20/07/2025
Bu gün “Bakılı oğlanlar” Şən və Hazırcavablar Klubunun keçmiş kapitanı və millət vəkili Anar Məmmədxanovun doğum günüdür.
***
Anar Məmmədxanov 20 iyul 1970-ci ildə Bakıda anadan olub. 1987-ci ildə Bakı şəhər 160 saylı məktəbi bitirib. Həmin il Azərbaycan Dövlət Universitetinin mexanika-riyaziyyat fakültəsinə daxil olub, 1992-ci ildə oranı bitirib.
17 yaşı olanda İradə Məmmədxanlıya aşiq olur. Onlar elə həmin il evlənməyə cəhd edirlər, ancaq Anarın atası, yaxınları onların evlənməyinə razı olmurlar. Sevgililər illər sonra - Anarın 23 yaşı olanda evlənirlər. Bu evlilikdən onun 3 övladı – 2 qızı və 1 oğlu dünyaya gəlib.
O, 1991-ci ildən Bakı Şən və Hazırcavablar Klubunun prezidenti, "Bakılı oğlanlar" komandasının kapitanı olub. 1992, 1993, 1995-ci illərdə Şən və Hazırcavablar Klubları arasında MDB çempionu, 2000-ci ildə XX əsr çempionu olub. Anar Ermənilərin at oynatdığı Rusiyanın KVN səhnəsində onların kürəyini yerə vurur. Özünün yaratdığı komanda ilə qalib olur.
Anar Azərbaycanın ilk gənc millət vəkili olub və ardıcıl üç çağırış milli məclisə deputat seçilib.
Anar Məmmədxanov həm də media kapitanı idi. Həm müxalifət, həm iqtidar, həm də xalqa bu media orqanında eyni tribuna verilirdi. O, hətta bəzi sosial və siyasi çətinliklərlə qarşılaşan vətəndaşların problemləri ilə şəxsən maraqlanır, həmin problem həll olunana qədər prinsipiallıq göstərirdi. Media orqanını yaratmaqda ən ümdə məqsədi isə düşməni informasiya müharibəsində məğlub etmək idi.
Sabiq deputat, “Bakılı oğlanlar” Şən və Hazırcavablar Klubunun keçmiş kapitanı Anar Camal oğlu Məmmədxanov 2011-ci il aprelin 23-də 40 yaşında vəfat edib və 2-ci Fəxri Xiyabanda dəfn olunub.
Ruhu şad olsun!
