09/12/2025
Në një ceremoni të veçantë të mbajtur sot, u bë hapja zyrtare e rrugës së re që lidh zonat historike të Hotit dhe Grudës, një projekt i shumëpritur që forcon lidhjet infrastrukturore dhe zhvillimin lokal të kësaj treve.
Në inaugurim morën pjesë Kryetari i Komunës së Tuzit, z. Lindon Gjelaj, Kryetari i Kuvendit, z. Fadil Kajoshaj, përfaqësues të diasporës shqiptare, z. Mark Ivezaj dhe z. Nikollas Sinishtaj, si dhe Kryetari i Bashkësisë Lokale Kshev, z. Lindon Sinishtaj.
Rruga është realizuar përmes një bashkëpunimi shembullor mes Komunës së Tuzit dhe diasporës, e cila prej vitesh mbështet projektet zhvillimore në vendlindje. Projekti përfshin:
Mbi 550,000 € të financuara nga Komuna e Tuzit për asfaltimin dhe sistemimin e infrastrukturës;
180,000 € të kontribuara nga diaspora për hapjen e rrugës dhe përgatitjen e terrenit.
Kjo ndërhyrje infrastrukturore jo vetëm përmirëson lëvizjen e banorëve të zonës, por ndikon drejtpërdrejt në zhvillimin ekonomik, duke lehtësuar qarkullimin, komunikimin dhe lidhjen mes dy prej zonave më të rëndësishme historiko-kulturore të Malësisë.
Kryetari Gjelaj dhe përfaqësuesit institucionalë shprehën mirënjohje të thellë për diasporën, e cila edhe këtë herë dëshmoi përkushtimin e saj ndaj zhvillimit të Malësisë.
