23/03/2026
میرے والد وہ انسان ہیں جنہوں نے اپنی ساری زندگی ہمارے لیے وقف کر دی۔ دن ہو یا رات، گرمی ہو یا سردی، انہوں نے کبھی تھکن کو اپنے راستے میں نہیں آنے دیا۔ ان کی ایک ہی خواہش تھی کہ ان کے بیٹے پڑھ لکھ کر ایک بہتر زندگی گزاریں — اور الحمدللہ، ان کی محنت رنگ لائی، ہم سب بھائی گریجویٹ ہو گئے۔
لیکن زندگی ہمیشہ آسان نہیں ہوتی۔ پاکستان کے حالات سب کے سامنے ہیں، جہاں سرکاری نوکری حاصل کرنا ایک خواب سا لگتا ہے۔ میں نے بھی اپنے حصے کی پوری کوشش کی۔ یونیورسٹی کے دنوں سے یوٹیوب کا سفر شروع کیا، دن رات محنت کی، خواب دیکھے… مگر کامیابی میرے حصے میں نہ آ سکی۔ نہ سرکاری نوکری ملی، نہ اس میدان میں وہ مقام حاصل کر سکا جس کی امید تھی۔
میرے والد کا ایک خواب اور بھی تھا — کہ ان کا کوئی بیٹا ڈاکٹر بنے۔ یہ خواب میرے چھوٹے بھائی عاقب نے پورا کیا۔ اس کامیابی کے پیچھے سب سے زیادہ اگر کسی کی محنت ہے تو وہ میرے والد ہیں، جنہوں نے اپنے خواب کو حقیقت بنانے کے لیے ہر ممکن قربانی دی۔
آج میری دعا ہے کہ اللہ پاک میرے بھائی کو زندگی کے ہر میدان میں کامیاب کرے۔ وہ ہمارے والدین کا سہارا بنے، ان کی امیدوں پر پورا اترے، اور وہ سب کچھ حاصل کرے جو میں نہ کر سکا۔ کیونکہ اصل کامیابی یہی ہے کہ انسان اپنے والدین کے چہرے پر خوشی لے آئے۔
اور میں… میں آج بھی اپنے والد کی محنت پر فخر کرتا ہوں۔ ❤
عاطف لاشاری
