01/06/2026
DUBBII MIILA BAKHAR.
***********************
- 2
Dila Yuuyyaan haasawu kana hixuphii takka malee callisee dhaggeeyfachaa tireeti, "Gaafanagaa nuti kuni maal jettaree amma?" ja’een Haamidoon deebisee.
"Gabra, ee dhugaa baanta," je’een Yuuyyaaniis.
"Gabrummaallee tarraa achi aantu sankha," Hamidoodha.
"Tan bitiisan hamma tokko al oolanii gurguratanii tanan ajaa’ibdu, tan oborraa akka jirtutti lafa isiiti wajjiin booji’anii bitan," ja'e Yuuyyaan.
"Oborraa xiqqoo tanaaf oota ati! Ituun balloon hoo tan nu dura cabxe," Hamidoodha.
"Waan saniitti Arsii cabseetu gama Ituu dhufeemii?" Yuuyyaadha.
"Arsii duraas bar Salaalee cabseeti as tarkaanfateemii? Akka himanitti bar Walloorraa hamma Booranaatti, Madda Walaabuurraa kaasi kuunnoo hamma Makkanniisa Raayyaatti, Gibee fi Leeqas ittuma idayii maaltu hafeef jetteeti?" Hamidoon.
"Ee, amma Odaa Shanan irraa kamtu hafe jetteeti, eega Bultum cabsee hammuma Afuran Qalloo kana yoo taate malee," Yuuyyaadha.
"Yawuu," je’e Hamidoon, dubbii tuffachuu isaatti fakkaatti.
"Waan saniittillee akkaan taatu akka maleen taatu, eega lafa Oromtichaa danuu tana if booda aanse hammi kun... Ee," ja’e Yuuyyaaniis, arraadasaa rarraasee hambisullee yaada Haamidoo qooddachaa.
"Ee bar, namtichaatu 'shuuroon tuni maal taate?' jennaaniin, 'ee isiin tuni daakkittiis ni haftee, marqattiis ni haftee daranu ammas jiidha dhabaatu bakkaa haqee' ja’e ja’an."
Silaahidha taate malee, silaa dubbiin ammaan dura nurraaf haftee jechuu isaati fakkaatti! Gaafa jarri weerara jalqabuu osoo bakka takka itti duulanii, tun hundinuu hin dhuftu jechuu fedheeti Haamidoon.
Hammanumatti, "Ushhhh..." jechaa horufaa dubbifachuu seenee Yuuyyaan. Hafuurfannoo mirqaana hojii osoo hin ta’iin, mallattoo ta’uu siiti suusiin akka usu itti himuudhaaf.
