07/08/2026
Një zjarr me përmasa të mëdha përfshiu mesditën e së premtes fshatin Plan i Bardhë, në Klos, duke rrezikuar banesa dhe detyruar autoritetet të ndërhyjnë me forca të shumta për vënien e flakëve nën kontroll.
Për shkak të përhapjes së zjarrit pranë zonës së banuar, Bashkia Klos bëri një thirrje publike për ndihmë, duke e cilësuar situatën si të rëndë dhe duke kërkuar mbështetjen e qytetarëve dhe vullnetarëve në përballimin e emergjencës.
Gjatë ndërhyrjes u evakua një i moshuar me aftësi të kufizuar, i cili u shpëtua pa pësuar lëndime apo dëme. Disa banesa të braktisura u dogjën plotësisht.
Pas disa orësh pune në terren, autoritetet njoftuan se vatra e zjarrit u vendos nën kontroll falë një operacioni të koordinuar mes Forcave të Armatosura, shërbimeve zjarrfikëse të Dibrës, Bulqizës, Klosit dhe Matit, si edhe me ndihmën e punonjësve të Bashkisë Klos, vullnetarëve dhe banorëve të zonës.
Ende nuk ka një bilanc zyrtar mbi sipërfaqen e djegur apo dëmet e shkaktuara nga zjarri.
Kjo nuk është hera e parë që Plani i Bardhë përballet me një situatë të tillë. Edhe gjatë verës së kaluar, në të njëjtën zonë u regjistrua një zjarr i përmasave të mëdha, i cili dogji disa hektarë pyje me pisha, duke shkaktuar dëme të konsiderueshme në mjedis.
