12/07/2026
“Qələbənin Memarı: Cənab Ali Baş Komandan – 100 İllik İmza! Bənzərsiz Tarix” kitabından diskurs analizimdən bir neçə vacib cümlə..
İlham Əliyevin müraciətlərində milli birliyin, gücün və qətiyyətin diskursu hakim idi. Bu qürur, tarixi yaddaş və gələcəyə inam üzərində quruldu.
Cənab Prezidentimizin diskursu Aristotelin ritorik üçlüyündəki Logos (məntiq/bilik) prinsipinə əsaslanır. Onun çıxışlarında məhv edilən tankların, topların və hava hücumundan müdafiə sistemlərinin sayını detallı şəkildə sadalaması (17 oktyabr), diskursa “riyazi dəqiqlik” və güclü “obyektivlik” görüntüsü qazandırır. Bundan əlavə, Əliyevin açıqlamaları ilə cəbhədən yayımlanan dron görüntüləri arasındakı uyğunluq onun diskursiv legitimliyini və hegemon gücünü daha da möhkəmləndirir. Beləliklə, diskurs yalnız reallığı təmsil edən vasitə olmaqdan çıxaraq birbaşa reallığın özü kimi təqdim edilir. İlham Əliyevin dünya diplomatiya tarixinin akademiki kimi mövqeyi bu əsərdə bir daha əyani şəkildə görünür. Onun balanslı siyasəti, milli maraqları beynəlxalq hüquqla uzlaşdıran yanaşması və qətiyyətli liderliyi Azərbaycanın müasir tarixində dönüş nöqtəsi yaratdı. Digər tərəfdən, bu cür liderin yetişməsində Heydər Əliyev dühası və onun yaratdığı Heydər Əliyev məktəbi ümdə vacib rol oynadı. Bu məktəb dövlətçilik ənənəsini, milli ideyanı və strateji düşüncə tərzini formalaşdıraraq müasir Azərbaycanın siyasi xəttinə yön verdi.
