29/11/2025
GËZUAR 28 NENTORIN!
Me përpjekje të jashtëzakonshme 113 vjet më parë populli shqiptar shpalli shtetin e tij sovran dhe të pavarur. Shpallja ishte vetëm hapi i parë, simbolik, dhe për shqiptarët, historia do të lypte edhe më shumë shpirt sakrifice për ta konsoliduar shtetësinë e vet dhe mbi të gjitha guximin për të shpresuar.
113 vite më vonë, shteti shqiptar nuk është në lartësinë e ëndrrave të shumicës së qytetarëve. Qeveria, me politikat e saj të jashtme dhe të brëndshme, me mbjelljen e pabarazisë ekstreme, autoritarizmin, si dhe shkeljen mbi traditat tona më të mira politike, po e dobëson pandalur shtetin shqiptar, pavarësia e të cilit rrezikon të jetë e tillë veç në raport me qytetarët e tij, por jo edhe ndaj parave të pista, trafikut të influencave dhe pazareve me spekulantë ndërkombëtarë.
Ne, aktivistët e Lëvizjes BASHKË, e pritëm këtë 28 nëntor nga qyteti i Kamzës, duke lajmëruar qytetarët për protestën e së dielës kundër rritjes së çmimit të biletës së autobusit për dhjetëra mijëra punëtorët, të rinjtë dhe moshuarit. Sepse pa njerëzit e punës dhe të krijimtarisë, pa shpërblimin e drejtë të sakrificave të së djeshmes dhe shpresën për një të ardhme më të mirë, nuk mund të ketë as shtet dhe as atdhe për të gjithë.
Shtetësia dhe interesi publik duhen mbrojtur e kultivzuar çdo ditë.
