26/12/2024
شكر خويا Atef El Chiapo Ben Youssef
Voyageologue
أي نجاح يتجاوز شخصي المتواضع ليشمل تونس العزيزة 💝🇹🇳
تونس برجالها و نساها، في جميع أنحاء العالم، فما إلي تشرفت بمقابلتهم و فما إلي مزال، التوانسة إلي باش نحكي عليهم نجوم تتلألأ في عدة بلدان، ماهمش نجوم على خاطرهم عاملين العيب في وسائل التواصل الاجتماعي، ماهومش نجوم على خاطر البوتكس و الرذيلة على التيكتوك و الانستغرام، ماهمش نجوم على خاطر صوروا رواحهم حارقين في فلوكة و يسبوا في بلادهم، ما همش نجوم على خاطر استدعوه في حصة تلفزية بذيئة و رديئة في إحدى قنوات المجاري حشاكم، الناس هاذوما التوانسة إلي يشرفوا و يعرفوا و تبارك الله موجودين و مشرفين بلادهم تونس بأخلاقهم و خدمتهم و لبستهم و نظافتهم و كلامهم و قلبهم المليان بمحبة الناس و خاصة بلادهم تونس، الناس هاذوما بفضلهم و على خاطرهم صورة بلادنا مزالت طيبة و محترمة، و أول إنسان حبيت نبدأ بيه هو سي حمادي زايد أبن الجنوب أبن تونس إلي نورها في كل بلاد زارها و تقلد فيها منصب من المناصب، سي حمادي مدير نزل الريو بالاص زنزيبار واحد من أرقى النزل في تنزانيا و في المحيط الهندي، و وقت إلي زرته ما تتصوروش قداش فرحت بمقابلته و تشرفت بمعرفته و هو من الناس إلي يخليك تكون تونسي و رأسك عالي، ماهوش غريب إنو كان مسؤول على نزل كبار في جزيرة موريس و غيرها، و ماهوش ساهل باش توصل لمنصب كيف هذا في نزل المحيط الهندي، للأسف اعلام المجاري ما يحكيلكمش على سي حمادي و غيره، ما يحبش الناس تعرف على اولاد و بنات تونس الحقيقيين الرائعين، ما يساعدهم الناس الناجحة في ميادين مختلفة، لأنهم يحبوا يغرسوا في عقول الشباب إنه باش تنجح و تتشهر يلزمك تكون فاسد و جاهل و مجرم و قليل تربية حاشاكم، و جلطام و قبيح في الشكل و في الكلام، يلزم تكون ما تعرفش تركب جملة بالعربية و حتى لغة، يلزم تكون مظهرك مقزز و ما فيهش لا حشمة و لا إحترام لا للوالدين لا للمجتمع إلي مستحيل يوريوه التوانسة الرجال و النساء البلحق، إلي بقدرة ربي باش نحكي عليهم بالواحد بالواحد في الصفحة المتواضعة هذي باش تكون قطرة زهر و عطرشية في بحر من الرداءة و بقدرة ربي ريحة العطرشية و الزهر ديما غالبين.
شكرا سي حمادي زايد على كل إلي عملته و تعمل فيه لبلادك شكرا لأنك المثال نتع التونسي الذي يحتذى به و شكرا لانك ذكرتني و تذكرني بالتونسي الأصيل الراجل المحب لبلاده، و أنت خير سفير لينا في تنزانيا و شرق إفريقيا و ربي يعطيك على قد قلبك و حبك لبلادك.
سافر بالتونسي و ديما يمشي...
