملة وتحاول تاخد لعبة يمكن تطلع ويمكن لا ..

باختصار كل شيء بتشتريه وانت ماعارف تفاصيله دا ممنوع وبيسمى بيع غرر ..

ياخ دا انا في طفولتي كنت مخلص ثروتي كلها عشان اشتري البلونة الكبيرة 😢 .. وكل مرة تطلع لي الصغيرة .. كل مرة الصغيرة .. لحد ما الواحد اتعقد نفسياً 🙂💔

يلا .. ربنا يغفر لينا طفولتنا المشردة دي 🚶

😌💰
#بزنس

لمن أنزل ساندوتش أخبار العالم أو أكتب بوست عن تاريخ إقتصادي بيجي في بال البعض (علاقة الكلام دا شنو بالبزنس؟) .. بالنسبة ...
18/12/2025

لمن أنزل ساندوتش أخبار العالم أو أكتب بوست عن تاريخ إقتصادي بيجي في بال البعض (علاقة الكلام دا شنو بالبزنس؟) ..
بالنسبة لبوستات ساندوتش الأخبار غرضها إنك تكون عارف أهم الأحداث البتغير في الإقتصاد (انا بختار الأخبار المؤثرة في السوق) .. بناء على الأخبار دي إنت ممكن تاخد تصرف معين (مثلا أنا بشتري أو أبيع سبائك الدهب العندي بناء على الأخبار) ..
في واحد تاني بيصدر بضاعة معينة .. فبيستفيد من الأخبار في توقع تعقيدات الشحن وتكاليف التأمين ..
في واحد تاني مستثمر في أسهم .. فبيعرف الأخبار مني وبناء عليه بيتصرف حسب توقعه.

دا بالنسبة للأخبار الحالية .. بالنسبة لمنشورات الأحداث التاريخية هدفها انك تفهم (ليه نحنا هنا؟) .. ليه الصين متشاكلة مع تايوان .. ليه روسيا بتخش أوكرانيا .. وبناء على التاريخ دا بتقدر تتوقع الأحداث الجاية .. وتعرف ان أي خبر في صالح روسيا معناه عكس مصلحة أمريكا .. وبالتالي الدولار حيهبط .. وبالتالي الدهب حيزيد.

فالمنشورات البنزلها بتصب كلها في الإقتصاد .. اللي هو أساس البزنس والمشاريع حقتنا (مهما كانت صغيرة).

هدفي الفترة دي انه اطلعك من المحتوى المكرر والمعاد .. بتاع (كيف تعمل ميرة تنافسية .. كيف تكتب محتوى .. أهمية التسويق في مشروعك .. الخ)
عايز أديك محتوى يخليك تفكر .. وتتثقف وتقدر تتوقع الأحداث المستقبلية .. وفي نفس الوقت محتوى مايكون ممل (لأني زاتي بزهج لو ماكسرت الروتين).

فدي الخلطة الخلتني أعمل ساندوتش أخبار العالم .. وأعمل بوستات التاريخ السياسي الإقتصادي.

😌💰
#بزنس

سنة 1991 أوركرانيا صحت من النوم على خبرين .. الأول ان الاتحاد السوفيتي اتفكك فبالتالي هي بقت دولة مستقلة.الخبر التاني هو...
17/12/2025

سنة 1991 أوركرانيا صحت من النوم على خبرين .. الأول ان الاتحاد السوفيتي اتفكك فبالتالي هي بقت دولة مستقلة.
الخبر التاني هو ان طلع عندهم 1900 راس نووي من بواقي المرحوم (الحج اتحاد سوفيتي).

للحظة في التاريخ أوكرانيا كان عندها تالت أكبر عدد رؤوس نووية في العالم .. الصين (الاسي فاردة عضلاتها قدام آسيا) كان عندها الوقت داك 200 ل 300 راس بالكتير .. واوكرانيا عندها 1900 راس.

لو انت محل أوكرانيا حتخت رجل ع رجل وخلاص تتقاعد .. عندي نووي والراجل يفتح خشمه معاي 😏

لولا .. خساسة الدول .. وخليني أذكرك ان خساسة الدول أعظم من خساسة نسوان الحلة ب87 مرة .. (ايوا هم 87 انا قستهم بمسطرة الخساسة ماتغالطني 😐)

روسيا (اللي هي بواقي الاتحاد السوفيتي) قالت انها عايزة الرؤوس العند أوكرانيا .. ليه؟ .. قالت ليهم (الرؤوس دي حقت الحج اتحاد وكان مخليها أمانة عندكم .. وانا أرملة المرحوم .. فأنا أولى بيها).
ومشت تضغط على بريطانيا وأمريكا (اللي هم مفترض أصحاب أوكرانيا) .. قالت ليهم (أمشو عقلو صاحبتكم دي وخليها ترجع لي النووي حق المرحوم .. والا تلاتة بالله عظيم أنكد عليكم كلكم في سلسفيل أم الكوكب دا 👌😠).

زي ما حتتوقع بريطانيا وأمريكا إتبعو سياسة (Appeasement Policy) .. بالبلدي كدا (ادو المرة دي العايزاه خليها تسكت مننا 😐).

مشو الاتنين لأوكرانيا وفضلو يزنو ويضغطو على الرئيس وقتها عشان يمضي على اتفاقية يسلم بيها الأسلحة النووية لروسيا ..
وأكيد انت عارف .. لما الأم والخالة يقعدو للبت عشان يقنعوها بعريس عشان مغترب .. زن ورا زن وضغط ورا ضغط الرئيس الأوكراني وافق ..
وافق على أغبى قرار إتخذه بني آدم أوكراني .. انت في يدك سلاح يخليك أرجل واحد في الكوكب دا .. لولا الاتفاقية دي كان "زالنسكي" رئيس أوكرانيا الحالي ممكن يركب من بيتهم يجي يدي ترامب كف 👋 ويرجع .. وترامب مايقدر يتكلم معاه لان عنده نووي.

المهم .. سنة 1994 حصل حدثين مهمين .. الأول محمد التاج إتولد 🤭 .. والحدث التاني أوكرانيا بتسلم أسلحتها (ورثة المرحوم) لروسيا .. مقابل ضمانات بالحماية .. رئيس أوكرانيا قال ليهم (طيب كدا بعد يشيلو الأسلحة ممكن يضربونا 🥺) .. بريطانيا وأمريكا ردو ليه (وعد مننا انهم ما حيضربوكم .. ولو فكرو بس يلمسو شعرة منكم حنجي نحنا نضربهم ليكم).

مامحتاج أقول ليك طبعاً على الحماية .. 2014 روسيا بتدي أوكرانيا على جضومها .. وبتاخد منها جزء من الاراضي ..
وسنة 2022 بتعمل الكبيرة وبتجر أوكرانيا من شعرها وعايزة تحتل الدولة كلها وتضمها ليها ..

وأوكرانيا تكلم أوروبا (ياخوانا مش قلتو حتحمونا؟) .. يردو ليهم (معليش والله الايام دي الميزانية مابتسمح باننا نتدخل في الدفاع وعندنا هبوط حاد والسكر واطي) .. السكر مابراه الواطي 😏

يمشو لترامب (يا أمريكا قلتو انتو عندكم الضمانات بالحماية؟؟) .. ترامب يذل رئيس أوكرانيا ويقول ليه (انت الطرف الأضعف يبقا تقبل الشروط البيقولها بوتين).

وزي ما شايف كل واحد بيزوغ باتجاه ويخلي المساكين ديل يتلفتو .. وأكتر شي حصل انه أوروبا بتدي سلاح (تحت تحت كدا) لأوكرانيا وتقول ليها حاربي انت .. نحنا ماعايزين نخش بجنودنا عشان مايقومو يضربونا نحنا زاتنا.

يهمنا من القصة دي كلها انه أي صراع سياسي حيأثر في الإقتصاد وحيفرق معانا جدا .. لان بياثر على الغذاء وعلى اسعار العملات والبترول.
وياهو قاعدين جنب الحيطة .. ونسمع الزيطة 🚶

😌💰
#بزنس

لو لاحظت حتلقا ان بعض دول الخليج ماعندهم ضرائب أو ضرائب منخفضة .. بالمقارنة بدول تانية زي أوروبا وأمريكا الواحد بيدفع دم...
17/12/2025

لو لاحظت حتلقا ان بعض دول الخليج ماعندهم ضرائب أو ضرائب منخفضة .. بالمقارنة بدول تانية زي أوروبا وأمريكا الواحد بيدفع دم قلبه في الضرايب ..
يعني مثلا لو مرتبك 100 الف في فرنسا فممكن تدفع 55 الف للدولة .. وتاخد انت 45 الف 😢
اللي هو حرفيا (شغالين عن أهاليكم نحنا؟)

طيب ليه الدول بتاخد ضرايب كبيرة؟ ..
لانها "مفروض" بتقدم رعاية للشعب .. يعني بتلقا علاج مجان للمواطنين .. الأمن الشرطة وضعها ممتاز .. التعليم الحكومي مستواه زي الفل .. الطرق والجسور والصرف الصحي وغيرها من الخدمات شغالة بصورة ممتازة .. مرات بيكون في مرتب من الحكومة بيدفع للناس المالاقين شغل (اسمها اعانة بطالة) .. الخ
أنا عارف كل الكلام القلته دا غريب بالنسبة لينا 😐 .. بس دا الطبيعي .. الدولة المفروض تهتم لراحة الشعب

⭕ طيب مادام الخليج مابيشيلو ضرايب كتيرة بيصرفو على الدولة من وين؟
المورد الأول طبعاً البترول وصادرات الدولة ..
بس واحد من أهم الموارد هو "الغرامات" .. بتلقا انه في غرامة لكل شي غلط ممكن تتخيله .. بداية من انك تعمل جريمة .. لحد شي تافه زي انك تضغط زر توقيف السلم المتحرك مثلا.

النظام دا عنده فائدتين .. أولا بيوفر دخل محترم للدولة .. وتانيا بيأدب السكان
بتلقا البشر هنا في الدول دي ماشين زي السيف .. لأن أي مخالفة للقانون معناها حتدفع دم قلبك ..
كمثال .. لو عملت سباق بعربيتك والبوليس قبضك حتدفع غرامة 100 الف درهم (اللي هي 100 مليار تقريبا)

فخلاصة القصة دي لو في واحد حيبني بزنس بره السودان وبيفتش لدولة يختار يستقر فيها .. لازم يخت في باله الدولة دي بتاخد ضرائب ولا بتاخد غرامات .. عشان بعدين ماتلقا انك بتدفع دم قلبك بطريقة غير مباشرة.

😌💰
#بزنس

مرة واحد علق في فيديو سبائك الدهب (هو انت فطرت عشان تشتري سبايك؟؟؟) ..قلت للادمن يرد ليه (لا صراحة أنا فقران ماعندي شي)ف...
16/12/2025

مرة واحد علق في فيديو سبائك الدهب (هو انت فطرت عشان تشتري سبايك؟؟؟) ..
قلت للادمن يرد ليه (لا صراحة أنا فقران ماعندي شي)
فلقيته رجع رد (لااالا انت شكلك جلابي وداسي قروشك)

للحظة بقيت واقف بعاين كدا 😐 .. ما ترسو لي على صفة ياخوانا 😂 ..
ولا هو أي معاكسة وخلاص

نستفيد من القصة دي ان دايما في شخص عايز يعاكسك لأجل المعاكسة .. فبيتغذى على الإعتراض .. ويستنشق المغالطة .. المهم فهمت قصدي

+ جيت أقول ليكم ان سعر الدهب نزل الليلة .. فالعايز يلحق يشتري قبل ترامب يعمل مصيبة ويزيد تاني 🚶

😌💰
#بزنس

في واحدة من محاضرات الشيخ الباشمهندس أيمن عبد الرحيم حكى قصة انه مرة عمر بن الخطاب سمع بأن في واحد اسمه "الصبيغ" بيسأل ا...
16/12/2025

في واحدة من محاضرات الشيخ الباشمهندس أيمن عبد الرحيم حكى قصة انه مرة عمر بن الخطاب سمع بأن في واحد اسمه "الصبيغ" بيسأل الناس عن الايات المتشابهة في القرآن .. يوقف الواحد في الشارع (المرسلات دي شنو .. الناشطات دي ناشطة وين ..) ولافي كدا
فسيدنا عمر قال (اللهم أمكني منه) .. يعني الله يلمني فيه بس 👌 .. وقد كان

في يوم وهو ماشي في السوق لاقا الصبيغ في السوق .. فقال ليه (يا أمير المؤمنين ما المرسلات؟) .. عمر ابتسم كدا باحساس (يا سلااام هو انت؟ اهلا وسهلا)
بدأ يجاوب ليه .. (المرسلات هي الملائكة .. النازعات هي الملائكة .. ) وهكذا لحد خلص كل اسئلته

بعد خلص سيدنا عمر قال ليه خلصت؟ .. قال ايوا .. فقال ليه تعال يلا .. (وطبعا لما عمر يقول ليك تعال أكيد ماعايز يعزمك في كافيه) .. مسك الراجل اداه دقة نضييييفة .. دقة تتمناها لأكتر زول بيغيظك 😶 .. لمن تتفش من جوا قلبك كدا ..

الراجل أغمى عليه .. وبعد صحى قال لسيدنا عمر (يا أمير المؤمنين قد ذهب ما كنت أجد) .. يعني خلاص معليش "الجن الكلكي" الكان في راسي راح خلاص
وقتها بس سيدنا عمر قال ليه خلاص امرق .. وكدي تاني القاك تسأل كدا ..

⭕ طيب .. أنا عايز أسألك سؤال .. ليه عمر رضي الله عنه دق الزول دا كدا؟ ..
الكلام دا لو كان حصل حالياً كان حصلت حملات تضامن مع الراجل .. ونشوف منشورات من نوع (كيييف واحد بيسأل عن دينه يتم "قمعه") .. وتلقا هاشتاقات ( # الحرية للصبيغ) .. وغيرها من الضجة.

انت لازم تفهم ان في فرق بين سؤال العلم وسؤال الجدال .. يعني لما واحد يسألني (حكم معاملة كاش ببنكك وتاخد نسبة شنو؟) ..
فأقول ليه محرم لأنه ربا .. يقول لي دليلك شنو .. اديه الدليل حديث (الذهب بالذهب ..الخ) والنقود يجري عليها حكم الذهب ..
فيقول لي لا انا عايز دليل فيه كلام واضح 😏 .. أجيب ليك حديث الرسول ﷺ قال فيه بنكك ربا ولا شنو يعني ؟؟ 🙄

ف دا مثال لأسئلة الجدل الفارغ .. سؤال في ظاهره ان الواحد بيسأل عن الدين وبيتفقه .. بس في باطنه واحد عايز يجادل وفي مرات كتيرة بيكون عايز يهدم الثوابت .. زي واحد يقول ليك (ليه الربا حرام .. مفروض انه يكون في فوائد مادام حتاخد قرض مني).

هل دا معناه اننا ما نسأل في الدين تماما؟ .. لو قلت لي كدا حارد ليك (يا فرحة أمك بيك ي أذكى أخوانك) .. القصد انك تسأل عشان تتعلم .. وبعد تاخد المعلومة تطبقها .. ما تسأل عشان تثير الجدل.

عشان كدا لما الصبيغ اتأدب كويس قال لسيدنا عمر (قد ذهب ماكنت أجد) .. فمعناه الزول دا في الأول راسه حاجة تانية وراء الأسئلة البيسألها دي ولاحقا ظبط ع المنهج الصح.

فشنو .. لو لقيت واحد ناشر بوست يسأل .. وحسيت من سؤاله إنه حاجة للجدل الفارغ ماتضيع زمن معاه ..

وعلى رأي محمد سيد حاج الله يرحمه لما قال (عمر بن الخطاب لو جا في زمننا دا كان يدق لمن يفتر 😂).

وبس كدا 🚶..

(200)
😌💰
#بزنس

عايزك تفكر في السؤال دا .. في العادة الناس في الغالب بيكتبو في نعي الوفاة كل الإنجازات والأثر الطيب القدمه المرحوم للناس...
16/12/2025

عايزك تفكر في السؤال دا .. في العادة الناس في الغالب بيكتبو في نعي الوفاة كل الإنجازات والأثر الطيب القدمه المرحوم للناس ..
يعني ما بيكتبو الله يرحمه كان عنده عربية حلوة أو تلفون غالي .. بيكتبو الحاجات العظيمة القدمها.

يجي السؤال هنا .. تخيل انك بتكتب نعي وفاتك (بعد الشر عليك طبعاً) .. حتكتب شنو؟

هل في اللحظة دي راضي عن الحققته السنوات الفاتت؟
واذا ماحاسي بالرضى تماما .. في شنو ممكن تعمله عشان تحقق اثر تكون راضي عنه؟

خلي بالك الاثر او الانجاز دا ممكن يكون رعاية أهلك .. او مساعدة ناس في الشارع .. ماضروري تغير الكوكب يعني
فكر كويس بينك وبين نفسك في الموضوع دا.

وزي ماقال اللمبي (ألف لا بأس الشر عليك 🚶)

😌💰
#بزنس

Address

Dubai

Telephone

+249117022225

Website

Alerts

Be the first to know and let us send you an email when محمد التاج - Mohamed Eltag posts news and promotions. Your email address will not be used for any other purpose, and you can unsubscribe at any time.

Contact The Business

Send a message to محمد التاج - Mohamed Eltag:

Shortcuts

Share

Category