18/09/2025
تعلیم کا چراغ بجھنے لگا
سوہاوہ کا واحد سرکاری کالج آؤٹ سورسنگ کے قریب
سوہاوہ (پریس ریلیز) : گورنمنٹ ایسوسی ایٹ کالج سوہاوہ کو آؤٹ سورسنگ کرنے کی تیاریاں جاری ہیں جس پر طلبہ، والدین اور اساتذہ شدید پریشانی کا شکار ہیں۔ یہ کالج 1990 میں اس وقت کے سیاسی رہنما راجہ خالد حسین مرحوم نے افتتاح کیا تھا۔ آج بھی ان کا نام علاقے میں زندہ ہے کیونکہ انہوں نے اپنے دور میں بے شمار ترقیاتی کام کرائے اور عوامی مسائل حل کیے۔
اطلاعات کے مطابق نجی کالجوں کے مالکان نے گورنمنٹ کالج سوہاوہ میں دلچسپی لینا شروع کر دی ہے اور متعدد دورے بھی کیے جا چکے ہیں تاکہ ادارے کو خرید کر کاروباری بنیادوں پر چلایا جا سکے۔ خدشہ ظاہر کیا جا رہا ہے کہ اگر یہ واحد سرکاری کالج آؤٹ سورسنگ کر دیا گیا تو غریب طلبہ کے لیے اعلیٰ تعلیم کے دروازے بند ہو جائیں گے۔
سوہاوہ کی عوام نے سابق ایم پی اے راجہ اویس خالد سے مطالبہ کیا ہے کہ وہ اپنے والد کے نقشِ قدم پر چلتے ہوئے غریب بچوں کے تعلیمی مستقبل کے تحفظ کے لیے کردار ادا کریں۔ اسی طرح علاقہ مکینوں نے ایم این اے و وزیر ریلوے راجہ بلال اظہر کیانی اور ایم پی اے سید رفعت محمود زیدی سے بھی اپیل کی ہے کہ وہ فوری طور پر اسمبلی میں آواز بلند کریں تاکہ غریب طلبہ کا حق چھینا نہ جا سکے۔
عوام کا کہنا ہے کہ گورنمنٹ کالج سوہاوہ علاقے کے تعلیمی مستقبل کی امید ہے اور اسے پرائیویٹ سیکٹر کے حوالے کرنا دراصل غریب طبقے کے ساتھ ناانصافی ہوگی۔
منجانب: راحت چوہدری، ممبر پریس کلب سوہاوہ
