26/05/2026
🎓📚 “Festa e Abetares”, emocione dhe buzëqeshje në klasën I A
Një atmosferë plot emocion, gëzim dhe krenari ka shoqëruar zhvillimin e “Festës së Abetares” nga nxënësit e klasës I A, të cilët festuan një nga momentet më të rëndësishme të jetës së tyre shkollore.
Nën përkujdesjen dhe përkushtimin e mësueses Klodiana Shaholli, vogëlushët sollën një program artistik me këngë, recitime, vjersha dhe interpretime të ndryshme, duke dëshmuar se tashmë kanë hedhur me sukses hapat e parë drejt dijes dhe botës së librit.
“Festa e Abetares” mbetet një nga kujtimet më të bukura për çdo fëmijë, pasi shënon momentin kur nxënësit njohin shkronjat e para dhe hapin rrugën drejt leximit dhe shkrimit.
Prindër, mësues dhe të ftuar vlerësuan punën dhe përgatitjen e nxënësve, si edhe përkushtimin e mësueses gjatë gjithë vitit shkollor.
Urime nxënësve të klasës I A për këtë arritje të bukur dhe suksese në rrugën e dijes!
