09/09/2026
ဗန်းမော်မှ ပြန်ဆင်းလာသည့် စစ်သင်္ဘော ၂ စီး စင်းခန်းတံတားအနီး နစ်မြုပ်
(လေးမြို့၊ စက်တင်ဘာ ၉)
ကချင်ပြည်နယ်၊ ဗန်းမော်မြို့မှ ရွှေကူမြို့ဘက်သို့ ပြန်စုန်ဆင်းလာသည့် စစ်အုပ်စု၏ သင်္ဘော ၄ စီးကို စင်းခန်းတံတားအနီးတွင် KIA ပူးပေါင်းတပ်ဖွဲ့များက ကြားဖြတ်တိုက်ခိုက်ခဲ့ရာ သင်္ဘော ၂ စီး နစ်မြုပ်ပြီး ကျန် ၂ စီးမှာ ထိခိုက်ပျက်စီးမှုများကြောင့် ဝဲမရွာအနီး အရေးပေါ်ကမ်းကပ်ခဲ့ရကြောင်း သိရသည်။
နစ်မြုပ်သွားသည့် သင်္ဘောများမှာ နတ်ခုတ်ရွာနှင့် ဇင်းဘုံရွာအနီးတို့တွင် ဖြစ်ပြီး၊ သင်္ဘောတစ်စီး မီးလောင်ပေါက်ကွဲကာ မြစ်လယ်တွင် နစ်မြုပ်သွားသည့် ဗီဒီယိုမှတ်တမ်းလည်း ထွက်ပေါ်လာသည်။
အဆိုပါ သင်္ဘောများသည် မန္တလေးမှ ဗန်းမော်သို့ စစ်ကူနှင့် ရိက္ခာများ ပို့ဆောင်ပြီးနောက် ပြန်လည်ဆင်းလာသည့် သင်္ဘောအုပ်စုမှ ဖြစ်နိုင်ကြောင်း သိရသည်။ ထို့အပြင် ယနေ့နံနက်ပိုင်းတွင် ရွှေကူမြို့၌ ရပ်နားထားသည့် စစ်အုပ်စုသင်္ဘော ၄ စီးလည်း ဒရုန်းဖြင့် တိုက်ခိုက်ခံရပြီး ၂ စီး မီးလောင်ပျက်စီးခဲ့ကြောင်း သတင်းများအရ သိရသည်။
ဗန်းမော်–ရွှေကူဒေသအတွင်း စစ်ကူနှင့် ရိက္ခာများ ဖြည့်တင်းကာ မြေပြင်စစ်ကြောင်းများ ထိုးစစ်ဆင်နေခြင်းနှင့်အတူ မြစ်ကြောင်းတစ်လျှောက် တိုက်ခိုက်မှုများလည်း ဆက်လက်ဖြစ်ပွားနေကြောင်း သိရသည်။
လေးမြို့မီဒီယာ
ဓါတ်ပုံ - CJ
