22/05/2025
وردګ د لوړو زده کړو مؤسسه کې د محصلینو ترمنځ ورزشي سيالۍ پای ته ورسېدې.
ورزش د بدني ځواک، فکري توازن، روغ ژوند او ټولنیز تعامل مهم عنصر ګڼل کېږي. د همدې موخې لپاره، د وردګ د لوړو زده کړو مؤسسې د پنځه ګونو پوهنځیو د محصلینو ترمنځ د والیبال، کرکټ او ځغاستې سیالۍ د ځانګړو تنظیمي هڅو په مټ ترسره شوې، چې له څو ورځنیو جذابو لوبو وروسته یې پای ته رسېدنه وشوه.
یادې سیالۍ د محصلانو د همغږۍ او تکړښت کمېټې او محصلانو د خدمتونو د همغږۍ عمومي مدیریت په نوښت د محصلینو ترمنځ د سالمې سیالۍ، ورورولۍ، نظم، سپورتي ارزښتونو او استعدادونو د موندنې په هدف پیل شوې وې، چې پکې د بیلابیلو پوهنځیو محصلینو پراخ ګډون درلود. نوموړې سیالۍ د لوبغاړو ترمنځ د نه ستړې کېدونکو هڅو، اخلاص، او ریښتینې رقابت ښکارندوی وې.
د والیبال په سیالیو کې د کمپیوټر ساینس پوهنځی ټیم د تخنیک، چټکتیا او همغږۍ له مخې لومړی مقام خپل کړ، او د ښوونې او روزنې پوهنځی لوبغاړو دوهم مقام ترلاسه کړ.
په کرکټ سیالیو کې بیا د کمپیوټر ساینس ځوانو اتلانو، د ښه توپوهنې او توپاچونې له لارې، اتلولي خپله کړه، او د شرعیاتو پوهنځي د باور وړ ټیم دوهم مقام خپل کړ.
په ځغاسته کې د اقتصاد پوهنځی چټکو منډو وهونکو لومړی او دوهم مقامونه تر لاسه کړل، او درېیم مقام د کمپیوټر ساینس پوهنځی یو تکړه ځوان ترلاسه کړ.
د پای مراسمو کې د مؤسسې مسؤولینو، استادانو او اداري کارکوونکو ګډون درلود، چې په ترڅ کې یې د د سیالیو غوره ټیمونو او غوره لوبغاړو ته ستاینلیکونه او ځانګړې جایزې او د اتلولۍ جامونه ورکړل شول.
د فرهنګي چارو او نشراتو کمېټه
