GhaliloOo's Blog / غاليلوو, Dubai (2025)

16/08/2024

وضعي حاليًا بإدارة المشاريع عامل متل الأم يلي عندا شي 10 ولاد..
وكلن بينادولا "ماااماااا اعمليلي/ساويلي/جيبيلي" كل الوقت وكل واحد مفكّر أنو ما عندا غيره..

للأمانة، الإدارة ممتعة جدًا بس كمان بحاجة نفس طويل جدًا جدًا جدًا
لأن بدو يكون الواحد مرن وقادر يتواصل ويتعامل مع الفريق ومع العملاء ومع الإدارة ومع مهامه كمدير مشروع أو قائد فريق

يعني فينا نقول كيكة مقسمة 4 قطع.. وبيتغير حجم كل قطعة بحسب المشروع والضغط والظروف والتفاصيل كاملة

من أهم الشغلات يلي دايمًا بأكد عليها بقيادة الفريق وإدارة المشاريع
هي:

أهمّية معرفة مفتاح التواصل مع كل شخص
+
أهمّية توظيف كل شخص بالمكان المناسب

النقطتين هدول بيساعدوا أنو:
نقلل هدر (وقت - جهد - موارد)
+
نستثمر بالموارد (أشخاص - أدوات - وقت - مصاري)
+
نحافظ على بيئة عمل فعّالة ومريحة بنفس الوقت للكل
=
نتيجة لهالقصص، منقدر نسلّم المشاريع بأقل قدر ممكن من الأخطاء والهدر ووجع الراس.. وبالتالي، بيكون عنا احتمالية أعلى لرضا العميل.. وبالتالي، منخلق صورة ذهنية حلوة للعالم الخارجي (الجمهور المستهدف والسوق)

بطاقات رابحة دايمًا.. للي بيفهم يلعبها صح.. ;)
ولا شو رأيكن أنتو؟

05/08/2024

اشتغل كتير تغلط كتير تترفد..

طبعًا كلنا ضحكنا على هالمشهد من إحدى المسرحيات المصرية، ولكن الموضوع فعلًا غير مضحك وإنما بيشكّل نقطة ألم وتحدّي حقيقيين للموظفين وللمشروع بحد ذاته ولبيئة العمل..

ثقافة تقبّل الخطأ والاحتفاء فيه كدرس مهم نتعلّم منه
هي جزء لا يتجزأ من ثقافة بيئات العمل الصحيّة
وأكيد هالشي ينطبق على حياتنا كاملة...

بس بتعرفوا "أين تكمن المشكلة؟!" يا أصدقائي
في عنصرين هنن Couples حرفيًا ولازم دايمًا يكونوا مع بعض
بمجرد انفصالن بتحدث المشكلة..

(المسؤولية والمسائلة)

غالبًا بتصير الثغرة ببيئات العمل بسبب وجود عنصر دون الآخر..
يعني يا عزيزي المدير الظريف.. ما بيمشي الحال تحمّلني مسؤولية وتترك الأمور سايبة على الله عندي.. وكمان ما بيمشي حال تجي تسائلني على مهمّة معينة ما عطيتني مسؤوليتا وتحمّلني نتيجة فشلها أو تأخرها أو أي نتيجة سلبيّة متعلّقة فيها..

وهون بيجي دور القائد الناجح..
يلي بيعرف كيف يوزع المهام، يحدد المسؤوليات ويحدد سياسات المسائلة والمتابعة والمراقبة الخاصّة فيها.. والأهم، بيكون حريص على توضيح كل هي النقاط لكل أفراد الفريق والتأكّد أنو كل واحد عرفان شو دوره وعلى شو رح ينسأل وليش وكيف..

وهون أنا متأكدة، كل حدا فيكن تذكّر موقف ظريف من شغله
كان يفتقر إلى أحد هالعنصرين وكيف صارت الأمور بعدو سلطة وضاع الشغل والغالب أنو في ناس تعاقبت أو تحمّلت عواقب مسؤوليات غيرها بسبب هي الفوضى

المهم، إذا كنتوا قادة فرق. انتبهوا لهالنقطة كتير منيح وإلا حيكونوا الثقب المخفي يلي يغرّق قاربكن..

اي وهيك.. بداية أسبوع سعيدة ونهاركن لطيف 💛

19/07/2024

عم أشتغل ع مقالة لتدريب عن ما يسمى "Relationship Marketing" 🤝
هلأ ما بعرف إذا في مصطلح عربي.. بس هاد التسويق المعني ببناء ولاء العملاء

وهو على عكس استهداف زبائن جدد (يلي بيركّز على أهداف فردية وقصيرة المدى).. بيركّز على الأهداف بعيدة المدى وعلى الحفاظ على العملاء الحاليين لأطول فترة ممكنة من خلال الاستماع لاحتياجاتن وتخصيص الخدمات والمنتجات بحسبها والتأكّد من رضاهن..

وطبعًا، من جمالية نتائج هاد النوع من التسويق
"هو تجنيد العملاء كأنصار لعلامتك التجاريّة"

فـ بيصيروا بيدافعوا عنك باستماتة وكأنّو الن أسهم معك بالشركة.. ولما يصير أخطاء من طرفك بيلاقولك 100 مبرر وبيتفهّموك وبيصيروا عليك.. وبينصحوا العالم يجربوا منتجاتك وخدماتك.. وبيحكوا عنّك دايمًا مع معارفن بفخر.. وبيكونوا على استعداد أنن يزيدوا معدّل إنفاقن معك لأن حاسين بالانتماء والأمان وسعيدين.. وحتّى أنن ما بيترددوا يكتبولك مراجعات إيجابية ويعملولك تاغ ع السوشال ميديا عندن..

وهيك يا أصدقائي وصديقاتي،
بتكون حصلت على مسوّقين بدون راتب لعلامتكن، وبتلاحظ أنو على المدى الطويل،
كل شي عم تستثمر فيه لهالتسويق عم يرجعلك أضعاف سواءً ماليًا كإيرادات وأرباح أو كسمعة واسم بالسوق وصورة حلوة عم تنرسم وتترسّخ بأذهان الناس على اعتبار أنو نحن بنوثق بالتوصيات الشخصيّة أكتر بكتير من الإعلانات وجماعة التسويق والمبيعات وغيرن من قنوات التسويق..
(طبعًا، هي العمليّة بتاخد وقت وجهد وتفاصيل كتيرة جدًا لتتحقق، مو كم يوم ولا كم شهر.. وكل ما كنا أذكياء أكتر ومستمعين جيدين أكتر ومحللين أكتر لاحتياجات العملاء، كل ما صارت العمليّة أسرع وفعّالة أكتر)

طبعًا، المقالة حيكون فيها تفاصيل تانية غير هاد التعريف العام
لهيك إذا مهتمّين تعرفوا أكتر.. اتركوا تعليق حتّى بس خلّصا شارككن ياها

نهاركن لطيف 😇

08/07/2024

النداء الأخير 📣
يلي حابب يحضر ورشة "مقدمة في إدارة المشاريع"
بقيان يومين للتسجيل فقط..

🔴 والتوقيت تعدّل كرمال يلي صعب عليه يحضر خلال الأسبوع
(السبت والأحد القادمين مساءً الساعة 6 بتوقيت دبي / 5 بتوقيت سوريا)

💡 أجندة الورشة:
✅ مقدمة في إدارة المشاريع
✅ التخطيط الفعال للمشاريع
✅ تنفيذ المشاريع
✅ مراقبة ومتابعة المشاريع
✅ إغلاق المشاريع

وحنحكي كمان بهالمواضيع بشكل فرعي خلال حديثنا عن المحاور السابقة:
1. الفرق بين أنماط وضع الأهداف SMART, SMARTER, PACT, OKRs
2. كيف منخلّي مشاريعنا مستدامة قدر الإمكان
3. أهمّية إضافة هوامش لمواعيد التسليم
4. كيف منكون قادة فعّالين للفريق والمشروع
5. نصائح عن تفويض المهام
6. التعامل مع المخاطر غير المتوقعة بأقل الخسائر
7. كيف منحفّز فريق العمل بأوقات الضغط أو خربطة المشروع
8. إدارة المعرفة لضمان استمرارية الشركة مستقبلًا

🌟 تفاصيل الورشة:
🌏 اللغة: العربية
⏳ المدة: 6 ساعات / 2 جلسات
📍 المكان: عبر الإنترنت (مباشر)

يلي مهتم بالتسجيل، يبعتلي خاص أو يتركلي تعليق تحت 😃👇

07/06/2024

مين قال أنو ما لازم ننبسط بإنجازاتنا الصغيرة؟ 😌😇

هالشهادة رجّعتلي شوية حماس كنت حسّ فيه بكل مرة كنت خلص فيها كورس وأتعلم شغلات جديدة (على اعتبار علاقتي مع الكورسات الأونلاين صرلا أكتر من 10 سنين)

بهاد الكورس، حكينا عن:
1. السرد القصصي بعالم الأعمال (البزنس)
2. الإدارة الاستراتيجية، شو هي وكيف مننفذها ومنقيّمها
3. تحليل بيئة الأعمال
4. إدارة التغيير
وكتير أشياء تانية ضمن نطاق الإدارة الاستراتيجية
وسعيدة جدًا أنو هاد الكورس كان فيه أشخاص مهمّين جدًا وخبراء ومخضرمين وأهمّن أهمّن Brian Tracy

حبّيت شارك معكن هالإنجاز البسيط واحتفي فيه لذكّر حالي أنو عم أبذل جهد بوقت صارت فيه طاقتي ووقتي ومواردي أقل.. وأنو عنجد لازم نشوف حالنا بعين الفخر لما نعمل شي بيطوّرنا لو كان بسيط ولكن تراكميًا بيعمل فرق 🥰

وأنتو احكولي، شو آخر كورس/كتاب/أي شي أنجزتوه؟ 🤩💪
Next MBA Global

06/06/2024

"اتضحكوا علينا بطلعة غدا / بشوية شوكولا!"

يعني يا أصدقائي وصديقاتي،
ثقافة العمل ويلي هي حجر الأساس ببناء فرق العمل على اختلاف اختصاصاتها وحجمها وأهدافها، لا يمكن بنائها بمكوّنات هشّة ثانوية متل أنو نجيب غدا أو سناكات للتيم أو ناخدن مشوار مرّة بالسنة (هي الأمور حلوة وبتعطي انطباع لطيف أكيد ولكنها ثانوية)

ثقافة العمل لازم تنبنى على أساس متين،

1) أولها قيم فريق العمل يلي بيتم تحديدا من قبل ما نبلّش نختار مين الفريق وشو بدو يشتغل

2) بعدين خلق بيئة تواصل فعّالة وصحّية يكون فيها قائد الفريق حدا مهتمّ بشكل حقيقي بأفراد فريقه وعنده ذكاء عاطفي عالي

3) نفهم كل شخص من الفريق على الصعيد الشخصي شو أهدافه والتحدّيات يلي عم يواجها والمحفّزات المناسبة اله

4) نحافظ ع هي البيئة وما ننسى اقتلاع الأعشاب الضارّة (الأشخاص السلبيين) منها لحتى تضل نضرة وصحّية

5) أكيد بعد كل هاد فينا ننتبه للتفاصيل الثانوية يلي بتضفي رونق لطيف لبيئة العمل متل المشاوير المشتركة، مساحات "اللاعمل" والتواصل الشخصي كل فترة، السناكات، وغيرها من الأفكار

وطبعًا، خلّونا ما ننسى أنو البيئة الفيزيائية مهمّة جدًا والها تأثير كبير على أداء فريق العمل وتواصلن وصحّتن النفسية والجسدية
(رح أحكي بهالموضوع أكتر ببوست لاحق)

وهلأ، خلّوني أتمنالكن نهار سعيد ولطيف 🥰

05/06/2024

بتتذكروا لما حكيتلكن شو صار معي وكيف ممكن نخسر العميل بدقايق وسهولة من شي يومين تلاتة؟

طبعًا، الحديث يطول.. ولكن تعقيبًا ع اللي صار..
بالبداية أنا ضليت عم أبحث عن بدائل وطبعًا بسبب ضيق الوقت ما قدرت لاقي أي بديل
تم الردّ ع إيميلي أنو حنراجع المشكلة ونرجعلك تاني يوم
وما وصلني اتصال لحل المشكلة إلا لبعد يومين..

هلأ لما اتصلوا فيني أنا قلتلن إني مستاءة من طريقة التعاطي مع المشكلة
أكتر من المشكلة بحد ذاتا..
الموظفة اعتذرت مرة تانية.. وعطتني خصم ورجعت زبطتلي تواريخ حجز الخدمة من عندا

هلأ كونه حكينا بالمشكلة.. فينا نحكي بالحل..
لحتى تكون مشاركة تجربتي معكن فيها فايدة مو بس حكي فاضي

أول شي خلّونا نرجع لجذور المشكلة..
"موظف خطوط أمامية غير مدرّب بشكل كافي على التعامل مع المشكلات"

أنا بحب سمّي أي فريق بيشتغل على تماس مباشر مع الزبون بـ
"قوّات الخطوط الأمامية"
إن كانوا خدمة عملاء أو مبيعات أو مبيعات هاتفية أو المسؤولين عن الرد ع السوشال ميديا (رسائل وتعليقات) أو مدراء المشاريع أو مدراء الزبائن.. الخ

هدول الأشخاص مفتاحيين جدًا جدًا ببناء العلاقة مع العميل والحفاظ عليها
لهيك لازم يتدرّبوا بشكل احترافي عالي على التواصل الفعّال، الاستماع الفعّال، التفاوض، حل المشكلات، الذكاء العاطفي

وكمان متل ما مهم ناخد منن هالمهارات.. مهم نعطيهن..
يعني مهم يتم العناية فيهن لأن بيتعرضوا لضغوطات نفسية هائلة جدًا من قبل الإدارة يلي فوقن ومن قبل الزباين
لأن كلنا منعرف أديش في زباين التعامل معن صعب ومتعب

خلصنا من قصة التدريب،
لازم يكون في متابعة وتقييم دائمين لتواصلن مع العملاء
للتأكد أنو هنن عم يطبقوا كل شي تعلّموه بالتدريب ويتعلّموا من تجاربن ع أرض الواقع
ومهم جدًا يكون في شخص مرجعي عندو خبرة عالية جدًا يرجعوله في حال تعرضوا لأي موقف جديد أو معقد

هلأ في حال اتصل فيني عميل غاضب/مستاء 😡😤 وعندو مشكلة،
شو لازم أعمل؟

1. امتص غضبه واعترف بمشكلته ووصلّه أنك متفهمها وموافق معو أنها مشكلة

2. اسمعه بشكل فعّال وفهام المشكلة (أحيانًا المشكلة بتكون شي مختلف عن يلي بيحكيه أو شي أعمق هو مو شايفه)
لهيك كتير مهم تقدر تحلل المشكلة وتوصل لجذورها لأن هالشي بيساعدك تلاقيلا حلول

3. حل المشكلة.. في حال ما كنت صاحب قرار، خبّر العميل أنك حترجع للفريق المسؤول وترجعله خلال مدة (x) زمنيّة والتزم فيها
مو تقله برجعلك بعد 5 دقايق وتحاكيه بعد يومين أو ساعتين!.. هالشي حيرفعله ضغطه بزيادة ويحسّك عم تنيمه وتضحك عليه

4. بعد حل المشكلة، اتأكد أنو الحل يلي صار مرضي اله وعوّضه عن الشي يلي صار فعلًا

5. اتشكره لأنو لساتو عم ياخد خدمتك/منتجك رغم اللي صار وأنو كان متفهم وصبور معك لبينما انحلّت المشكلة وأكدله أنها ماعاد تتكرر
(وهون مهمّ كتير أنقل لفريق العمل المشاكل لحتى يلاقولا حلول جذرية ويتخذوا الإجراءات اللازمة لمنع تكرارها.. نفس الموضوع في حال كان في اقتراحات من العملاء لتحسين الخدمة/المنتج)

6. تابع معه فترة لتتأكد أنو الأمور كلها تمام وليحسّ أنك مهتم فيه بشكل شخصي وعم تحافظ عليه

في تفاصيل تانية؟.. أكيد وكتير..
عالم خدمة الزبائن جدًا كبير وفيه تفاصيل ومواقف وتجارب غنيّة على اعتبار سلوك البشر بحد ذاته عالم كبير جدًا ومو كل ألغازه تم حلها

انتبهوا ع عملائكن/زباينكن لأن المنافسين اليوم كتار وشرسين..
والبدائل أكتر من الهم ع القلب
وتذّكروا أنو خسارة عميل بتكلّف وقت وجهد ومصاري لأن عم نستثمر فيه على المدى الطويل

اي وهيك..
إلى اللقاء في الجريدة القادمة 😉
(يلي حابب يقرأ البوست السابق، الرابط بأول تعليق)

31/05/2024

🚫 بتضلّ شهور عم تبني علاقة مع عميل، وبتخسرها خلال دقايق
(وأحيانًا، ثواني حرفيًا)!!!

صرلي فترة بحجز لخدمة تنضيف عن طريق تطبيق
كنت حابّة الخدمة جدًا، والتواصل، والسرعة بالاستجابة، وأنو الخدمة متاحة بمنطقة سكني كونها بعيدة والخدمات يلي بتوصلّا كتير قليلة

طلبت الخدمة عدّة مرّات وبكل مرّة كنت رضيانة وجاهزة لأرجع أطلب مرّة جديدة بدون أي تردد.. وحتّى جرّبت خدمة شركة تانية ولكن ضل عندي ولاء للتطبيق خاصّة بعد ما تواصل معي الموظّف وعرض عليي خصم خاص في حال ثبتت ع الخدمة تكون متكررة بشكل دوري
(هو عرف طبعًا، لأن عم يقرأ الداتا تبعي ويشوف إني حجزت خلال فترة مو طويلة عدّة مرّات وقدر يعطيني الشي يلي أنا كنت بحاجته فعلًا)

التطبيق وصلتله من خلال إعلانات السوشال ميديا (يعني الجماعة حاطّين جهد ومعذبين حالنا وعاملين استهداف ومحتوى وعروض)

اليوم، كان من المفترض أحصل ع هي الخدمة الساعة 2 الضهر.. صارت الساعة 3 وما أجت الصبية.. بعتت شكوى ع الطلب أنو في تأخير.. الساعة 4 بيتصلوا فيني بيقلولي أنو ما في عاملات متوفرات بسبب الضغط اليوم وأنو بيأمنولي الخدمة بكرا صباحًا..

شو صار؟!..
1) أنا كعميل مو مشكلتي أبدًا الصعوبات يلي عم تواجهها كمقدّم خدمة أو منتج.. بيهمني النتيجة وفقط النتيجة

2) طريقة استجابة الموظّف، رغم اعتذاره، كانت جدًا محبطة.. على اعتبار قلتله في حال ما تأمّنت الخدمة اليوم حألغيها بشكل كامل واستسلم بسرعة وقلّي خلص أوك الغيها..

يعني ببساطة خسر عميل متكرر وكان عندو ولاء اله بسبب عدم خبرته الكافية كيف يتصرّف بمتل هيك موقف ويعوّضني كعميل بطريقة مرضية وبتناسب المشكلة يلي عم يواجهها

3) فورًا، دوّرت ع بديل.. بعد ما بعتت شكوى تانية ع الإيميل بخصوص اللي صار.. وطبعًا، لحد هلأ ما صار استجابة (اللي لازم تكون سريعة جدًا جدًا في حال الشكاوي والمشاكل) وحتّى إذا كانت الشركة احترافية لازم تكون استباقية من قبل ما العميل نفسه ياخد إجراء ويوصل لمرحلة الغضب

وهيك أعزائي وعزيزاتي، بتتعلّموا كيف بتخسروا عميل ذو ولاء عالي بخمس دقيقتين بدون معلّم..

ومو بس هيك بتحولوه لعميل خائب الأمل، غاضب، وممكن بحالات كتيرة يصير عدوّ وبدال ما يمدحكن يصير ينصح العالم ما تتعامل معكن بعد هالموقف..

وشكرًا وعفوًا..

24/05/2024

بتعرفوا أنو كلنا منبيع؟
(بوست النا كلنا، مو بس للي بيشتغلوا مبيعات وتسويق أو حتى بزنس.. جيبوا فنجان القهوة وتعالوا معي)

طبعًا اليوم بس تقول لحدا أنت مبيعات! بيشهق وبيقلك لا لا أنا مو مبيعات.. تم وصم المبيعات بالكذب والتلاعب بسبب الممارسات الخاطئة للأشخاص العاملين فيها عبر السنين..
سايمون سينيك (Simon Sinek) بيقول: "في طريقتين فقط للتأثير على سلوك إنسان، التلاعب أو الإلهام"

مع الأسف، نسبة كبيرة من الأشخاص بيتبعوا أساليب التلاعب لإقناع الزبون أنو يشتري.. وغالبًا، بيفكروا بالموضوع على أنو
عملية المبيعات تنتهي لما الشخص بيشتري المنتج والخدمة وخالصين.. يلا هاتولي الزبون يلي بعده..

بينما لما بدنا نحكي عن نمو الشركات أو الأعمال، من المهم جدًا أنو نفكّر بالموضوع على المدى الطويل
لنوصل لنهاية قمع التسويق يلي هي (العميل المناصر) يلي هو أعلى وأكثر ثباتًا من (العميل ذو الولاء العالي)

العميل المناصر هو يلي بيآمن بالبراند تبعك متلك وأكتر.. وبيسوقلك بدون أي طلب منك.. ومو بس هيك
لما حدا يحكي عنّك بالعاطل، حتلاقي متل السيف بضهرك.. بيدافع عنك متل كأنك من عضام الرقبة (متل ما منقول بسوريا)

طبعًا، الوصول للعميل المناصر بيحتاج وقت وجهد كبار كتير.. والأهم مصداقية عالية جدًا.. وتواصل فعّال كمان جدًا

بس خلّونا نرجع شوي لورا، عملية البيع بتبلّش من قبل ما تتواصل مع الزبون حتّى..
لما تعمل شي اسمو Fact Finding أو استقصاء للحقائق لتفهم مين هو زبونك فعلًا.. ويلي طبعًا بتسبقها خطوة تحديد زبونك الحقيقي قبل ما تبلش تعطي وقت وموارد مالية وبشرية لتفهمه وتحلّله وتعرف كيف بدك توصلّه..

في عبارة حلوة قالها غاري في (Gary Vaynerchuk) بتقول:
"كل دقيقة بتضوّعها وأنت عم تحاول تقنع حدا هو "لا" بالنسبة الك، هي دقيقة أنت ما عم تستثمرها لتلاقي الحدا يلي حيقلك "اي""

الحقيقة أنو، غالبنا بيضوّع وقت وقال يعني أنو تحدّي وهيك ليقنع حدا ماااالو زبونه أصلًا بدال ما يلاقي زبونه الحقيقي ويستثمر بعملية إقناعه والوصول اله وإيصاله ليكون العميل المناصر

كيف بدنا نقنع الزبون المحتمل؟.. الموضوع ببساطة، احكيله قصة مقنعة "اله" عم تلمس فيها نقاط الألم "تبعه" وعم توصّله فيها كيف أنت حتساعده "اله".. يعني بطّل تحكي قصتك أنت.. احكي قصته هو معك.. غيّر المنظور.. وكون أنت محلّه.. لتقدر تحكي هالقصة...

خبراء المبيعات الناجحين، هنن حكواتيين ناجحين.. بيعرفوا يحكوا القصة الصح للشخص الصح بالأسلوب الصح
(خلّيني هون أحشر رأيي الشخصي شوي بحسب تجربتي المتواضعة وقراءاتي..)

اللعب على وتر الإلهام هو يلي بيخلّيكن تصنعوا علاقة طويلة الأمد مع العميل وتحولوه لعميل مناصر
لأنو يعني خلينا نكون صريحين وواقعيين مع بعض..
ما عاد حدا غبي أبدًا.. والتلاعب متل الكذب حبله قصير وبيأذي.. لأن بس يكشف الزبون تلاعبك.. ما بس حتخسره كزبون
حتخسر أي حدا ممكن تجي سيرتك قدامه.. وحتخسر صورة البراند الحلوة يلي عم تحاول ترسمها بعقول الزباين..

وشايفين كل هالحكي يلي فوق، كلنا بالمعنى الحرفي بحاجة نتعلّمه..
لأن يوميًا نحن منبيع حالنا وخبراتنا وقصّتنا ومنتجاتنا وخدماتنا وتجاربنا وكل شي منعمله
بحياتنا الشخصية، المهنيّة، الأكاديمية، الاجتماعية.. بمقابلة العمل وبالسيرة الذاتيّة وع السوشال ميديا وبالواقع
(وطبعًا هون ما تاخدوا المعنى الحرفي للبيع يلي بيكون بمقابل مالي فقط، فكّروا أبعد من هيك)

كيف نحكي قصة مبيعات ناجحة؟
هي حاتركلكن ياها للبوست الجاية لأن صار هالبوست جريدة طويلة

20/05/2024

🧐 لماذا نشعر بانتماء أعمق ورغبة في تكرار تجربة الشراء من العلامات التجارية التي تقدّم تفضيلات شخصية أكبر من غيرها؟

نشرت جامعة تكساس دراسة في عام 2008 بعنوان: «السيطرة على المستهلك والتخصيص في البيئات الرقمية: تحقيق في علم نفس اختيارات المستهلك وتأثيرها في استمتاعه بوسائل الإعلام وموقفه ونيّاته السلوكية»، وتعزو هذه الدراسة انجذابنا إلى التفضيلات الشخصية إلى عاملين رئيسين هما: الشعور بالتفرّد والسيطرة، والتخفف من عبء التعبئة المعلوماتية.

الشركات التي تتفوّق في مجال التخصيص التسويقي تحقق إيرادات أعلى بنسبة 40% مقارنة بالشركات التقليدية الأخرى.

كما تُظهر النتائج أيضًا أن 71% من المستهلكين يتوقّعون من الشركات تقديم تفاعلات شخصية أكثر من قبل، ويشعر 76% بالإحباط عندما لا يجدون هذا النوع من الاهتمام الشخصي بهم. ومع زيادة الضغط على الشركات أصبح من الأسهل على المستهلكين، إذا لم تعجبهم التجربة التي يتلقونها، اختيار تجربة علامة تجارية أخرى بكل بساطة.

منقول من / ثمانية / Thmanyah
(رابط النشرة كاملة في التعليق الأول👇)

19/05/2024

شغلة #مهمّة جدًا بالتسويق للبراند (سواءً كانت تجارية/شخصية)
النزاهة والشفافية والصدق

في براند عالمية اسما The Body Shop
كانت وجهة ساحرة مليئة بالصابون الملون، وكرات الاستحمام اللامعة، وغيرها من المستحضرات.. وحققت نجاح باهر وانتشار واسع ع مدى سنين وكان عندا جمهور كبير بعشرات البلدان حول العالم..

وبليلة ما فيها ضو قمر بالـ 2006، الله توّه رأي مؤسسة هالبراند (أنيتا روديك) وباعتا لـ لوريال يلي ما قدرت تحافظ ع القيمة المضافة الفريدة للبراند لكتير أسباب ويلي بيهمني منها بهالبوست هو:

فقدان الهوية الأخلاقية: شركة لوريال، كونها شركة تجميل ضخمة، كانت تُعتبر العكس تماماً للشي يلي كانت تمثله The Body Shop يلي كانت معروفة بالتجارة الأخلاقية، وعدم إجراء التجارب ع الحيوانات، واستخدام مواد طبيعية تمامًا، والالتزام بالاستدامة، وهي قيم متناقضة مع ممارسات لوريال.
(شوفوا أول تعليق حطّيت فيه تفاصيل أكتر عن هالنقطة كرمال ما يكون البوست كتير طويل)

المهم يا جماعة، لاحظتوا؟
البراند فقدت مصداقيتا قدام جمهورا ولهيك فقدت شعبيتا وانحدرت بشكل كبير.. هلأ هي ما انتهت ولا اختفت بشكل نهائي، ولكنها عم تحتضر وتعاني بظل المنافسة الكبيرة مع براندات تانية جديدة قدرت تعطي قيمة مضافة وتجذب جمهور The Body Shop المستاء..
(ومين بينسينا البراند إلا براند تانية🤣 وطبعًا هون ما قصدي ع البراند😛)

وهالشي على الرغم من أنو تم بيع البراند لشركات تانية، إلّا أنها ما قدرت تتفادى هالانحدار يلي صار ولا تنتعش أو ترجع ثقة جمهورا فيا..

لهيك، كتير مهمّ البراند تفهم قيمها وتحدّدن من البداية
وتوضّحن جدًا لجمهورا.. وبعدين تلتزم فيّن بأدق التفاصيل إن كان التسويق والإنتاج والموظّفين والوجوه الإعلامية البارزة للعلامة التجارية، الخ)

يعني تخيّلوني مثلًا، أجي قلكن يا جماعة أنا مناصرة لقضية البيئة وتشوفوني عم استخدم كياس بلاستيكية أو أعمل ممارسات بتضرّ بالبيئة.. كيف بدكن توثقوا فيني مثلًا مثلًا بعدا؟..

اي وهيك.. هلأ، احكولي..
شوفي شي علامة تجارية أو شخصية بتعرفوها فقدت مصداقيتا وشو كانت القصة؟ وهل برأيكن فقدان المصداقية ممكن يتصلّح؟

15/05/2024

نصيحة سريعة للي بيشتغلوا Email Marketing
(انتبهوا للداتا تبعكن ما يكون فيها تكرار/أخطاء)

اليوم وصلني نفس الإيميل (النيوزليتر) 3 مرّات
طبعًا هالشي ممكن يكون اله كذا سبب ولكن أحيانًا بتكون الداتا تبع الشخص نازلة مرتين لسبب ما بقاعدة البيانات.. ولو ما بحب الجهة يلي وصلوني منها هالإيميلات كنت انزعجت ولغيت متابعة النشرة تبعن

لهيك، كتير مهم تعملوا فلترة ونفضة لقاعدة البيانات تبعكن دايمًا
1. بتشيلوا التكرارات
2. بتنتبهوا للإيميلات اللي مكتوبة غلط أو ما عادت فعّالة
3. كملوا المعلومات الناقصة عن كل شخص/زبون/عميل/شركة أو اعملوا أبديت للمعلومات (مثلًا شخص غيّر مكان شغله)

بزمناتي اشتغلت بشركة، عندن فوق الـ 10 آلاف إيميل ولكن بحالة فوضى رهيبة وما قدرنا نستفيد منن كما يجب لأن المعلومات ناقصة (مثلًا يا أما ما نعرف هالشخص لأي جهة تابعة يا أما الإيميل غلط يا ما في رقم.. الخ)

نحن بعصر الداتا (هي الدهب المعاصر لوقتنا الحالي) طبعًا للي بيعرفوا يستثمروا فيها ويسيروها لصالحن

GhaliloOo's Blog / غاليلوو

16/08/2024

05/08/2024

19/07/2024

08/07/2024

07/06/2024

06/06/2024

05/06/2024

31/05/2024

24/05/2024

20/05/2024

19/05/2024

15/05/2024

Address

Website

Alerts

Shortcuts

Share

Category