Doktorinfo.AZ (2025)

26/07/2025

Yuxu yalnız istirahət deyil, həm də sağlamlığa birbaşa təsir edən elmdir. Kardioloq və yuxu mütəxəssisi Nataliya Zolotaryova bildirir ki, yatdığımız poza həzmə, nəfəs almağa və dərimizin vəziyyətinə təsir edə bilər.

Sol böyrü üstə yatmaq həzm üçün faydalıdır – mədənin anatomik yerləşimi sayəsində qıcqırma və reflü riski azalır. Amma çiyin və bud nahiyəsində təzyiq, üzün yastığa sürtünməsi kimi mənfi tərəfləri də var. Bu, "yuxu qırışları" yarada bilər.

Beli üstə yatmaq onurğa və dəri üçün ideal sayılır – bel və boyun nahiyəsində yük azalır, üz yastığa dəymədiyi üçün qırış riski də az olur. Amma bu vəziyyətdə xorultu və nəfəsin dayanması (apnoe) halları yarana bilər.

Qarnı üstə yatmaq isə ən problemli pozadır – boyuna və döş qəfəsinə təzyiq artır, nəfəs alma çətinləşir və dəri problemləri yarana bilər.

Mütəxəssis tövsiyə edir:

Qıcqırma varsa, sol böyrü üstə yatın.

Qırışlardan qorunmaq üçün beli üstə yatın.

Xoruldama varsa, beli üstə yatmaqdan çəkinin.

Dəri sağlamlığı üçün ipək yastıq üzlükləri seçin.

Nəticə: Hər kəs üçün ideal yuxu pozası fərqlidir – öz orqanizminizi dinləyin və uyğun pozanı tapın.

26/07/2025

Yetkin bir insan gündə hər kiloqram bədən çəkisinə uyğun olaraq təxminən 1 qram yağ qəbul etməlidir. Bu miqdar Alzheimer, ürək-damar xəstəlikləri və zəif immunitetdən qorunmağa kömək edir.

Dietoloq Karmen Alba bildirir ki, qida rasionunda yetərli yağ olması ürəyi qoruyur, xroniki iltihab riskini azaldır və bədənin vitaminləri udma qabiliyyətini artırır. Sağlam yağlar — xüsusilə balıq, avokado, qoz-fındıq, toxum və keyfiyyətli bitki yağlarında olan doymamış yağlar — idrak qabiliyyətinin qorunmasına da dəstək verir.

Trans yağlar (fast food, qənnadı məhsulları, qırmızı ət) isə məhdudlaşdırılmalıdır.

Yağ ehtiyacı yaş, cins, fiziki aktivlik və sağlamlıq vəziyyətinə görə dəyişir. Güc məşqləri ilə məşğul olan insanlarda yağ yandırma və mənimsəmə qabiliyyəti daha yüksək olur.

26/07/2025

Qızmar yay günlərində dondurma ilə isti çay arasında seçim etmək çətin ola bilər. Dondurma sürətli sərinlik hissi verir, əhvalı yüksəldir və enerji verir. Amma çox soyuq olduğu üçün boğaz ağrısı, badamcıq iltihabı yarada bilər. Üstəlik, yüksək şəkər və yağ miqdarı səbəbindən arıqlamaq istəyənlər üçün risklidir.

İsti çay isə bədəni tənzimləyir, tərləmə yolu ilə daxili temperaturu tarazlayır və susuzluğu daha yaxşı yatırır. Yaşıl və bitki çayları xüsusilə antioksidantlarla zəngindir və həzmi rahatladır. Lakin çox isti içildikdə narahatlıq və hətta yemək borusunda zədələnmə yarada bilər.

Sərinləmək üçün sağlamlığı yerində olanlar arada bir dondurma yeyə bilərlər. Amma yayda orqanizmin su balansını qorumaq üçün isti və ya ilıq çay içmək daha ağıllı seçimdir – xüsusilə təzyiq və boğaz problemi olanlar üçün.

24/07/2025

Uşağın immunitetini gücləndirmək üçün aşağıdakı tədbirləri tətbiq edə bilərsiniz:

Bəslənmə:
Zəngin və balanslı pəhriz: Təzə meyvə və tərəvəzlər, tam taxıllar, protein mənbələri (ət, balıq, yumurta, paxlalılar) və sağlam yağlar (avokado, zeytun yağı, qoz) immuniteti gücləndirir.
Vitaminlər və minerallar: C vitamini (portağal, kivi, brokoli), D vitamini (günəş işığı, balıq, yumurta), A vitamini (yerkökü, ispanaq) və sink (ət, dənli bitkilər) əhəmiyyətlidir.
Probiyotiklər: Yoğurt, kefir kimi probiyotiklər bağırsaq florasını yaxşılaşdıraraq immuniteti dəstəkləyir.

Fiziki aktivlik:
Müntəzəm hərəkət uşağın immunitetini gücləndirir. Yaşına uyğun olaraq, oyun, gəzmək, idman və açıq hava fəaliyyətləri vacibdir.

Yaxşı yuxu:
Uşaqların kifayət qədər və keyfiyyətli yuxu alması, orqanizmin güclü immun cavab verməsinə kömək edir. Yuxu müddəti yaşa görə dəyişir (məsələn, 3-5 yaşda gündə 10-13 saat).

Təmizlik və gigiyena:
Əllərin yuyulması, düzgün banyo vərdişləri və ümumi gigiyena immuniteti gücləndirmək üçün vacibdir.
Eyni zamanda, uşağı soyuqdəymə və infeksiyalardan qorumaq üçün izdihamlı yerlərdən uzaq tutmaq da faydalıdır.

Stresin azaldılması:
Uzun müddət stress immuniteti zəiflədə bilər. Uşağın stress səviyyəsini azaltmaq və yaxşı bir əhval-ruhiyyə təmin etmək vacibdir.

Həkim nəzarəti və vaksinasiya:
Uşağın müvafiq vaxtlarda vaksinasiya olunması, infeksiyalara qarşı qorunmasını təmin edir. Həmçinin, uşağın həkimlə mütəmadi olaraq müayinəsi immunitetin güclənməsinə dəstək olar.

Bu sadə, lakin effektiv tədbirlər uşağın immunitet sistemini gücləndirməyə kömək edəcək.

23/07/2025

Metro çıxışlarında, hərəkət intensivliyi olan yerlərdə hisə verilmiş qida məhsulları satılır. Bu məhsullar çox zaman qablaşdırılmadan, açıq şəkildə müştərilərə təklif olunur. Təbii ki, həmin məhsulların üzərində heç bir məlumat olmur.

Mövzu ilə bağlı Bizim.Media-ya danışan Qida təhlükəsizliyi Hərəkatının rəhbəri, Sağlam qidalanma mütəxəssisi Məhsəti Hüseynova deyir ki, bu gün müxtəlif yerlərdə hisə verilmiş balıq, ət və pendir satılır:

"Qoxusuna görə çox insan bu məhsullara həvəs göstərir. Yaxşı olar ki, bu məhsulları alarkən onun mənşəyinə, istehsal və son istifadə tarixinə fikir verilsin. Bütün hallarda keyfiyyətli şəkildə hisə verilmiş məhsullardan istifadə məqsədəuyğundur. Amma bir çox hallarda bu məhsullar ev şəraitində, kustar üsullarla hazırlanır. Belə məhsullar daha çox təhlükə mənbəyidir".

Müsahib qeyd edib ki, əsasən bu məhsullar hazırlanarkən quru ağacların budaqlarından istifadə edilməlidir:

"Amma çox zaman bu qayda gözlənilmir. Quru taxtadan, mebel qırıntılarından, laklı-boyalı talaşalardan istifadə edilir. Belə oduncaqdan istifadə edərkən ortaya zərərli maddələr çıxır ki, bu da bir başa hazırlanan məhsullara çökür. Bu da zəhərlənmə və sağlamlıq problemləri yaradır. Eyni zamanda hisə verilmiş məhsulları uzun müddət saxlamaq üçün kimyəvi maddələrdən, konservantlardan, rəngləndiricilərdən istifadə edirlər ki, bu da insan sağlamlığı üçün təhlükəlidir. Ona görə də adı çəkilən məhsulları alarkən çox diqqətli olmaq lazımdır.

Hisə verilmiş məhsullar tez xarab olan qidalar sırasındadır.

Bu səbəbdən məhsulların üzərində istehsal və son istifadə tarixi hökmən olmalıdır. Ən əsası soyuq şəraitdə saxlanılmalıdır. Ümumiyyətlə bu qidaların hazırlanma, soyudulma və saxlanılma prosesinə ciddi riayət edilməlidir.

Belə olmayan təqdirdə həmin məhsulların tərkibində mikroorqanizmlər çoxala bilər ki, bu da ağır zəhərlənməyə və digər sağlamlıq problemlərinə gətirib çıxara bilər. Hətta xərçəng riskini artırar.

Bundan əlavə, bu məhsullar hazırlanarkən duzdan çox istifadə edilir. Bu da orqanizmdə duz-su balansının pozulmasına, hiportaniya və böyrək xəstəliyinin yaranmasına səbəb olur. Həssas, allergiyaya meylilli, həzm problemləri olan insanlarda hisə verilmiş qidaları qəbul edərkən müəyyən həzm problemləri, qarın nayihəsində ağrı, şişkinlik və baş ağrısı yarana bilir".

23/07/2025

Bəzi hallarda bədənimizdə baş verən dəyişikliklər gizli sağlamlıq problemlərinin xəbərçisidir. Ürək xəstəlikləri də çox zaman ilkin mərhələlərdə özünü birbaşa deyil, dolayı yolla göstərir. Mütəxəssislər xəbərdarlıq edir ki, dırnaq və dodaqlarda müşahidə olunan bəzi dəyişikliklər ürək-damar sistemi ilə bağlı problemlərə işarə edə bilər.

Əgər dodaqlarınız davamlı olaraq solğun və ya göy rəngə çalırsa, bu, qanınızda oksigen səviyyəsinin aşağı düşdüyünü göstərə bilər. Belə vəziyyətlər adətən ürəyin oksigenlə zəngin qanı orqanizmin bütün hissələrinə effektiv şəkildə çatdırmaması ilə bağlı olur. Xüsusilə, bu simptom fiziki fəaliyyət zamanı güclənirsə, ürək çatışmazlığı riskini artırır.

Dırnaqların rənginin solması, göyərməsi və ya şəffaflığının itməsi qan dövranının zəiflədiyini göstərir. Həmçinin "baraban çubuğu sindromu" adlanan vəziyyətdə dırnaqların ucları qalınlaşır və aşağıya doğru əyilir. Bu hal uzunmüddətli oksigen çatışmazlığı ilə əlaqələndirilir və ciddi ürək və ya ağciyər problemlərinin göstəricisi ola bilər.

Əgər yuxarıda qeyd olunan əlamətlərlə yanaşı tez yorulma, nəfəs darlığı, sinə ağrısı və ya ayaqlarda şişkinlik kimi simptomlar da varsa, bu, ürək çatışmazlığının daha da irəlilədiyini göstərə bilər.

Bu kimi əlamətlər müşahidə edildikdə, mütləq şəkildə həkimə müraciət edilməli, ürək fəaliyyəti yoxlanılmalıdır. Erkən diaqnoz və müdaxilə ürək xəstəliklərində həyati əhəmiyyət daşıyır.

Bədənimizin verdiyi siqnallara biganə qalmayaq – sadə görünən dəyişikliklər ciddi bir problemin xəbərçisi ola bilər.

23/07/2025

Ənənəvi Azərbaycan süfrələrinin sevimlisi olan mürəbbə illərlə "qonaqpərvərliyin simvolu" kimi təqdim olunub. Xüsusilə səhər yeməklərinin vazkeçilməzi olan bu qida sağlamlıq üçün heç də faydalı sayılmır.

Mürəbbənin tərkibindəki şəkər miqdarı çox vaxt şirniyyat məhsullarını belə geridə qoyur. Bu, ilk növbədə diabet riski olan şəxslər üçün təhlükədir. Hətta tam sağlam insanlarda da insulin müqavimətini artırır, qan şəkərini dalğalandırır.

Mürəbbənin "yapışqan" quruluşu və şəkər tərkibi diş minasını zədələyərək tez çürüməyə səbəb olur. Uşaqlarda bu, daha da sürətlə inkişaf edir. Mütəxəssislərin fikrincə gecə mürəbbə yeyib yatmaq, səhəri diş ağrısı ilə açmaq deməkdir. Bundan başqa, mürəbbə yüksək kalorili məhsuldur.

Pəhriz saxlayanlar, artıq çəkidən əziyyət çəkənlər və qaraciyəri yağlanan şəxslər üçün əlavə risk yaradır. Şəkərin parçalanması üçün mədəaltı vəz daha çox insulin istehsal edir, bu da orqanizmə davamlı stress deməkdir.

Uzun müddət saxlanılan və ya düzgün qaynadılmayan mürəbbələrdə küf, qıcqırma, hətta botulizm riski yarana bilər. Xüsusilə açıldıqdan sonra soyuducuda saxlanılmayan mürəbbələr görünməz təhlükə mənbəyinə çevrilə bilər.

22/07/2025

Mütəxəssislər bildirirlər ki, uşaqlarda xoruldama, xüsusilə də güclü və davamlı olduqda sağlamlıq, davranış və həyat keyfiyyətinə mənfi təsir göstərə bilər. Son araşdırmalar göstərib ki, hətta yüngül dərəcəli xoruldama belə təhlükəli nəticələrə səbəb ola bilər.

ABŞ-nin Boston şəhərində yerləşən "Brigham and Women"s Hospital" xəstəxanasının pulmonoloqu və epidemioloqu Syuzen Redlaynın sözlərinə görə, yuxuda nəfəsin pozulması və yuxu keyfiyyətinin aşağı olması orqanizmdə ciddi fizioloji dəyişikliklərə yol aça bilər.

Uşaqlarda xoruldama hansı problemlərə səbəb ola bilər?

Xoruldama bəzən tənəffüs yolları infeksiyaları və allergiyalar nəticəsində də baş verə bilər. Nəfəsin dayanması və oksigen səviyyəsinin enməsi hallarını ölçmək üçün "apnoe-hipopnoe indeksi" (AHİ) adlı göstəricidən istifadə olunur. Bu indeks böyüklərdə saatda 5-dən az nəfəs dayanmasını normal, 30-dan çox dayanmanı isə ağır vəziyyət kimi qiymətləndirir. Uşaqlarda isə orta-ağır vəziyyət artıq 10 nəfəs dayanması ilə müşahidə olunur.

Lakin araşdırmalar göstərib ki, uşaqlarda AHİ göstəricisi hər zaman vəziyyətin ciddiliyini əks etdirməyə bilər.

2023-cü ildə "Amerika Tibb Assosiasiyasının Jurnalı"nda dərc edilən bir klinik tədqiqatda 3–12 yaş arası 458 uşaqda yüngül yuxu tənəffüs pozuntuları (AHİ 0–3 arası) müşahidə olunub. Bu uşaqlardan yarısına badamcıqların çıxarılması əməliyyatı edilib, digər yarısı isə müşahidə altında saxlanılıb. Bir il sonra kognitiv qabiliyyətlərdə ciddi fərq olmasa da, əməliyyat olunan uşaqlarda diqqətlilik, sosiallaşma və emosional sabitlik baxımından müsbət dəyişikliklər qeydə alınıb. Həmçinin valideynlər uşaqlarının daha az yuxulu, daha enerjili və həyat keyfiyyətlərinin artdığını bildiriblər. Əməliyyat olunan uşaqlarda qan təzyiqi normaya düşüb, digərlərində isə yüksəlib.

Təxminən 12 min uşağın iştirak etdiyi iki yeni araşdırmada isə məlum olub ki, müntəzəm xoruldayan uşaqlar (təxminən 700 nəfər) qaydalara əməl etməkdə və dostluq əlaqələri qurmaqda çətinlik çəkirlər.

Bundan əlavə, alimlər bu uşaqlarda beynin davranışa nəzarət edən prefrontal qabığında hüceyrə itkisini də müşahidə ediblər.

Mütəxəssislər valideynlərə səslənərək bildirirlər ki, uşaqlarda xoruldama halını yüngül qəbul etmək olmaz və vaxtında tibbi müdaxilə vacibdir.

22/07/2025

ABŞ-nin Texas Universitetinin San Antonio Tibb Elmləri Mərkəzinin alimləri uzunmüddətli yuxunun - gecə 9 saat və daha çox yatmağın zehni funksiyaların zəifləməsi ilə əlaqəli ola biləcəyini müəyyən ediblər.

Alimlər bu qənaətə 1853 nəfərin məlumatlarını təhlil edərək gəliblər. Onlar ötən əsrin ortalarından bəri davam edən Framingham Heart Study adlı genişmiqyaslı kohort tədqiqatının iştirakçıları olublar. Nəticələr 27–85 yaş arası, insult və ya demensiya keçirməmiş şəxslərin müşahidəsinə əsaslanıb.

Araşdırma göstərib ki, uzun yuxu ümumi zehni qabiliyyətlərin, yaddaşın, vizual-məkan qavrayışının və idrak bacarıqlarının aşağı göstəriciləri ilə əlaqələndirilir. Bu geriləmə xüsusilə depressiya əlamətləri olan insanlarda özünü daha qabarıq göstərib – istər antidepressantlardan istifadə etsinlər, istərsə də etməsinlər.

Tədqiqatçılar bildiriblər ki, depressiyadan əziyyət çəkən insanların 90 faizi yuxuya getmək və ya oyanmaqda çətinlik yaşadıqlarını bildirir. Yeni araşdırmada iştirakçılar dörd qrupa bölünüblər: depressiya simptomlarının olub-olmamasına və antidepressant istifadəsinə əsasən. Ən kəskin zehni zəifləmə, həm uzun müddət yatan, həm də depressiya əlamətləri olan şəxslərdə müşahidə olunub - bu, müalicədən asılı olmayaraq qeydə alınıb.

Alimlər qeyd edirlər ki, bir çox beynəlxalq təşkilatların tövsiyələri dəyişməz qalır: yetkin şəxslər gündəlik olaraq 7–8 saat yatmalıdırlar. Bununla belə, yuxunun optimal müddəti insanın fərdi sağlamlıq xüsusiyyətlərinə əsasən müəyyənləşdirilməlidir.

22/07/2025

Alma sağlamlıq üçün çox faydalı meyvə sayılsa da, bəzi insanlar üçün ziyanlı və riskli hesab edilir. Dietoloqlar bildirir ki, bəzi xəstəliklər və vəziyyətlər zamanı alma yemək tövsiyə olunmur.

1. Mədə turşuluğu yüksək olanlar

Əgər qastrit, reflüks və ya mədə turşuluğu probleminiz varsa, xüsusilə turş alma növləri (yaşıl alma) sizin üçün təhlükəli ola bilər. Bu, mədədə yanma, ağrı və qaz yaranmasına səbəb ola bilər.

2. Şəkərli diabetdən əziyyət çəkənlər

Alma təbii şəkərlə zəngindir. Hərçənd ki, lif və vitamin baxımından faydalıdır, tip 2 diabet xəstələri alma istehlakını nəzarətli şəkildə və həkim məsləhəti ilə qəbul etməlidirlər. Xüsusilə şirin alma növləri qan şəkərini sürətlə yüksəldə bilər.

3. Allergiyası olan şəxslər

Almaya qarşı allergiyası olan insanlar üçün bu meyvə qızartı, qaşınma, boğazda şişkinlik və ya ağır hallarda tənəffüs çətinliyi yarada bilər. Bu vəziyyət daha çox çiy alma yedikdə ortaya çıxır.

4. Qıcıqlanmış Bağırsaq Sindromu (İBS) olanlar

Alma, fruktoza və sorbitol tərkibli olduğundan, qarın şişkinliyi, qaz və ishal kimi şikayətləri olan insanlar üçün uyğun deyil. İBS problemi yaşayan şəxslər alma yeyərkən diqqətli olmalıdır.

5. Böyrək problemləri olanlar

Almada kalium yüksək səviyyədədir. Bu da xroniki böyrək xəstəlikləri olan şəxslər üçün riskli ola bilər, çünki orqanizm artıq kaliumu çətin xaric edir.

21/07/2025

Yay fəslində bol-bol yeyilən bəzi meyvələrin təkcə sərinlik bəxş etmədiyi, həm də insan ömrünü uzatdığı elmi araşdırmalarla təsdiqlənib.

Qidalanma mütəxəssisləri və sağlamlıq tədqiqatçıları bildirirlər ki, müəyyən meyvələr antioksidantlarla zəngindir və orqanizmi hüceyrə səviyyəsində qoruyaraq yaşlanma prosesini ləngidir.

Budur, uzunömürlülüyə təsir edən 5 əsas yay meyvəsi:

Qarpız - Tərkibindəki likopen sayəsində ürək sağlamlığını qoruyur, xərçəng riskini azaldır. Eyni zamanda susuzluğu aradan qaldıraraq bədəni təmizləyir.

Alça - Orqanizmi toksinlərdən təmizləyir, C vitamini ilə immun sistemini gücləndirir. Eyni zamanda dəri üçün təbii kollagen qaynağıdır.

Ərik - Beta-karotin və A vitamini baxımından zəngindir, göz sağlamlığı və dəri hüceyrələrinin yenilənməsi üçün ideal seçimdir.

Gilas - Güclü antioksidant olan antosiyaninlə zəngindir, iltihabı azaldır və ürək damar sistemini dəstəkləyir. Araşdırmalar göstərir ki, gündə 1 stəkan gilasa yaxın istehlak ömrü uzadan faktor ola bilər.

Tut - Xüsusilə qara tut qan dövranını yaxşılaşdırır, xolesterini salır və yaddaş üçün faydalıdır. Alzheimer riskini azaldan meyvələr sırasında yer alır.

Mütəxəssislər qeyd edir ki, bu meyvələri rasiona əlavə etməklə yalnız daha sağlam yaşamaq deyil, eyni zamanda həyat keyfiyyətini artırmaq da mümkündür.

Qida terapevtləri də hesab edir ki, yay meyvələri bədənin təbii ehtiyaclarını qarşılamaqla yanaşı, uzunömürlülüyün açarı ola bilər. Təbii, təmiz və mövsümə uyğun meyvə istehlakı orqanizmin gənc və dinamik qalmasına böyük töhfə verir.

Elə bu gün bağçaya, bazara və ya supermarketə baş çəkin, sağlamlığınızı uzadan təbiətin bu möcüzələrini süfrənizdən əskik etməyin!

21/07/2025

Havaların həddindən artıq isti keçməsi fonunda kondisionerdən istifadə halları kəskin şəkildə artır. Lakin səhv istifadə sağlamlıq problemlərinə və enerjidən səmərəsiz istifadəyə səbəb ola bilər.

mütəxəssislər bildirirlər ki, kondisioner düzgün quraşdırılmadıqda və ya istifadə qaydalarına əməl edilmədikdə nəfəs yolları infeksiyaları, əzələ ağrıları, baş ağrısı və allergik reaksiyalar baş verə bilər.

Düzgün istifadə qaydaları aşağıdakılardır:

Temperatur fərqinə diqqət:

Kondisioner ilə otaq temperaturu ilə çöldəki hava arasındakı fərq 5-7 dərəcəni keçməməlidir. Mütəxəssislər bildirirlər ki, çox soyuq temperatur bədənin adaptasiya imkanlarını pozur və orqanizmdə şok reaksiyası yarada bilər.

Kondisionerin yerləşdiyi istiqamət:

Kondisionerin birbaşa insan bədəninə yönəlməsi tövsiyə edilmir. Soyuq hava axınının bilavasitə üzə, sinəyə və ya bel nahiyəsinə yönəlməsi əzələ tutulmalarına və sinir sıxışmalarına səbəb ola bilər.

Müntəzəm texniki baxış və filtrlərin təmizlənməsi:

Kondisionerin içində toplanan toz, kif və mikroorqanizmlər nəfəs yolu xəstəliklərinə yol aça bilər. Hər 2-3 ayda bir filtrlərin təmizlənməsi və ildə ən azı bir dəfə ümumi texniki baxışın aparılması vacibdir.

Ventilyasiya və hava dövranı:

Otaqda yalnız kondisioner işləməməli, eyni zamanda vaxtaşırı pəncərə açılaraq təbii havalandırma təmin edilməlidir. Bu, havanın durğunluğunu və oksigen çatışmazlığını aradan qaldırır.

Yuxu zamanı istifadə:

Kondisioneri gecə boyu eyni temperaturda saxlamaq əvəzinə, "Sleep mode" funksiyasından istifadə tövsiyə olunur. Bu rejim temperaturu tədricən artıraraq bədəni yüklənmədən qoruyur.

Enerji ekspertləri isə əlavə edirlər ki, kondisionerin çox aşağı temperaturda uzun müddət işləməsi enerji sərfiyyatını artırır və elektrik xərclərini yüksəldir. Daha səmərəli istifadə üçün enerji qənaətli rejimlərdən yararlanmaq və otağın izolyasiyasına diqqət yetirmək vacibdir.

Qeyd edək ki, kondisionerdən düzgün istifadə həm sağlamlıq, həm də iqtisadi baxımdan önəmlidir və yay aylarında həyat keyfiyyətini qorumağın əsas vasitələrindən biridir.

Doktorinfo.AZ

26/07/2025

26/07/2025

26/07/2025

24/07/2025

23/07/2025

23/07/2025

23/07/2025

22/07/2025

22/07/2025

22/07/2025

21/07/2025

21/07/2025

Address

Website

Alerts

Shortcuts

Share