06/06/2026
Forcimi i Veprës së Kampeve Kishtare në Fokus të Konferencës Kombëtare në Greqi
Me bekimin e Kryepiskopit të Tiranës, Durrësit dhe Gjithë Shqipërisë imzot Joanit, një përfaqësi e Kishës Orthodhokse Autoqefale të Shqipërisë mori pjesë në Konferencën IV Kombëtare të Drejtuesve dhe Bashkëpunëtorëve të Kampeve Kishtare, e cila u zhvillua nga 3 deri më 5 qershor 2026 në ambientet e kampit të Mitropolisë së Halkidhës, në Lutra Edhipsu, Greqi.
Konferenca u organizua nga Sinodi i Kishës së Greqisë dhe mblodhi hierarkë, klerikë, katekistë, drejtues dhe bashkëpunëtorë kampesh nga të gjitha Mitropolitë e vendit, me qëllim shkëmbimin e përvojave dhe forcimin e veprës edukative e shpirtërore të kampeve kishtare.
Përfaqësia e Kishës sonë përbëhej nga At Grigor Pelushi, drejtues i Rinisë dhe përgjegjës i kampeve rinore; At Nikolla Kodheli, përgjegjës i kampit të dytë të djemve; Klajdi Dervishi, teolog dhe nënkryetar i kampit të parë të djemve; priftëreshë Irena Davidi, katekiste dhe anëtare e stafit të kampeve; si dhe Elisabeta Shqau, katekiste dhe përgjegjëse e kampit të dytë të vajzave.
Gjatë punimeve të konferencës u trajtuan sfidat, përvojat dhe perspektivat e veprës së kampeve kishtare në kohën tonë, duke u theksuar roli i tyre i rëndësishëm në edukimin shpirtëror dhe formimin e fëmijëve e të rinjve. Pjesëmarrësit nënvizuan se kampi kishtar nuk është thjesht një hapësirë aktivitetesh dhe argëtimi, por një bashkësi e gjallë ku kultivohen vlerat e bashkëjetesës, përgjegjësisë, shërbimit, lutjes dhe jetës në Krishtin.
Vëmendje e veçantë iu kushtua rolit të drejtuesve dhe bashkëpunëtorëve të kampeve, duke theksuar se shërbimi i tyre ka karakter të thellë pedagogjik dhe shpirtëror. U nënvizua nevoja për shembull personal, dashuri, përulësi, përgjegjësi dhe formim të vazhdueshëm, pasi fëmijët ndikohen më shumë nga dëshmia e jetës së edukatorëve sesa nga fjalët apo udhëzimet teorike.
Në diskutime u trajtuan gjithashtu marrëdhënia me familjen, sfidat që sjell përdorimi i teknologjisë dhe telefonave celularë, krijimi i një klime besimi dhe sigurie, si dhe rëndësia e dëgjimit aktiv dhe e qasjes individuale ndaj çdo fëmije. Pjesëmarrësit theksuan se nuk ekzistojnë “fëmijë problematikë”, por situata dhe sjellje që kërkojnë kujdes, dashuri dhe mbështetje pedagogjike.
Një tjetër temë me rëndësi ishte sfida demografike, e cila u paraqit si një nga çështjet më serioze të shoqërisë bashkëkohore. Në këtë kuadër, u vu në dukje kontributi që kampet kishtare mund të japin në kultivimin e vlerave familjare, të përgjegjësisë dhe të respektit për jetën.
Programi i konferencës përfshiu gjithashtu sesione kushtuar muzikës, këngës, valleve tradicionale dhe veprimtarive artistike si mjete edukimi dhe formimi. U prezantuan mënyra konkrete të përdorimit të tyre në jetën e kampit, duke treguar se ato ndihmojnë në forcimin e frymës së bashkëpunimit, identitetit kulturor dhe përcjelljen e mesazheve shpirtërore.
Po ashtu, u theksua rëndësia e jetës liturgjike në kamp, pjesëmarrjes së fëmijëve në adhurim, rrëfim dhe Kungim, si dhe nevoja që ata të përjetojnë drejtpërdrejt jetën e Kishës dhe kuptimin e saj shpirtëror.
Në përfundim të konferencës, pjesëmarrësit shprehën mirënjohjen e tyre për të gjithë klerikët, drejtuesit, vullnetarët dhe bashkëpunëtorët që shërbejnë me përkushtim në kampet kishtare. U theksua se themeli i çdo veprimtarie mbetet Krishti dhe se suksesi i kampit matet jo vetëm nga organizimi i tij, por mbi të gjitha nga dashuria, kujdesi dhe gjurmët shpirtërore që lë në zemrat e fëmijëve dhe të rinjve.
Takimi u mbyll me urimin që vepra e kampeve kishtare të vazhdojë të zhvillohet dhe të forcohet, duke ofruar gjithnjë e më shumë mundësi edukimi, formimi dhe përjetimi të jetës së krishterë për brezat e rinj.
Nga: At Nikolla Kodheli
