Kinoinfo, Bülbül pr. 30, Baku (2026)

10/06/2026

AZƏRBAYCAN KİNOTƏNQİDÇİLƏR VƏ KİNOŞÜNASLAR GİLDİYASININ SƏDR MÜAVİNİ, KİNOTƏNQİDÇİ HACI SƏFƏROV AVROPA FİLM AKADEMİYASININ ÜZVÜ SEÇİLİB

Kinotənqidçi, ssenarist Hacı Səfərov Avropa Film Akademiyasına (European Film Academy - EFA) tamhüquqlu üzv kimi dəvət olunub. Qurumun bununla bağlı qərarı 10 iyun tarixində rəsmən elan edilib.
Avropa Film Akademiyası 1988-ci ildə isveçli rejissor İnqmar Berqmanın ilk prezidentliyi ilə 40 aparıcı kino xadimi tərəfindən təsis edilib. Təşkilatın əsas məqsədi Avropa kinosunun maraqlarını qorumaq, sənayenin inkişafını dəstəkləmək və qlobal miqyasda təbliğ etməkdir. Akademiya hər il Avropa Kino Mükafatlarını (European Film Awards) təqdim edir və müxtəlif ölkələrdən olan kino peşəkarlarını (rejissorlar, prodüserlər, tənqidçilər və s.) öz ətrafında birləşdirir.
Hazırda Hacı Səfərov Azərbaycan Respublikasının Kino Agentliyində (ARKA) Beynəlxalq əməkdaşlıq, media və təbliğat şöbəsində aparıcı məsləhətçi kimi fəaliyyət göstərir. Eyni zamanda, Azərbaycan Kinotənqidçilər və Kinoşünaslar Gildiyasının sədr müavinidir. Hacı Səfərov daha əvvəl Kann, Berlin, San-Sebastian kimi nüfuzlu festivallarda akkreditasiya olunmuş kinotənqidçi kimi iştirak edib. “Talents Sarajevo”, “FIPRESCI Varşava Layihəsi” kimi proqramlara seçilib, Varşava Film Festivalında “Gənc FIPRESCI” bölməsində, Baykanur Beynəlxalq Film Festivalında jüri kimi iştirak edib. 2025-ci ildə çəkilmiş “Tərsinə kölgələr” filminin quruluşçu rejissoru və ssenaristidir.
Qeyd edək ki, Hacı Səfərovla birlikdə daha 3 nəfər azərbaycanlı kino xadimi - rejissor Kamran Qasımov, aktyor Orxan İskəndərli, aktyor Nadir Əliyev də EFA-ya üzv seçiliblər.

Daha ətraflı kinoinfo.az-da

10/06/2026

2026-CI İL ÜZRƏ “POST-PRODAKŞN MƏRHƏLƏSİNDƏ OLAN FİLM LAYİHƏLƏRİNƏ DƏSTƏK MÜSABİQƏSİ”NİN QALİBLƏRİ ELAN OLUNDU

Mədəniyyət Nazirliyinin tabeliyində fəaliyyət göstərən Azərbaycan Respublikasının Kino Agentliyi tərəfindən həyata keçirilən və yerli kino sənayesində böyük maraqla qarşılanan müsabiqənin qiymətləndirmə mərhələsi uğurla başa çatıb. Bədii Keyfiyyətə Nəzarət Komissiyasının rəylərinə əsasən, müsabiqəyə təqdim olunan 38 layihədən 19 film layihəsi qalib adını qazanıb!
Milli kinematoqrafiyamızın inkişafı, müstəqil prodüser mərkəzləri arasında sağlam rəqabət mühitinin yaradılması və birgə film istehsalı imkanlarının genişləndirilməsi məqsədilə keçirilən müsabiqədə dəstək alacaq 19 layihənin növlər üzrə statistikası belədir:

Qalib filmlərin kateqoriyaları:
Tammetrajlı bədii – 3 film
Qısametrajlı bədii – 3 film
Tammetrajlı bədii-sənədli – 1 film
Qısametrajlı bədii-sənədli – 1 film
Tammetrajlı sənədli – 4 film
Qısametrajlı sənədli – 2 film
Qısametrajlı animasiya – 2 film
Qısametrajlı süni intellekt – 3 film

Qalib gələn bütün kino şirkətlərini və yaradıcı heyətləri təbrik edir, layihələrini uğurla tamamlayıb ekranlara daşımalarında müvəffəqiyyətlər arzulayırıq!

ARKA - Azərbaycan Respublikasının Kino Agentliyi

10/06/2026

“Mənim evim” film layihəsi 66-cı Krakov Film Festivalı çərçivəsində təşkil olunan “CEDOC Market” proqramında iştirak edib. Krakov Film Festivalı sənədli kino sahəsində Avropanın ən nüfuzlu festivallarından biri, onun tərkibində keçirilən “CEDOC Market” isə beynəlxalq prodüserlər, fondlarla birbaşa əməkdaşlıq imkanları yaradan mühüm sənaye platformasıdır.
Filmin süjet xətti 86 yaşlı Vəlinin ömrünün son günlərində keçmiş evini və yaxınlarının məzarını son dəfə ziyarət etmək arzusundan bəhs edir. Filmin prodüseri Nicat Dadaşov, rejissoru Ülviyyə Əhmədovadır. Azərbaycan Respublikasının Kino Agentliyi tərəfindən layihənin “CEDOC Market”də iştirakı üçün Nicat Dadaşov və Ülviyyə Əhmədovaya səfər dəstəyi göstərilib, iştirak haqqı isə Azərbaycan Kinematoqrafçılar İttifaqı tərəfindən ödənilib.
Azərbaycan sənədli kinosunun inkişafı, eyni zamanda layihələrin beynəlxalq potensialının artırılması üçün inkişaf proqramlarında iştirakı prioritet sahələrdən biridir.

ARKA - Azərbaycan Respublikasının Kino Agentliyi Azərbaycan Kinematoqrafçılar İttifaqı Nijat Dadashov Ulviyya Ahmadova

09/06/2026

İyunun 7-də Azərbaycan Kinematoqrafçılar İttifaqının təşkilatçılığı ilə AKİ üzvü rejissor Maarif Məhərrəmbəylinin 65 illik yubileyi “Nizami” Kino Mərkəzində qeyd olunub.
Yubiley tədbirində rejissorun həmkarları, dostları iştirak ediblər, təbrik və ürək sözlərini yubilyara çatdırıblar. Tədbirdən sonra Maarif Məhərrəmbəylinin qısametrajl filmləri tədbir iştirakçılarına təqdim olunub.
Maarif Məhərrəmbəyli 26 may 1961-ci ildə Bakıda dünyaya göz açıb. Azərbaycan Dövlət Mədəniyyət və İncəsənət Universitetində təhsil alıb. 1978-ci ildən “Azərbaycanfilm” kinostudiyasında fəaliyyət göstərməyə başlayıb, əvvəlcə fəhlə, sonra rejissor assistenti olaraq çalışıb. “Azərbaycanfilm”in istehsalı olan bir çox filmlərdə – “Qəribə adam”(1979, tammetrajlı bədii film) – rejissor assistenti, “Solmaz bir bahar kimi” (1979, qısametrajlı sənədli film) – rejissor assistenti, “Qocalar, qocalar” (1982, tammetrajlı bədii film) – rejissor assistenti, “Park” (1983, tammetrajlı bədii film) – rejissor assistenti, “Qoca palıdın nağılı” (1984, tammetrajlı bədii film) – rejissor assistenti, “Dağlı məhəlləsi” (2004, qısametrajlı sənədli televiziya filmi) – rejissor, ssenari müəllifi, “Üzü gündoğana tikilən evlər” (2004, qısametrajlı sənədli televiziya filmi) – rejissor, “Bakı toyları” (2005, qısametrajlı sənədli televiziya filmi) – rejissor, “Axırıncı doza” (2006, qısametrajlı sənədli film) – rejissor, “İlk qurbanlıq” (2006, qısametrajlı sənədli televiziya filmi) – rejissor, “Sönməz ocaq” (2006, qısametrajlı sənədli film) – rejissor, “Bakı bağları” (2007, sənədli serial) – rejissor, “Sınaq meydanı”(2008, qısametrajlı sənədli televiziya filmi) – rejissor, “Azərbaycan qalaları” (2008-2009, sənədli serial) – rejissor, “Dənizlə danışan adam” (2010, qısametrajlı sənədli televiziya filmi) – rejissor, “Hər kim yüz il yaşamasa” (2010, sənədli serial) – yaradıcı heyətin üzvü, “Azərbaycan xalçaları” (II) (2010-2011, sənədli serial) – rejissor, “Nurlu gözlərin xeyirxah işığı”(2012, qısametrajlı sənədli televiziya filmi) – rejissor, “Zamanın burulğanında” (2012, tammetrajlı sənədli televiziya filmi) – inzibatçı, aktyor, “Bakı döyüşü” (2014, qısametrajlı sənədli televiziya filmi) – rejissor, “Xəzər Atlantidası” (II) (2014, qısametrajlı sənədli televiziya filmi) – rejissor, “İki cəbhə arasında”(2014, qısametrajlı sənədli televiziya filmi) – rejissor, “Karvanın izi ilə…” (2014, qısametrajlı sənədli televiziya filmi) – rejissor və s. çalışıb.

Maarif Maqerrambeyli

08/06/2026

“MƏNƏ BƏNZƏR ADAM”: KEÇMİŞDƏN QAÇA BİLMƏYƏN İNSANIN HEKAYƏSİ

“Rakurs Film-Media” tərəfindən istehsal olunan dram janrlı ekran əsəri tamaşaçıları Qarabağ müharibələrinin ağrılı izləri və şəxsi yaddaşın dərin qatları ilə üz-üzə qoyacaq.
130 dəqiqəlik filmin rejissoru və həmmüəllifi İsmayıl Səfərəlidir. Ssenari üzərində İsmayıl Səfərəli ilə yanaşı İsmayıl İman da çalışıb. Filmin operatoru Veronika Solovyeva, rəssamı isə Turan Yusifovadır. Ekran əsərində əsas rolları Elnur Babayev, Həsən Nəcəfov, Qurban İsmayılov və Elnur Nəcəfov canlandırırlar. Filmin prodüserləri Nazim Hüseynov, Fariz Əhmədov və İsmayıl Səfərəlidir.
Film Azərbaycan Respublikasının Kino Agentliyinin dəstəyi ilə çəkilib.
Filmin süjeti Birinci Qarabağ müharibəsindən sonra Parisə köçərək orada yaşayan azərbaycanlı kino professoru Azərin həyatından bəhs edir. İkinci Qarabağ müharibəsindən sonra o, kütləvi məzarların axtarışı məqsədilə illər sonra vətənə qayıdır. Otuz il əvvəl lentə aldığı görüntülər vasitəsilə Azər həm tərk etdiyi torpaqları yenidən kəşf edir, həm də keçmişin ağır xatirələri ilə üzləşir.
Layihənin müharibə sonrası yaddaş, itki və insanın doğma torpağa bağlılığı kimi mövzuları emosional və vizual dildə təqdim edəcəyi bildirilir.

Filmin rejissoru İsmayıl Səfərəli layihə ilə bağlı fikirlərini və ekran əsərinin yaranma prosesini kinoinfo.az saytına verdiyi müsahibədə bölüşüb.
Daha ətraflı kinoinfo.az-da
ARKA - Azərbaycan Respublikasının Kino Agentliyi Fariz Ahmedov

07/06/2026

“SÜKUT İÇİNDƏ ADDIMLAR” FİLMİ MÜKAFAT ALDI!
Bakı Media Mərkəzinin istehsalı olan, rejissor Fariz Əhmədovun “Sükut içində addımlar” adlı tammetrajlı sənədli filminin Avropanın ən qədim kino tədbirlərindən biri sayılan 66-cı Krakov Film Festivalının müsabiqəsində dünya premyerası baş tutub. Festivalın “Milli müsabiqə” bölməsində yarışan film “Ən yaxşı təsvir rejissoru” mükafatı əldə edib.
Polşa Təsvir Rejissorları Cəmiyyətinin təqdim etdiyi və mPupil.pl tətbiqinin yaradıcısı olan InfoCenter tərəfindən təsis edilmiş “Ən yaxşı təsvir” üçün 5000 PLN məbləğində mükafat "Sükut içində addımlar" filminə görə Mateş Çixnovskiyə təqdim edilib.
Münsiflər heyəti öz qərarını belə əsaslandırıb:
“Münsiflər heyəti təkcə cəsarəti və intizamı deyil, hər şeydən əvvəl həssaslığı yüksək qiymətləndirir. Bu kadrlar qışqırmır, üstünlük təşkil etmir, əksinə, qəhrəman qadınları diqqətlə izləyir. Onlar bizi elə bir dünyaya aparır ki, burada mina sahəsinin mənzərəsi həyatın metaforasına çevrilir”.
Azərbaycan Respublikası Mədəniyyət Nazirliyi, ARKA və Polşa Kino İnstitutunun maliyyə dəstəyi ilə Bakı Media Mərkəzi, Drygas Film Production və Polşa Televiziyası (TVP) tərəfindən birgə istehsal oluan filmin baş prodüseri Bakı Media Mərkəzinin prezidenti Arzu Əliyeva, ko-prodüseri Vita Jelakeviçut (Polşa), prodüseri Orman Əliyev, ssenari müəllifləri Fariz Əhmədov və İsmayıl İman, quruluşçu operatoru Mateuş Çuxnovskidir. Festival həm "Oskar" mükafatı, həm də Avropa Film Akademiyası üçün kvalifikasiya xarakteri daşıyır.
Festivalda filmin prodüseri Orman Əliyev, icraçı prodüserləri Nəzrin Qaracayeva və Cəmilə Qəhrəmanova, rejissoru Fariz Əhmədov, quruluşçu operatoru Mateuş Çuxnovski iştirak ediblər.
Fariz Əhmədovun və Cəmilə Qəhrəmanovanın festivalda iştirak xərcləri Azərbaycan Respublikasının Kino Agentliyi (ARKA) tərəfindən dəstəklənib.

05/06/2026

UNESCO İRSİNDƏN BÖYÜK EKRANA: “KÖÇƏRİ” BEYNƏLXALQ FORUMDA
Rejissor Nurlan Həsənlinin “Köçəri” (“The Shepherd’s Son”) tammetrajlı bədii-sənədli film layihəsi 30-cu Baltic Sea Docs beynəlxalq ko-produksiya pitçinq forumunun seçilmiş layihələri sırasına daxil olub. Forum 2026-cı ildə Latviyanın paytaxtı Riqa şəhərində keçiriləcək.
Filmdə hadisələr 13 yaşlı Əlinin taleyi üzərindən təqdim olunur. Ənənəvi köçəri çobanlıq həyatının tədricən yoxa çıxdığı bir dövrdə atasının onun üçün arzuladığı fərqli gələcəyə baxmayaraq, Əli məktəbdən ayrılaraq ailəsinin nəsillərdir davam etdirdiyi köçəri həyatına qoşulur. Ata və oğul Böyük Qafqaz dağlarına doğru mövsümi köç zamanı həm sərt təbiət şəraiti, həm də iqlim dəyişikliyi və sosial-iqtisadi dəyişikliklərin yaratdığı çətinliklərlə qarşılaşırlar.
Film UNESCO-nun Qeyri-Maddi Mədəni İrs siyahısına daxil edilən “Köç yolu” ənənəsinin qorunması və gələcək taleyi məsələlərinə də toxunur.
Layihənin müəllifi də elə rejissorun özü, Nurlan Həsənlidir. Filmin prodüseri Emil Nəcəfov, kreativ prodüseri Türkan Hüseyn, təsvir rejissoru İman İmanov, ikinci operatoru Əli Rza, səs rejissoru Ramal Rüstəm, montaj rejissoru Asif İsgəndərli, icraçı prodüseri Ruhin Mirzəyev, xətt prodüseri isə Fariz Muradxanlıdır.
Baltic Sea Docs Baltik dənizi regionu, Şərqi Avropa və Qafqaz ölkələrindən olan yaradıcı sənədli film layihələrinə həsr edilmiş beynəlxalq pitçinq və koproduksiya platformasıdır. 1997-ci ildən keçirilən forum Baltik regionunda sənədli kino sahəsində ən nüfuzlu sənaye tədbirlərindən biri sayılır və Latviya Milli Film Mərkəzi tərəfindən təşkil olunur.
Hazırda istehsal mərhələsində olan film Azərbaycan Respublikası Kino Agentliyinin dəstəyi ilə ərsəyə gəlir.
Qeyd edək ki, Baltic Sea Docs hər il Şərqi və Mərkəzi Avropadan 150-dən çox kino mütəxəssisini bir araya gətirən və sənədli film layihələrinin maliyyələşməsi ilə beynəlxalq yayım imkanlarının genişləndirilməsinə yönəlmiş nüfuzlu forumlardan biridir.

Daha ətraflı kinoinfo.az-da

ARKA - Azərbaycan Respublikasının Kino Agentliyi

04/06/2026

“SÜKUT İÇİNDƏ ADDIMLAR” FİLMİNİN KRAKOVDA DÜNYA PREMYERASI BAŞ TUTUB!

Bakı Media Mərkəzinin istehsalı olan, rejissor Fariz Əhmədovun “Sükut içində addımlar” adlı tammetrajlı sənədli filminin Avropanın ən qədim kino tədbirlərindən biri sayılan 66-cı Krakov Film Festivalının müsabiqəsində dünya premyerası baş tutub. İyunun 2-də keçirilən nümayiş festival iştirakçıları tərəfindən maraq və alqışlarla qarşılanıb.
Azərbaycan Respublikası Mədəniyyət Nazirliyi, ARKA və Polşa Kino İnstitutunun maliyyə dəstəyi ilə Bakı Media Mərkəzi, Drygas Film Production və Polşa Televiziyası (TVP) tərəfindən birgə istehsal oluan filmin baş prodüseri Bakı Media Mərkəzinin prezidenti Arzu Əliyeva, ko-prodüseri Vita Jelakeviçut (Polşa), prodüseri Orman Əliyev, ssenari müəllifləri Fariz Əhmədov və İsmayıl İman, quruluşçu operatoru Mateuş Çuxnovskidir.
Rejissor Fariz Əhmədovun və Cəmilə Qəhrəmanovanın bu mötəbər festivalda iştirakı Azərbaycan Respublikasının Kino Agentliyi (ARKA) tərəfindən dəstəklənib.
Filmin nümayişi ilə bağlı “Modern Times Review” da Berenika Balcerin resenziyası da yayımlanıb. Qeyd edək ki, “Modern Times Review” sənədli filmlər və kitablar üzrə ixtisaslaşmış, Avropa mərkəzli rəqəmsal və çap jurnalı platformasıdır.
Berenika Balcerin resenziyasında Fariz Əhmədovun “Steps in Silence” filmi Qarabağda mina təmizləmə işləri aparan qadınlardan ibarət qrupun gündəlik həyatını və fəaliyyətini müşahidəçi üslubda təqdim edən sənədli film kimi qiymətləndirilir. Müəllif filmin qəhrəmanlıq ritorikasından uzaq duraraq səbir, peşəkarlıq və müharibədən sonrakı bərpa prosesini sakit və təsirli şəkildə göstərdiyini vurğulayır. Resenziyaya görə, filmin ən güclü tərəfi səs tərtibatı və qadın minatəmizləyənlərin torpağı addım-addım həyata qaytarmaq missiyasını təbii və dramatizasiyasız təqdim etməsidir.

Məqalənin linki: https://www.moderntimes.review/steps-in-silence/

ARKA - Azərbaycan Respublikasının Kino Agentliyi Baku Media Center Fariz Ahmedov Jamila Gahramanova

03/06/2026

“Azərbaycanın mədəni irsinə səyahət” silsiləsindən növbəti layihə – Azərbaycan tarixinin qədim və sirli qatlarına işıq salan “Azıx mağarası” tammetrajlı sənədli filmi tezliklə tamaşaçılara təqdim olunacaq.

Filmdə Azərbaycanın cənub-qərbində yerləşən Azıx mağarasının qədim tarixdəki yeri bütövlükdə insan növünün yaranması və planetə yayılması kontekstində araşdırılır.

Filmdə MONREPOS Arxeoloji Tədqiqatlar Mərkəzinin eksperti Joao Manuel Marreiros, Algarve Universitetinin qədim tarix və arxeologiya mütəxəssisi Eduard Paixao, Britaniyanın Durham Universitetinin arxeoloqu, professor Pol Barri Pettitt, Kanadanın Viktoriya Universitetindən professor April Nouell, Ankara Universitetindən arxeoloq, professor Harun Taşkıran, AMEA-nın baş elmi işçisi, Azıx tədqiqat qrupunun rəhbəri Əjdər Babazadə, eləcə də digər tanınmış mütəxəssislərin Azıx mağarası, onun insanlığın tarixdə oynadığı rol haqqında fikirləri yer alıb.

“Azıx mağarası” tammetrajlı sənədli filmini Mədəniyyət Nazirliyinin tabeliyində fəaliyyət göstərən Azərbaycan Respublikasının Kino Agentliyinin dəstəyilə “Alpha Prodüksiyon və Ajans Hizmetleri” şirkəti istehsal edib.

Ətraflı kinoinfo.az-da

01/06/2026

Azərbaycan Kinematoqrafçılar İttifaqının 26 may tarixli konfransı gərgin anlarla keçdi. Heç bir təzyiqə baxmayaraq Azərbaycan Kinematoqrafçılar İttifaqının üzvləri öz mövqelərini bildirdilər. Konfransın emosiya dolu anları Rüfət Bəndəliyev və Sərxan Əsgərovun obyektivlərində.

Azərbaycan Kinematoqrafçılar İttifaqı

Kinoinfo

10/06/2026

10/06/2026

10/06/2026

09/06/2026

08/06/2026

07/06/2026

05/06/2026

04/06/2026

03/06/2026

01/06/2026

Address

Website

Alerts

Shortcuts

Share

Category