Syunik News

14/05/2026

ՀՀ քննչական կոմիտեի Սյունիքի մարզային քննչական վարչությունը նոր ղեկավար ունի։

Վարչության պետ է նշանակվել Վոլոդյա Մուրադյան-ը, որը համակարգում ունի շուրջ 17 տարվա աշխատանքային փորձ։

Վոլոդյա Մուրադյանը ծնվել է 1987 թվականի հունվարի 24-ին՝ Շիրակի մարզի Ձիթհանքով գյուղում։ 2009 թվականին ավարտել է ՀՀ ոստիկանության ակադեմիայի իրավագիտության ֆակուլտետը, ինչից հետո աշխատանքի է անցել իրավապահ համակարգում։
Նրա մասնագիտական ուղին մեծապես կապված է եղել ինչպես Շիրակի, այնպես էլ Սյունիքի մարզերի քննչական մարմինների հետ։ Տարբեր տարիների զբաղեցրել է քննիչի, ավագ քննիչի, ՀԿԳ քննիչի և ՀԿԳ ավագ քննիչի պաշտոններ։

2024 թվականից նա զբաղեցնում էր ՀՀ քննչական կոմիտեի Սյունիքի մարզային քննչական վարչության պետի տեղակալի պաշտոնը, իսկ այժմ արդեն նշանակվել է վարչության ղեկավար։
Ծառայողական գործունեության ընթացքում Մուրադյանը պարգևատրվել է գերատեսչական տարբեր խրախուսանքներով՝ ծառայողական պարտականությունները բարեխղճորեն իրականացնելու համար։

Ամուսնացած է, ունի երեք երեխա։

14/05/2026

ՀՀ քննչական կոմիտեի Սյունիքի մարզային քննչական վարչության պետի տեղակալ է նշանակվել Հովհաննես Սարգսյանը։ Այս մասին տեղեկացնում են ՀՀ քննչական կոմիտեից։

Հովհաննես Սարգսյանը ծնվել է 1987 թվականի մարտի 16-ին՝ Սյունիքի մարզի Կապան քաղաքում։
Աշխատանքային գործունեությունը սկսել է 2008 թվականին՝ որպես ՀՀ ոստիկանության քննչական գլխավոր վարչության Սյունիքի մարզի քննչական բաժնի քննիչ։ 2010-2014 թվականներին աշխատել է նույն բաժնի ավագ քննիչի պաշտոնում։

2014 թվականից գործունեությունը շարունակել է ՀՀ քննչական կոմիտեի Սյունիքի մարզային քննչական վարչությունում՝ նախ որպես ՀԿԳ քննիչ, ապա՝ 2017-2026 թվականներին՝ ՀԿԳ ավագ քննիչ։

2008 թվականին ավարտել է ՀՀ ոստիկանության ակադեմիայի իրավագիտության ֆակուլտետը։

Ծառայողական պարտականությունները բարեխղճորեն կատարելու համար խրախուսվել է գերատեսչական տարբեր պարգևներով։

13/05/2026

Սյունիքը, որը բոլորը սկսում են բացահայտել հիմա

13/05/2026

Գորիսում շարունակվում է սոցիալական բնակարանների կառուցման գործընթացը

Քաղաքի Գետափնյա թաղամասում իրականացվում են եռահարկ բնակելի շենքի ամրացման աշխատանքներ, որի նպատակն է կառուցել լրացուցիչ՝ չորրորդ հարկ։ Նախագծի շրջանակում նոր բնակարանները կհատկացվեն բնակարան չունեցող ընտանիքներին։

Այս փուլում արդեն ավարտվել են շենքի հիմքերի ամրացման աշխատանքները, և մեկնարկել է տանիքի ապամոնտաժման ու չորրորդ հարկի կառուցման գործընթացը։

Syunik News

11/05/2026

Մեղրիում առաջին անգամ անցկացվեց կտրտովի տոլմայի փառատոն

Մայիսի 10-ին Սյունիքի մարզի Մեղրի համայնքում առաջին անգամ անցկացվել է կտրտովի տոլմայի փառատոն՝ համախմբելով համայնքի բնակիչներին, հյուրերին և հայկական ավանդական խոհանոցը գնահատող բազմաթիվ մարդկանց։

Փառատոնը կազմակերպվել էր Մեղրի համայնքի ղեկավար Խաչատուր Անդրեասյանի նախաձեռնությամբ և համայնքապետարանի աշխատակազմի աջակցությամբ։ Միջոցառումը, ըստ կազմակերպիչների, նպատակ ուներ ոչ միայն ներկայացնել հայկական խոհանոցի ավանդական ուտեստներից մեկը, այլև պահպանել ու հանրահռչակել ազգային մշակութային արժեքները։

Տոնի ընթացքում մասնակիցները ներկայացրել են կտրտովի տոլմայի պատրաստման առանձնահատկությունները, ինչպես նաև ազգային ուտեստների բազմազանությունը։ Մեղրիում ձևավորված տոնական մթնոլորտը ուղեկցվել է երգ ու պարով, ազգային երաժշտությամբ և մշակութային ծրագրերով։

09/05/2026

«Ուժեղ Հայաստանը» վաղը Գորիսում կներկայացնի իր նախընտրական ծրագիրը

Մայիսի 10-ին «Ուժեղ Հայաստանը» քաղաքական ուժը նախընտրական հանդիպում կանցկացնի Գորիս քաղաքում։

📍 Հանդիպման վայրը՝ Գորիս, Անկախության 30/1 հասցե («Գորիս Էլեկտրոնիքս»-ի հարևանությամբ)
Ժամը՝ 14:00
Քաղաքական ուժը հրավիրում է գորիսեցիներին մասնակցել հանդիպմանը։

«Սյունիք Նյուզ»-ը կշարունակի իրազեկել բոլոր քաղաքական ուժերի նախընտրական քարոզարշավների հանդիպումների ժամանակացույցը։

07/05/2026

Նիկոլ Փաշինյանին նախընտրական այցերի ժամանակացույցը Սյունիքում՝

Այսօր`մայիսի 8-ին

10:00 — Գորայք
11:00 — Անգեղակոթ
12:00 — Բռնակոթ
12:40 — Սիսիան
15:00 — Կոռնիձոր
15:50 — Տեղ
16:50 — Խնձորեսկ
18:00 — Գորիս
19:30 — Շինուհայր

«Սյունիք Նյուզ»-ը կշարունակի իրազեկել բոլոր քաղաքական ուժերի նախընտրական քարոզարշավների հանդիպումների ժամանակացույցը։

Syunik News

06/05/2026

05/05/2026

Երկուշաբթի դատարանը կորոշի Առուշ Առուշանյանի գործը

Այսօր՝ մայիսի 5-ին, Հակակոռուպցիոն դատարանում՝ դատավոր Տիգրան Դավթյանի նախագահությամբ, քննվել է Գորիսի համայնքապետ Առուշ Առուշանյանի գործը։

Քննությունից հետո դատարանը հեռացել է խորհրդակցական սենյակ՝ Առուշ Առուշանյանի պատիժը ազատազրկմամբ փոխարինելու հարցով որոշում կայացնելու նպատակով։ Որոշումը կհրապարակվի երկուշաբթի օրը։

Գործը Հակակոռուպցիոն դատարան է փոխանցվել Վճռաբեկ դատարանի որոշումից հետո, որով բեկանվել էր Վերաքննիչ դատարանի որոշումը՝ կապված Առուշ Առուշանյանի պատիժը ազատազրկմամբ փոխարինելու վերաբերյալ բողոքների մասնակի բավարարման և դրա արդյունքում պատիժը երեք ամսով խստացնելու հետ։ Վճռաբեկ դատարանը արձանագրել էր դատավարական խախտում և գործը վերադարձրել նոր քննության՝ Հակակոռուպցիոն դատարան, որտեղ էլ այսօր, դատավոր Տիգրան Դավթյանի նախագահությամբ, իրականացվել է քննություն։

03/05/2026

Աղմուկ՝ առանց փաստերի. ո՞վ է պատասխանատու բանակի ֆինանսավորման համար

Երեկվանից մամուլում ակտիվորեն շրջանառվում է մի թեմա, ըստ որի՝ Հատուկ բանակային կորպուսի հրամանատար Արմեն Գյոզալյանը, իբր, չի վճարում 40.000 դրամ։ Տեղեկությունը լայն տարածում է գտել և դարձել քննարկման առարկա՝ առանց հստակ փաստական հիմնավորման։

Ի գիտություն բոլոր նրանց, ովքեր նման պնդումները կարող են ընդունել որպես փաստ․ կորպուսի հրամանատարը աշխատավարձ «տվող» կամ «պահող» անձ չէ։ Զինվորականների ֆինանսավորումն իրականացվում է բացառապես պետական բյուջեի շրջանակում՝ համապատասխան կառույցների միջոցով։ Հրամանատարը, ինչպես բոլոր զինծառայողները, ստանում է իր հասանելիք աշխատավարձը՝ սահմանված կարգով։

Ինչ վերաբերում է զորամասերում պայմաններին, զինծառայողների մաքրությանը և լոգանք ընդունելու հնարավորություններին, «Սյունիք Նյուզը» կապ է հաստատել Արմեն Գյոզալյանի հետ։ Վերջինս կտրականապես հերքել է տարածվող լուրերը՝ ընդգծելով, որ բանակում մաքրությունն ու հիգիենան ծառայության հիմնարար սկզբունքներից են։ Նրա խոսքով՝ այսօր զինծառայողների շրջանում նման խնդիրների առկայությունը չի հաստատվում։

Ստեղծված իրավիճակը ևս մեկ անգամ ցույց է տալիս՝ որքան կարևոր է չստուգված տեղեկությունները չդարձնել հանրային կարծիք ձևավորող գործոն։ Բանակին վերաբերող յուրաքանչյուր թեմա պահանջում է առավելագույն պատասխանատվություն և ճշգրտություն։

01/05/2026

Մայիսի 1-ը աշխարհում նշվում է որպես աշխատանքի և ստեղծարարության արժևորման օրերից մեկը՝ հիշեցնելով, որ յուրաքանչյուր առաջընթացի հիմքում կանգնած է նվիրված ու հետևողական մարդը։

Այս յուրահատուկ օրը նաև խորհրդանշական է Գորիսի համար, քանի որ այն համընկնում է քաղաքի աշխատասեր կանանցից մեկի՝ Վիննեթ Գորիս Զարգացման հիմնադրամի տնօրեն Ռուզաննա Տոռոզյանի ծննդյան օրվա հետ։
Ռուզաննա Տոռոզյանը այն մարդկանցից է, ում գործունեությունը սերտորեն կապված է աշխատանքի, զարգացման և համայնքային արժեքների ամրապնդման հետ։ Նրա ղեկավարությամբ իրականացված ծրագրերը նպաստել են Գորիսի զարգացմանը, ակտիվ հասարակական կյանքի ձևավորմանը և նոր նախաձեռնությունների կյանքի կոչմանը։

Աշխատանքը նրա համար պարտականություն չէ, այլ առաքելություն՝ ուղղված համայնքի բարեկեցությանը և առաջընթացին։

Այս խորհրդանշական օրը առիթ է ևս մեկ անգամ գնահատելու նրա ներդրումը և շնորհավորելու ծննդյան առթիվ՝ մաղթելով առողջություն, անսպառ եռանդ և նոր հաջողություններ՝ ի նպաստ Գորիսի և Սյունիքի զարգացման։
Winnet Goris Development Foundation