Soola Arman Radio / سوله ارمان راډیو

18/09/2025

پر جلال‌اباد ـ کابل لویه لار د کاکڅ په سیمه کې نن ماسپښین د یوې کرولا او رنجر موټر ترمنځ ترافیکي پېښه رامنځته شوې ده.

د سیمه ییزو سرچینو په وینا، پېښه هغه مهال وشوه چې دواړه موټر په تېز سرعت د یو بل مخې ته ولاړل او په سخت ډول سره وجنګېدل.

د یادې پېښې د مرګ‌ ژوبلې په اړه تر اوسه کره معلومات نه دي ورکړل شوي.

د یادونې وړ ده چې پر جلال‌اباد ـ کابل لویه لار وخت ناوخت د ترافیکي پېښو راپورونه ورکول کېږي، چې ډېری یې د موټر چلوونکو بې‌ احتیاطۍ او د ترافیکي اصولو نه مراعت له امله رامنځته کېږي.
Soola Arman Radio / سوله ارمان راډیو

18/09/2025

لغمان کې د بېلابېلو رسنیو د خبریالانو تر منځ د یووالي، ښې همغږۍ او تفریح په موخه د کرکټ دوستانه لوبې پیل کیږي، چې دوه ورځې به دوام وکړي.

د کرکټ په دې لوبو کې، خپلواک خبریالان، لغمان میډیا او هیرو کرکټ ټیم په نومونه درې لوبډلې برخه لري. هره لوبډله دوه سیالۍ کوي، چې دوه مخکښې لوبډلې به خپلو کې پای لوبه ترسره کړي.

د یادو سیالیو لومړۍ لوبه، نن پنجشنبه ماسپخین د خپلواک خبریالانو او لغمان میډیا تر منځ ترسره کیږي، چې پایلوبه به یې سبا جمعه مازیګر درې بجې ترسره شي.

د لغمان خبریالانو تر منځ یادې دوستانه لوبې د مهترلام ښار سلطان غازي بابا ښار ګوټي په ډاکتر احمد ظاهر پارک، د نصیر سهاک کرکټ لوبغالي کې تر سره کیږي.

17/09/2025

د هرات ولایت سیمه یز مسؤلین خبر ورکوي، چې د پشتون زرغون ولسوالۍ په توده کلي کې د څه باندې (۳،۵) میلیونه افغانیو په لګښت د اوبو د یوه کوچني بند (چیکډیم) د جوړولو چارې بشپړې او ګټې اخیستنې ته وسپارل شو.

د یاد ولایت د کلیو د بیارغونې او پراختیا ریاست له لوري ‏جوړ شوی د اوبو دغه کوچنی بند (۲۶) متره اوږدوالی، (۵،۳) متره لوړوالی او د (۱۴۰۰۰) متر مکعب اوبو ذخیره کولو وړتیا لري چې د کار په جریان کې يې لسګونه تنه کاریګرو ته د کار زمینه برابره شوې وه.

‏د یاد کوچني بند سره به د باران اوبه مهار او د ځمکې لاندې اوبو سطحه برقراره وساتل شي.

16/09/2025

16/09/2025

د سوله ارمان راډیو د دې اوونۍ په (رنګینه ځولۍ) ادبي خپرونه کې راسره خوږ ژبی شاعر ښاغلی انوش عنبر مېلمه دی.
ښاغلی عنبر، د ښه شعر لیکلو هنر او وړتیا لري.
نن یې اورو؛ او ورسره په ژوند او هنر سربېره، د ده پر شاعرۍ، لیکنو، ادبي سفر، چاپ او ناچاپ اثارو خبرې اترې کوو.
که یې مینه وال یاست، راسره خپرونه واورئ او خپلې پوښتنې او غوښتنې مو راسره شریکې کړئ.

وخت : نن ماسپښین 3:00
89.1 FM

+93782518188
+93702518188

16/09/2025

افغان اتلان نن د ۲۰۲۵ کال د اسیا شل‌اوریز جام سیالیو دویمه لوبه کې نن شپه بنګله‌دېش سره مخ کیږي.

دغه سیالي، نن سه‌شنبه ماښام اووه بجې د أبوظبي کرکت نړۍوال لوبغالي کې پيلیږي.

افغان لوبډلې د اسیا جام سیالیو کې، خپله لومړۍ لوبه له هانګ‌کانګ څخه ګټلې او درېیمه لوبه به د را روانې پنجشنبې په ورځ د سریلانکا پر وړاندې ترسره کړي.

د سږ کال اسیا جام سیالیو کې ۸ ګډون‌کوونکې لوبډلې په دوو ګروپونو وېشل شوي، چې لومړي ګروپ کې هند، پاکستان، عربي متحده امارات او عمان لوبډلې دي او دویم ګروپ کې افغانستان، سریلانکا، بنګله‌دېش او هانګ‌کانګ لوبډلې شاملې دي.

د یادې ده، چې له هر ګروپ څخه دوه غوره لوبډلې به د دغو سیالیو څلور غوره لوبډلو پړاو ته لاره پیدا کړي.

09/09/2025

د افغانستان په ختیځو ولایتونو کې د وروستۍ زلزلې له زیانمنو سره د مرستو په دوام؛ تازه د تاجیکستان له لوري د ۳ زره ټنه بشري مرستو یوه ستره جوپه کندز ولایت ته راورسېده.

مرسته شوي توکي په ۹۰ لویو موټرو کې بار دي، چې نن سه‌شنبه د شیرخان بندر له لارې افغانستان ته داخل او په کندز ولایت کې افغان لوري ته وسپارل شول.

‏د تاجیکستان د ولسمشر ځانګړي استازي، شریف سلطان زاده، د مرستو د سپارلو پر مهال وویل:«دغو مرستو کې خوراکي توکي، جامې، درمل او ساختماني مواد شامل دي، چې موخه یې د زیانمنو افغانانو ملاتړ دی».