11/06/2026
Minister Wyatt-Ras: Inversion den poder di compra ta fortalece bienestar, dignidad y calidad di bida
ORANJESTAD – Ministerio di Salubridad, Asunto Social, Cuido di Adulto Mayor y Maneho di Adiccion ta sigui traha pa fortalece e bienestar y seguridad social di nos comunidad. Como parti di e decisionnan tuma recientemente door di Gabinete AVP-Futuro, varios paso concreto ta wordo implementa pa proteha e poder di compra di e ciudadano Arubiano y brinda sosten adicional na e gruponan cu mas mester dje.
Minister Wyatt-Ras a enfatisa cu e inversionnan aki ta mas cu un medida economico.
"Ora nos ta papia di poder di compra, nos no ta papia solamente di placa. Nos ta papia di bienestar, di dignidad humano y di e posibilidad pa nos hendenan biba cu seguridad. Un pensionado cu tin mas entrada disponibel, un famia cu por cubri gastonan escolar y un persona cu limitacion cu ta haya mas sosten, tur esakinan ta traduci den un comunidad mas fuerte y mas saludable."
Mas sosten pa nos grandinan
Durante e prome aña di gobernacion, Gabinete AVP-Futuro a implementa diferente medida pa fortalece e posicion financiero di nos pensionadonan. Pensionadonan soltero a beneficia di un aumento di Afl. 500 pa luna den nan pensioen AOV, mientras pensionadonan casa a beneficia di un aumento di Afl. 900 pa luna.
Ademas, e prima AZV riba e prome Afl. 30.000 di entrada anual pa pensionadonan a baha di 5% pa 0%, permitiendo cu mas entrada ta keda disponibel pa gastonan diario y necesidadnan esencial. E medidanan aki ta contribui directamente na mas seguridad financiero y mas trankilidad pa nos personanan di edad avansa.
Mas apoyo pa famianan vulnerabel
Gobierno ta sigui fortalece e red di proteccion social pa famianan cu mas mester sosten.
E bijstand basico a aumenta di Afl. 450 pa Afl. 600 pa luna, representando un aumento di mas cu 33%.
Na mes momento, e schoolkindertoeslag a aumenta te Afl. 250 pa cada mucha, como apoyo adicional pa material escolar y schoolgeld. E inversionnan aki ta yuda famianan cubri gastonan esencial y ta duna muchanan mas oportunidad pa desaroya nan potencial den un ambiente stabiel y sigur.
Aumento pa personanan cu limitacion
Como parti di e esfuersonan pa proteha e grupunan mas vulnerabel den nos comunidad, Gobierno a dicidi aumenta e beneficio pa personanan cu limitacion di Afl. 1.080 pa Afl. 1.180 pa luna.
E aumento aki ta reconoce e gastonan adicional cu hopi persona cu limitacion y nan famianan ta enfrenta diariamente y ta contribui na mas independencia, participacion y inclusion social.
Sosten pa personanan cu salario minimo
Un otro decision importante ta e aumento di reparatietoeslag pa trahadonan cu salario minimo y esnan cu entrada te cu Afl. 2.500 pa luna. Cu efecto for di 1 di augustus, aproximadamente 18.262 persona, cu representa 37,4% di cuerpo laboral, lo beneficia di un promedio di Afl. 100 adicional pa luna pa yuda compensa e costo di bida.
E medida aki ta representa un paso concreto pa fortalece e posicion financiero di miles di famianan Arubiano cu ta traha tur dia pa bay dilanti.
Inversion den hende y comunidad
Pa e Ministerio, e medidanan aki ta representa mas cu cifra. Nan ta inversionnan den dignidad humano, salud, oportunidad y participacion social. Ora nos grandinan tin mas seguridad financiero, ora famianan por cubri gastonan esencial, ora personanan cu limitacion haya mas sosten y ora trahadonan cu entrada modesto haya alivio, nos ta construi un comunidad mas fuerte, mas resiliente y mas saludabel.
E medidanan aki ta mustra cu bienestar social no ta solamente un gasto, sino un inversion den salud, participacion social y fortalesa comunitario. Di e manera aki, Gobierno ta contribui directamente na un sociedad mas inclusivo, unda personanan por participa activamente y mantene un bon nivel di bienestar durante tur etapa di bida.
Ministerio di Salubridad, Asunto Social, Cuido di Adulto Mayor y Maneho di Adiccion ta reafirma su compromiso pa sigui traha na fabor di un sociedad sano, resiliente y inclusivo, den cual cada ciudadano tin e oportunidad pa biba cu dignidad y bienestar durante tur etapa di bida.
