27/11/2025
আগাজ বাত্তি উরানার গুণ
"নমো তস্স ভগবতো অরহতো সম্মাসম্বুদ্ধস্স" (৩বার)
আগাজ বাত্তি উরানার গুণ
-------------------------------
আনন্দ ভান্তে পিজোর গরের ও বুদ্ধ ভগবান,
পরানবলায় উদ্ধোর অবার কি কি আগে দান।
আওজ গরং মুই সিয়ানি শুনিবাত্তায়,
হুজুলি গরং ও গোজেন বুদ্ধো এক্কানা হবাত্তায়।
পিত্থিমি আ সাগরত্ সিক্কুন পরানবলা আগন,
তর মিয়েলোই পাপিউন মক্ত ওই যাদন।
তুই যারে মিয়ে গরজ তে যাদি পায় নির্বাণ,
তুই বাদে উদ্ধোর গুরি হিয়োই ন'পারন।
তুই জুনান তুই বেলান তুই আমার ভগবান,
ঠেঙত্ পুরি জু দোঙর কনা ধর্ম কধান।
এই দুক্কেন গরি আনন্দ ভান্তে বুদ্ধোত্তুন পিজোর গরিলু,
ভগবানে হুজি অনেই ধর্ম কধান কল।
মুই হঙর ও আনন্দ দোলে গরি শুন,
মন্দির'অ মুজুঙত্ যারা আঙেবাক মোমবাত্তিউন।
আরো দিলে শষ্য তেল আ ন'অলে ঘি,
জাগায় জাগায় সুনাম তে পেবগি।
এই পুণ্যলোই তিন কল্প স্বর্গ লোকত্ থেবাক,
চক্রবর্তী রাজায়ো ভালোক পল্লা অবাক।
কাদি মাস্যে পুর্ণিমাত্ আগাজ বাত্তি আঙেনেই,
একশ কল্প থেব তে ব্রহ্ম লোকত্ যেনেই।
মানেয় কুলে এলে তে পায় উত্তম সুখ,
দিব্য জ্ঞান থেব তাঁর আর দিব্য চোখ।
হীন কুলত্ তে আর কন দিন ন'যেব,
নরক্কানউ কনবার লাগত ন'পেব।
মুরি গেলে ব্রহ্ম লোকত্ তে লুমিবুগোই,
সে পুণ্যর ফল কদ্ গেলে কোই ন'পুরোই।
সিয়ান শুনি ভান্তেদাগি পিজোর গুরিলাক্,
আগাজ বাত্তি মানেয়উনি কিত্তেই আঙেবাক।
ভান্তেউনি আনন্দ ভান্তেত্তুন শুনিবার চেলে,
আনন্দ ভান্তে আওজে কল্ তুমি শুন সালে।
চুলমনি চৈত্য আগে দেব লোক'অ ইদু,
আগাজ বাত্তিবু দেনা সেই চৈত্য সিদু।
ভগবান বুদ্ধো যক্কে সংসার ছাড়িলু,
রেদে রেদে এক্করে দেজ ছাড়ি গেল।
অনোমা ছড়াত্ লুমিনিগোই যেক্কে পহর অল,
চুলোনি ধরি ছুরিয়ান্ধোই হাবি পেলে'ল।
অধিষ্ঠান গরি সে চুলানি যক্কে উরে দিল,
ঝর ফুদো ফুল দক্কেন সিয়ানি উড়ি গেল।
স্বর্গত্তুন সিয়ানি দেগি ইন্দ্ররাজা এ্যাই,
দোলে গরি স্বর্গত্ নিলু চুলোনি লোনেই।
সাত যোজন অজল মন্দির ইক্কু তুলি,
সিয়োত্ থোনেই পূজো ধল্লাক বুদ্ধোর চুলানি।
গদা স্বর্গ'র দেবেদাউনি সে মন্দিরবু পূজিলাক,
বেগে মিলি মন্দিরবু নাঙান চুলমনি রাঘেলাক।
"বর মাগানা"
কিয়েত্তুন, কধাত্তুন আ মনত্তুন পাপ ধাবে দিনেই,
ঠেঙত্ পুরি আত্ জুর গুরি এই বরানি চেই।
এক্কুয়ারে ত্রিলোকত্তুন মুক্তি পেবাত্তেই,
দান,শীল,ভাবনা লোই পুণ্য গুরি যের।
সেই পুণ্যর বলে মুই মাগং এই বরান,
ভান্যে মানজ্ লোই সমার ন'অদুং জনমান।
গম মানুজচুন সং-সমাজ্জি মুই পাং পারা,
নির্বাণ'র কধা বুদ্ধোত্তুন মুই শুনি পাং পারা।
বুদ্ধো ইদু যদি মুই প্রব্রজ্যা মাগিলে,
লগত্ তগত্ রং হাবরে সাজি পাত্তুং বিলি।
স্রোতাপত্তি, সকৃদাগামি এ মার্গফল,
অনাগামি আ অরহত্ এ চেরান ফল।
ইয়ান পিদুং বিলি মুই ও বুদ্ধো ভগবান,
লাগত পাং পারা মুই দোল নির্বাণান।
ইয়োত মর পুণ্য ফল যা থুবো অল,
বেক্কুনরে দান দোঙর বেগে গুজি ল।
এই পুণ্যর ফল লোনেই বেগে মরে আশীর্বাদ গর'অ,
পুণ্য হামত্ উজেই পাত্তুং এক্কে ধরমর।
সুগে শান্তিয়ে ভালেদে থাক্কু এই মৈত্রী দোঙর,
মুইয়ো যেনে সুগে থাং এ বরান মাগঙর।
দ্বি বারে আ তিন বারে ও এক্কোই বর মাগির।
সাধু সাধু সাধু
