05/11/2025
په پاکستان کې د ګڼ شمېر افغان خبریالانو وضعیت خراب شوی دی. دا خبریالان هغه کسان دي چې د افغانستان له امنیتي ګواښونو تښتېدلي او د نورو هېوادونو د تګ کیسونه لري، خو وايي چې د پاکستان حکومت یې ویزې نه تمدیدوي او له همدې امله بېاسناده پاتې دي.
په وروستیو اوونیو کې د پاکستان پولیسو د دوی نیول، ځورول او پلټنې ډېرې کړي دي. پولیس له هغوی ویزې غواړي، خو خبریالان وایي چې د ویزې تمدید خپله د پاکستان حکومت بند کړی دی.
د خیبر پښتونخوا او اسلاماباد خبریالان وايي پولیس کور په کور ګرځي، د افغانانو سره د کور کرایه او د پیسو راکړه ورکړه منع شوې، او هغوی له اقتصادي او رواني ستونزو سره مخ دي.
دوی له نړیوالو سازمانونو غواړي چې د دوی د تګ (کیسونو) پروسه ګړندۍ کړي او ژر یې له پاکستانه وباسي.
د دغه فشارونو زیاتوالی د طالبانو او پاکستاني ځواکونو ترمنځ د اکتوبر له ۱۱مې نېټې وروسته پیل شو، کله چې دواړو لورو جګړې وکړې او وروسته یې د لنډ اوربند پرېکړه وکړه.
د افغانستان د رسنیو ملاتړ سازمان (AMSO) او ګڼو نړیوالو ادارو (لکه RSF او CPJ) د پاکستان مېشتو افغان خبریالانو د وضعیت په اړه اندېښنه څرګنده کړې او د ملګرو ملتونو له ادارو یې د عاجل اقدام غوښتنه کړې ده.
د ملګرو ملتونو د کډوالو د ادارې (UNHCR) د معلوماتو له مخې، له اپرېل تر سپتمبر پورې پاکستان له ۵۵۴ زرو ډېر افغان کډوال ایستلي دي.
https://katawaztimely.com/
