15/09/2025
۴۶۰ تن شاگردان کورس‌های خصوصی در امتحان رقابتی معارف تخار اشتراک کردند.
تالقان –۲۴ سنبله ۱۴۰۴ – آژانس اطلاعاتی باختر
عظیم‌الله توحیدی، مدیر نشرات ریاست معارف ولایت تخار، گفت که ۴۶۰ تن از شاگردان کورس‌های خصوصی در امتحان رقابتی که از سوی رهبری ریاست معارف تخار راه‌اندازی شده بود، اشتراک کردند. به گفتهٔ وی، امتحان در فضای امن در چمن مکتب تجربوی سید عبدالرحمن شهید برگزار گردید.
توحیدی افزود محفل با تلاوت آیاتی چند از کلام‌الله مجید توسط یکی از شاگردان آغاز شد و سپس مولوی گل‌محمد بشیر آمر تربیه معلم و تعلیمات عمومی پیرامون اهمیت این امتحان صحبت کرد. او خاطرنشان ساخت که این امتحان به اساس توافق‌نامه دوحه برگزار گردیده و برای کسانی که از موضوع آگاهی ندارند، پاسخ‌های مستند از کتاب‌الله و احادیث نبوی صلی‌الله علیه‌وسلم وجود دارد.
مدیر نشرات معارف تخار همچنان گفت: «برای شاگردان ممتاز که در حل سوالات بهتر درخشیدند، از سوی رهبری معارف جوایزی در نظر گرفته شده است که طی محفل ویژه برایشان اهدا خواهد شد.»
به گفتهٔ وی، جوایز به این ترتیب است: برای شاگرد اول یک دستگاه کمپیوتر لپ‌تاپ، برای شاگرد دوم یک دستگاه تلفون گلکسی و به ۲۰ تن دیگر از شاگردان ممتاز نیز جوایزی اهدا می‌شود.
