17/09/2026
حلقہ GBA-16: امام مالک اور عطاء اللہ کے درمیان انتخابی کشمکش، دو فارم 49 سوشل میڈیا پر وائرل
امام مالک اور عطاء اللہ کے درمیان انتخابی کشمکش کے حوالے سے دو مبینہ فارم 49 سوشل میڈیا پر تیزی سے وائرل ہو رہے ہیں۔
دونوں فارم میری نظروں سے بھی گزرے اور بغور جائزہ لینے پر ان میں بعض اعداد و شمار میں نمایاں فرق دکھائی دیتا ہے۔ ایک فارم پر حضرت بلال نامی امیدوار کے 104 ووٹ درج ہیں، جبکہ دوسرے فارم 49 پر انہی کے 184 ووٹ درج دکھائی دیتے ہیں۔
اسی طرح ایک فارم پر مجموعی ووٹوں کی تعداد 24,310 جبکہ دوسرے فارم پر 25,410 درج ہے، یعنی تقریباً 1,100 ووٹوں کا فرق نظر آتا ہے۔
ووٹنگ کا عمل 13 تاریخ کو مکمل ہوا تھا۔ ایسے میں اہم سوال یہ ہے کہ سوشل میڈیا پر گردش کرنے والے یہ دونوں فارم 49 کس مرحلے اور کس ذریعے سے سامنے آئے؟ کیا یہ دونوں اصل اور مستند فارم ہیں یا ان میں سے کوئی ایک غیرمصدقہ دستاویز ہے؟
اگر واقعی دونوں فارم سرکاری ریکارڈ کا حصہ ہیں تو اتنے بڑے فرق کی وجہ کیا ہے، اور یہ دستاویزات سوشل میڈیا تک کیسے پہنچیں؟
ان سوالات کا حتمی جواب الیکشن کمیشن کے ریکارڈ اور باضابطہ وضاحت ہی سے سامنے آ سکتا ہے۔
