26/07/2025
Shalom.
Incamake mu bishingantahe vyavuzwe mu kuganduka kuri Nyakwigendera Pasteur Mbonihankuye Elie. Mu vyamuranze, vyamvuzweko, yaranguye mw'isi y'abakiriho:
1)Yar'afise urukundo rudasanzwe kandi ruhoze, rudatwarira hejuru kuko hari n'intahe zarwo ziriko zimenyekana ubu.
Akarorero: "Hariho umwana yari mw'irerero ry'impfuvyi, yararwaye anémie(yakama amaraso), hanyuma umugwi w'amaraso yar'afise, war'umwe n'uwa Nyakwigendera.
Naho yar'akuze mu myaka, yavuga ngo bamuvome amaraso, bayahe uwo mwana. Akamufasha, haciye igihe kanaka, bigasubira bikanka, bakamutelefona no mw'ijoro, bati wa mwana biranse. Nawe akarondera umuganga, agasubira kumufata amaraso, bakayashira muri wa mwana, arakura. None ubu ari muri Malawi, afise abana babiri. Akemeza ko naho ku biboneka,Nyakwigendera atakiriho, wewe ariho, amaraso yiwe akimukoreramwo. Yamubonyemwo urukundo rudasanzwe. Imana ibiheregwe Icubahiro n'ishimwe.
2)Ikindi yar'afise urukundo rw'igikorwa c'Imana. Akarorero: Umupasitori umwe ari mu mahanga yavuze ko Nyakwigendera ariwe yatanguje camp biblique mu Burundi. Kandi yatumye amenyana n'abakozi b'Imana bitahiye mw'Ijuru, Abungere Madengo na Ndikunkiko, mu nyuma amenyana na Bonnke na Billy Graham, aragukirwa mu gikorwa c'Imana kuko yamufashije vyinshi n'impanuro nyinshi. Uwo mu Pasitori yitwa Symeon ari mu mahanga yavuze ko ariko ategura igitabo, akigejeje kure, izina rya Nyakwigendera rizogaruka kenshi kubg'ikimazi yamumariye mu kumenyana nawe avuye kwiga theologie muri Amerika. Imana ibishimirwe. Amen.
3) Urukundo ku muryango wiwe.
Yabereye umugisha umuryango wiwe, bakuru biwe, abavyeyi biwe, haba mu biboneka canke mu buryo bg'impwemu kuko yabakurikirana. N'abuzukuru biwe, yarabitaho, akabaha n'ijambo. Yar'azi iminsi y'amavuko yabo, igeze, akabarungikira ingabanwa n'ibindi. Akabakurikirana baciga, akavyitangira, bakabitora. Abana bakabona ko umuvyeyi abakunda, abitaho, abaha agaciro mu kubaha umwanya n'ikiganiro, n'abuzukuru bagashikirwa, na bamwana biwe, uko, n'ivya Yesu Kristo akabivuga. Imana ibishimirwe.
4)Yar'umunyamwete muvyo yakora, akarangwa n'ubgenge. Yarizewe n'igihugu, aba inspecteur regional wa primaire mu ntara z'ubumanuko mu gihugu, amashure arwiriye, araba inspecteur cantonal, mu nyuma kubg'ama rapports yatanga meza kandi ku gihe, igihugu kirungika abantu 6 muri formation mu Bubiligi, na Nyakwigendera yarimwo. Na Ugl y'i Kiremba ari mu batumye ibaho, yararongoye n'amashure primaire na secondaire yo mw'ishengero rya Pentekote ry'i Kiremba, nk'uyakurikirana iy'ava akagera kandi yarinze arangiza ari umwe mu ba membres ba Conseil d'Administration ya Kaminuza y'ibiyaga binini y'i Kiremba.
5)Turangize tubamenyesha ko yar'intwari, yavuga make, avuze, akavuga amajambo arongoroye neza. Yaragenda n'amaguru agiye kuramutsa abatamakazi batakibasha, akabasengera, akabafasha mw'ibanga. N'ivugabutumwa yagize henshi mu Burundi, Amerika aserukiye ishengero muvy'abagideyoni batanga ama Bibiliya, n'ahandi. Mu nyuma ararwara, yitaba Imana, anarangiza neza Mpwemu Yera avyemeza nk'uko yabicishije muri Mwungere Bigirabagabo Joel w'i Ngozi n'abandi.
Imana ibishimirwe, yame idufasha kugeza kw'iherezo ryiza ryerejwe yo. Amen.
Ibihe vyiza.
