04/10/2026
MAKUKULAY NA REGATTA, SINUNDAN NG WOW SARDINAS
Libo-libong mamamayan at bisita, nakiisa sa mga tampok na aktibidad ng Fiesta Hermosa 2026
Zamboanga City — Naging makulay at masigla ang R.T. Lim Boulevard ngayong Linggo, Oktubre 4, matapos idaos ang Regatta de Zamboanga at Wow Sardinas, dalawang tampok na aktibidad ng Fiesta Hermosa 2026.
Unang isinagawa ang Regatta de Zamboanga, isang karera ng mga bangkang layag na nagdagdag ng makukulay na tanawin sa karagatan ng lungsod. Dumalo rin sa aktibidad si Ukrainian Ambassador Yuliia Fediv kasama ang kanyang pamilya, mga kinatawan ng mga samahan ng turismo, at iba pang lokal at dayuhang bisita.
Sinundan ito ng Wow Sardinas, kung saan libo-libong mamamayan at bisita ang nakiisa sa sama-samang pagkain ng sardinas, crackers at iba pang pagkain na inihanda sa mahigit 600 metrong bahagi ng R.T. Lim Boulevard.
Pinangunahan nina Mayor Khymer Olaso at Vice Mayor Beng Climaco, kasama ang iba pang opisyal ng lungsod, ang aktibidad. Dumalo rin ang mga konsehal ng Zamboanga City na sina BG Guingona, Atty. Mel Sadain, Atty. Vlad Jimenez, Joel Esteban, Fred Atilano, B**g Atilano, King Omaga, Kim Villaflores at CJ Dalipe.
Limang kumpanya ng sardinas ang lumahok ngayong taon—ang Mega Fishing Corporation, Aquatic Food Manufacturing, ZCE & L Corporation, Universal Canning Corporation at Century Pacific—na naglaan ng libo-libong lata ng sardinas para sa mga dumalo.
Sa patimpalak para sa pinakamahusay na presentasyon, Mega Fishing Corporation ang nagkamit ng unang gantimpala, habang pumangalawa ang Aquatic Food Manufacturing at pumangatlo ang ZCE & L Corporation. Tumanggap naman ng gantimpalang pampalubag-loob ang Universal Canning Corporation at Century Pacific.
Nagpasalamat si Mayor Olaso sa mga kumpanyang nakibahagi at binigyang-diin ang mahalagang ambag ng industriya ng sardinas sa ekonomiya ng Zamboanga City at ng bansa.
Taun-taon, dinarayo ang Wow Sardinas bilang isa sa mga inaabangang aktibidad ng Zamboanga Hermosa Festival. Sa pagkakataong ito, umabot sa mahigit 600 metro ang lugar na ginawang pook-kainan, kung saan sama-samang nakibahagi ang mga residente at bisita.
Ang Regatta de Zamboanga at Wow Sardinas ay kabilang sa mga pangunahing tampok ng ikaapat na araw ng Fiesta Hermosa 2026, na ipinagdiriwang bilang parangal sa Nuestra Señora del Pilar, na ang kapistahan ay gugunitain sa Oktubre 12.
📸 Jung Francisco | Mindanao NI – News & Information
📲 Para sa pinakabagong balita at mga kaganapan sa Mindanao, i-like at i-follow ang Mindanao NI.
