21/09/2025
CHILD DEDICATION
Thu masa: Kan Bawm Kristian Sakhua kal vima mi lakah hin, sakhua phung leh lam tampi kan nei. a kawhmi leh kan thulung zir hen hi kan phung leh lam khawm hi ai bang ver loh. Hi charin sungah lam chun, kan phung leh lam lakah kan chawng masa chem mi thilti kan hawng simhfiang hen a ti duan dan ding kan hawng tarlang at a si.
Simhfiangnak: Sap hawlh hen "Child Dedication" ti mi hi kan nih Bawm hawlh hen "Nau Min Ap" kan ti tawn. Thuk dauh hen kan naihtuah a si chun, a kawhtum mi taktak chu Nausem suakthar mi kha ap tinak mawh "Nau Ap" a k**k dauh. Mizo hawlh hen "Nau Hlan" ti hi kan Bawm hawlh hen "Nau Ap/Nau thar Ap" ti hen a dik dauh chem la. "Nau Min Ap" ti mi nih hin a nausem ngak hen a min kha kan ap dauh mi hawi a lang.
Bible Rel ding mi tla:
Nau Ap thuah - Exodus 13: 1-2;
Leviticus 12:1-8; 1 Samuel 1:19-28 leh Luke 2:21-34. Ngaksia zauhkhenh dan - Thufing 22:6, 23:13-14 leh Ephesi 6:4. Ngaksia tla Jisu sinah ruainak - Mathai 19: 13-15; Mark 10: 13-16. Fa a sung u zia - Luke 18:15-17; Sam 127:3-5.
Nausem Pathian sinah ap hi thil herh tak a siruangah Nu leh Pa a chang mi nih ngaithah lo ding hen kan a sintir a ngai a si.
A herhnak: Bible nih a sim rawh hawi bang hen, minung chu thlahtu tla sualnak ruangah thiamnak kan nei lo rawh. Lal David nih "khualonak lo dir hen ka um le, ka nu nih sual hen hawng ka pawi" ti hen a ti (Sam 51:5-6). Jisu nih Kraws ah hawng kan tlanhnak hi thiamlonak ting hen um rawh mi tla thiamnak kan a ting khonawlhnak ding hen a si.
Mi zeimaw nih, nausem tla bang an a thenhlimh, an sual lo van an kai hep la ti hen ngaihdan kan nei hi hi ngaihdan dik lo a si. Nu leh Pa ruangah thenhlimh leh thenhlimh lo ding a ngauh dauh a si (1 Korin 1:14).
Churuangah nausem tla leh, sia leh tha an theih lan kar sung zawng chu nu leh pa nih mawhphurhnak lian tak kan nei, Pathian vengnak ting ding hen a sinah kan ap hi kan ti ding reng a si.
A hun leh a aptu: A hun hi bitthliah hen sim kho a si lo. mahlam chu Juda tla danah nausem chu ni 8 ni ah bawlpu sin an kalpi tawn leh femtan hen apnak an nei hawi bang hen, a tuan lei hi atha. mi duh leh duhlo an nei nun chun nau ap hi a har ngai tawn.
Chun a aptu ding hi, mi zawzawng nih an ti kho ver loh, ap khotu ding ah kawhmi nih license/phalnak a pek mi nih chauh a ti ding a si.
Tiamhtuahnak: Rawngbawltu nih nau aptu dingah ruat a si mi a theih ka hen hi tla a tiamhtuah ding mi chu a si-
1. Nausem thawngthang.
2. A nu leh a pa.
3. Nausem min.
4. Certificate/Nau apnak cha.
Rawngbawl dan: Nau ap hi pumh hun sungah mang tawn mi a si ruangah, pumh ruitu nih a kawh nunah ti sawm hi atha. Mahlam chu Nausem zauhkhenh dan tla tha tak hen a simh ding a ngai ruangah hun dang hen mang kho hi duhrim a kai.
1. Rawngbawlnak chu mipi mai ah mawh pulpit tlang thawk hen mang ding a si. nausem min leh, a nu leh pa min ngelchel phuang ding a si, chu chu chanah phekte lak rin hen a put ding asi.
2. Bible tawite rel hen, thu tawi simnak nei hen, nau chu ap ding a si. nau chu a nu leh a pa nih a mai ah an hawng suakpi hi atha. chun nau ap liauah nu leh pa chu rawngbawltu lei ah mei hawih hen hen, mipi tla an dir ngelchel ding a si.
3. Rawngbawltu nih a nu tangka thawk hen nausem chu a lak kha a dawh lo ruangah, a nu nih a pasal rang a pek masa lai le, a pa thawk hen nausem chu rawngbawltu kawtah a lan lai.
THU SAM DAN
Nang..............................(nausem min lam ding) hi laikulh sualkhatnak ah na hawng suak le, sia leh tha na theih lanah na taksa leh na thlarau veng ding leh, na dam sung kar an rui ding hen Lalpa Jisu sinah ka nan ap.
Chun thlachamnak hen a zulh chawlh lai...
(Nausem ap ding mi chu pakhat ngak hen an tam chun, a tlunah mi hawi hen sam khawmsele an min lam hep ding a si lai).