30/07/2025
🇦🇼Nos hendenan
Baseball
Bernard Teunis Hoftijzer
Tenchi
*20/8/1927 +11/08/2007
Ridder in de Orde van Oranje Nassau
Bemard T. Hoftijzer, mihor conoci como Tenchi, kende a luci den e deportenan di baseball, futbol, softball y cricket.
Den baseball
Tenchi tabata den cuminzamento di su carera un gran pitcher. E tabata tambe na e mes momento un di e bateadoman mas temible di nos baseball. E prome hazaña di Tenchi, kende tabata tin apenas 17 aña di edad, tabata dia 15 di Juli 1945 ora cu lanzando pa e ekipo di Cafenol e ta poncha 11 bateador y permiti apenas tres hit pa gana e gran ekipo di Botica San Lucas 3-2. Dos siman despues Tenchi a bolbe luci ponchando 16 contra e ekipo Battery 814 di e ehercito
Mericano cu te na e momentonan ey tabata na di dos lugar di e campeonato. E biaha aki si a perde e wega 6-1, ya cu su compañeronan a lage na caya cometiendo siete error.
E siguiente aña Tenchi a pasa hunga pa e
ekipo di Dodgers cu na 1947 a bira pa prome biaha campeon di e campeonato di Lago Sport Park. Tenchi a resulta e hungador mas valioso y e pitcher cu mas wega gana.
Den e wega decisivo dia 20 di Juni Tenchi den un duelo di pitcher contra Nel Harms a blankea Coca Cola 4-0 pa duna Dodgers nan di dos titulo. Na Februari 1950 Tenchi a permiti 4 hit y poncha 10 pa blankea Baby Ruth 1-0 den e wega decisivo di e campeonato y hiba Dodgers na nan tercer titulo consecutivo. E campeonato aki e tabata e manager di Dodgers y un biaha mas Tenchi a resulta e pitcher mas ganador y tambe a keda na di tres lugar den bateo. Na 1950 Tenchi a hunga tanto den e campeonato na Playa como esun di Lago Sport Park. Na LSP e titulo a bay pa Baby Ruth pero na Playa si Tenchi a logra e titulo cu su pitcheo y bateo pa e ekipo di Sint Thomas Boys. Na 1951 a bolbe logra e titulo di Lago Sport Park cu Dodgers. Na Februari 1952Tenchi den di siete inning ta conecta un homerun cu un coredor na base
pa yuda Arubay Nel Harms gana Curaçao 2-1. Na luna di Mei di e aña aki A.B.B.A. a organiza un tomeo entre Aruba, Curaçao, Venezuela y Republica Dominicana.
Den e prome wega contra Curaçao Tenchi tabata tirando un hitter pa siete inning largo. Cu e score empata na dos, despues di e prome out den di ocho e ta permiti e prome hit. Riba algun base por bola y error e ta perde e wega 7-2. E mesun aña aki e a participa cu e seleccion di Aruba na e campeonato mundial di baseball amateur cu a tuma lugar na Cuba. E siguiente aña Tenchi a participa na su di dos campeonto mundial cu tabata na Venezuela. For di 1954 pa 1961 Tenchi a bira cinco biaha mas campeon di
AA cu e ekipo di Dodgers cu despues a bira Amstel y mas despues Zenith.
Na1955 a participa na e weganan Pan Americano na Mexico cu e seleccion di Antiyas. Cu e seleccion Antiyano a participa tambe na aña 1959 na e weganan Centro American y di
Caribe na Caracas y aki nan Tenchi a keda como lider den base roba.
Na 1963 Tenchi (400) a perde e titulo di bateo contra Jossito Muyale (404) cu a bati dos hit den e wega di desempate pa e prome lugar entre Esso y Heineken.
Na 1965 a keda subcampeon cu e ekipo di Verf Antiyana y a participa na e prome Copa Antiyano di baseball. Den e serie aki Tenchi, kende ya tabata tin 38 aña di edad, a demostra su clase y a bati tres homerun. E aña aki tambe a participa na e campeonato mundial di baseball cu a tuma lugar na Colombia. Despues cu a retira como hungador Tenchi a bira coach y tambe manager den nos baseball AA.
Futbol
Den nos futbol tambe Tenchi a destaca como hungador. For di 1947 pa 1953 a hunga den e clase mayor di nos futbol pa Aruba Jrs.
Cu e ekipo aki a bira biaha campeon y tres biaha subcampeon di Aruba. Na 1947 a debuta den nos seleccion local y a hunga por
lo menos seis wega internacional. Na aña
1953 a hunga pa e seleccion di Aruba cu a gana e tomeo di cuatro pais organiza pa A.V.B. Mas despues den e mesun aña aki a hunga cu e seleccion di Antiyas den e campeonato Centro Americano y di Caribe di Futbol na Costa Rica.
Den softball tambe Tenchi tabata un excelente lanzador y bateador. E hazaña mas grandi cu a logra como pitcher tabata e no hit no rub cu a tira contra Caribe na September di 1949.
Autor: Desconoci
Compila pa Roberto G. Croes
Nos Historia Nos Herencia
