22/09/2025
د پخواني پاچا ظاهر شاه یوه کیسه
د پخواني پاچا يوه جالبه خاطره:
مصطفی ظاهر د پخواني پاچا محمد ظاهرشاه لمسی دی، دی په خپلو خاطراتو کې وايي چې:
" زه به څو کلن وم چې یوه ورځ بابا راته وویل راځه چې نن په ښار کې یو چوپان کباب وخورو. دواړه په ساده جامو کې روان شوو، په لاره عسکرو پاچا وپیژاند، سلامي یې ووهله او تګ مو افشا شو. بیرته راغلو بابا لونګۍ وتړله او مول یې وواهه، چې څوک یې ونه پیژني. هغه وخت د پل خشتي جومات ترڅنګ د کباب هوټلونه و موږ یوه هوټل ته ننوتلو. چوپان کباب مو راوغوښت او په مزه مو وخوړ. بابا چې جیب ته لاس کړ په جیب کې یې پیسې نه وې. وارخطا شو ماته یې وویل پیسې نه لرو اوس به څه کوو.
ماته یو دوه ورځې دمخه بابا لس افغانۍ راکړې وې چې هغه وخت ډیرې پیسې وې. ماورته وویل بابا غم مه کوه تا چې ماته پیسې راکړې هغه مې ساتلې دي. بابا ډیر خوښ شو د هوټل شاګرد یې را وغوښت پیسې یې ورکړې. په دې وخت کې د بابا مول خلاص شو او مخ یې ښکاره شو. هوټلي یو ځل په نوټ باندې عکس او بیا بابا ته وکتل. په حیراني یې وویل دا عکس خو ستا غوندې دی بابا ورته وخندل ویې ویل هو زما او دې عکس څیرې سره نږدې دي. په دې وخت کې د ارګ د ګارد قوماندان خبر شوی و، راغی او بابا ته یې سلامي ووهله. نور خلک هم پوه شول چې پاچا(اعلیحضرت محمد ظاهر شاه) دی. نو ټولو دده په خوا رامنډه کړه چایې لاسونه ښکلول او څوک حیران وو کوښښ یې کاوو چې ددوی د جامو یوه ټوټه د تبرک لپاره ترلاسه کړي، هغه په خلکو ډیر ګران و"
📚د ارګ نن او پرون کتاب ۹۸ مخ
📚
