Intumwa

07/06/2026

Umugambwe Cndd-Fdd mu ntara ya Buhumuza,urashimishwa n'ivyo waranguwe mur'ano mezi 6 . Kuri uno wa gatandatu igenekerezo rya 6 Ruheshi uno mwaka, umugambwe Cndd-Fdd mu ntara ya Buhumuza watunganije umwiherero muri komine Ruyigi,mu ntumbero yo kurabira hamwe uko ibikorwa bari bihaye vyaranguwe. Uwo mwiherero ukaba witabiriwe n'indongozi ku rwego rw'igihugi mvukira z'intara ya Buhumuza barongowe n'umushikiranganji wa mbere Nestor Ntahontuye, icegera c'umunyamabanga mukuru w'umugabwe Cndd-Fdd Cyriaque Nshimirimana ari kumwe n'abamwe mubari mu buserukizi bukuru bw'umugambwe, icegera ca kabiri c'umukuru w'Inama Nshingamateka, abashingamateka n'abakenguzamateka batowe muriyo ntara n'abarongoye umugambwe ku rwego rw'intara, amakomine n'amazone. Gérard Barutwanayo, umunyamabanga w'umugabwe Cndd-Fdd mu ntara ya Buhumuza akaba ariwe yerekanye ivyaranguwe mu bisata vyose mu makomine,amazone,imitumba n'ubucimbiri. Ku kibazo c'amahoro n'umutekano muri iyo ntara ngo iratekanye kuko abenegihugu bose bari kukivi mbere n'imiryango ifise amikoro make ikaba ishigikirwa mu kibano. Barutwanayo amenyesha ko baravye uko bavyipfuza, basanga ivyaranguwe vyakozwe k'urugero rw'ibice birenga gato 90 kw'ijana, aho avuga ko ivyo bice bibura vyavuye ku ngorane zimwe nko kubura umwavu w'ikizingu ku barimyi n'igitoro kidakwiye. Mu guhanahana ivyiyumviro, Cyriaque Nshimirimana, icegera c'umunyamabanga mukuru w'umugabwe Cndd-Fdd, akaba yakeje abarongoye umugambwe Cndd-Fdd mu ntara ya Buhumuza nabo bakorana kuva mu ntara gushika mu nama nshingiro,arashima yongera abatera intege kukuntu abajejwe intwaro n'inzego z'umugambwe bakorana neza kuko ahari ubumwe,haba n'iterambere. Nayo ku tunenge twavuzwe, Cyriaque Nshimirimana akaba yabasiguriye ko atakazi na kamwe kigera kabura utubazo ariko igihugu camana na ntaryo gikora kugira ngo umwenegihugu abeho neza yongera ahamagarira indongozi guhimiriza abenegihugu kwitunganiriza umwavu k**a kuko abarimyi barwiriye,bituma umwavu mvaruganda udakwira abarimyi. Inyuma y'aho icegera c'umunyamabanga mukuru w'umugabwe Cndd-Fdd, akaba yabasavye ko bokwitegura neza mu matora yimirije mu guhimiriza abenegihugu kugira ngo Buhumuza ize irenze amajwi yaronse mu matora yo mu mwaka wa 2025. Umushikiranganji wa mbere wa Reta y'Uburundi Nestor Ntahontuye nawe nk'imvukira y'iyo ntara, akaba yamenyesheje ko ubu ubice 80 kw'ijana vy'uburyo Reta yahora ishira mu bushikiranganji butandukanye, ubu azohabwa ibiro vy'ubwo bushikiranganji mu ntara, akagira icizere ko iteba ry'ibikorwa ubu rizogabanuka, asaba indongozi mu ntara, no mu makomine gukora ico bategerezwa mu gukoresha neza ubwo buryo kuko igihugu kidashobora guterimbere umuntu adakora ico ategerezwa gukora kandi akagikora uko bitegerezwa ku mwanya mwiza.

06/06/2026

Buhumuza:Abagumyabanga b'umugambwe Cndd-Fdd barafatanye mu nda.
Mu ntara ya Buhumuza, Abagumyabanga baratahuye ibanga ryo gushigikirana. Ico kikaba ikimenyetso c'ubumwe n'urukundo.

Umugambwe Cndd-Fdd mu ntara ya Buhumuza, ufadikanije n'ubuserukizi bw'umugambwe ku rwego rw'igihugu biciye mu muhari w'abakenyererarugamba, warashikirije ku magenekerezo ya 4 na 5 Ruheshi uno mwaka,inzu 13 imiryango ya ba ntahonikora, uribarutsa imiryango 13 yibarutse ubushuri, wongera ushikiriza n'amabombo rusangi mu makomine ya Muyinga, Butihinda, Cankuzo, Gisagara, Gisuru, Butaganzwa na Ruyigi. Ico gikorwa kikaba cari gihagarariwe na Pierre Aboubacar Nkurunziza, umunyamabanga ntunganyabisata w'umugabwe Cndd-Fdd ajejwe abarurwanye akaba ari n'umuhetsi w'intara ya Buhumuza, Nadine Barampama arongoye umuhari w'abakenyererarugamba ku rwego rw'igihugu na Cyprien Havyarimana, icegera c'umunyamabanga w'umugabwe Cndd-Fdd mu ntara ya Buhumuza ari kumwe n'indongozi zitandukanye z'umugambwe muri ayo makomine. Mw'ijambo ry'ikaze, Cyprien Havyarimana icegera c'umunyamabanga w'umugabwe Cndd-Fdd mu ntara ya Buhumuza, yamenyesheje ko abagumyabanga bo muri iyo ntara bari ku kivi mu gukora ibikorwa vyo gutsimbataza umugambwe harimwo no gushigikirana mu kibano, ashimira abash*tsi bavuye mu buserukizi bukuru bw'umugambwe kuba bitabiriye akamo batewe n'uburongozi bw'umugambwe mu ntara ya Buhumuza. Nadine Barampama, arongoye umuhari w'abakenyererarugamba ku rwego rw'igihugu, yahamagariye imiryango kuza baribaruka abo bashoboye kurera no kurera abo bafise bisunze imbono ya Reta yo kurerera Uburundi kuko umwana atari uwo abamwibarutse gusa ahubwo ari uw'igihugu, asaba ko imiryango yose yogira imbonakazoza na cane cane mu kwijukira gutera ibiterwa njabuk**azi nk'ikawa n'ivoka ariko batibagiye n'ibiterwa mbumbarugo, kwitaho isuku n'isukura na cane cane ku bakenyererarugamba yongera abasaba kugabanya kuza baravuga amajambo menshi ahubwo umwanya munini bawuhe ibikorwa kugira ngo na bo bazoterere mw'ishirwa mu ngiro ry'imbonakazoza igihugu cihaye. Na yo Pierre Aboubacar Nkurunziza, umunyamabanga ntunganyabisata w'umugabwe Cndd-Fdd ajejwe abarurwanye akaba n'umuhetsi w'intara ya Buhumuza, yahamagariye abanyabuhumuza kwamana umutima wo gushigikirana mu kibano kuko mu mugambwe Cndd-Fdd atari igisabo ahubwo ari itegeko. Ati ntitwonezerwa no kuvuga ko abagumyabanga twese turi umwe ariko hakiriho bene wacu batagira aho bakika umusaya. Inyuma yo kuronka aho uba, ugakora ibikorwa vy'iterambere ukarya ukaryama nta kindi kiba gisigaye atari ukubumbatira amahoro n'umutekano. Yahamagariye abagumyabanga bo mu ntara ya Buhumuza kwama barikanuye kuko ata wumenya aho umwansi ashobora kuzanana, asaba abaronkejwe amazu n'amabombo rusangi kubibungabunga, yongera abasaba kwitegurira neza amatora igihugu cimirije kugira ngo iyo ntara izoronke amanota meza gusumba uko vyahora. Ivyo birori bikaba vyasozerewe n'inkino z'umupira w'amaguru zabereye ku kibuga Urumuri muri Komine Ruyigi rwahuje imberakure z'abigeme ba Komine Ruyigi na Komine Muyinga, birangira ku ntsinzi ya komine Muyinga y'ibitsindo 2 kuri 1, na yo ku ruhande rw'imbonerakure z'abahungu, komine Gisuru ikaba yatsinzwe na komine Muyinga ibitsindo 2 kuri 1. Iyo mirwi yose yatsinze ikaba yahawe inka n'imipira yo gukina, iyarushijwe na yo ihabwa amafranga umuliyoni n'imipira yo gukina.

04/06/2026

“Ikigo caje nk’inyishu ku rwaruka rwitavye akamo ko kwiremera ubutunzi, biciye mu gukoresha impano, canke guhingura umwimbu..Ubu, isoko yarabonetse.. KIGEGA ni ho ibintu Made in bibarizwa”

Ikigo KIGEGA kidandarizwamwo ivyahinguriwe mu Burundi gusa, gikomoka kandi gishigikiwe n’umugambi , umugambi watanguye mu mwaka w'2021, utangujwe n'Umukuru w'igihugu Nyenicubahiro , mu ntumbero yo guherekeza no gushigikira urwaruka mu migambi y'iterambere; haba mu kubaronsa imitahe y’ibanze canke mu kubakarihiriza ubwenge.

Mu kiganiro Umukuru w'igihugu c'Uburundi Nyenicubahiro Evariste Ndayishimiye aherutse gushikiriza, yaragarutse ku mugambi w’Igihugu wagarukanye icizere gikomeye mu rwaruka, ukuraho umwiheburo w’abahora bizigira akazi ka Reta gusa.

Yagize ati: “Ndabona ko mu myaka 10 iri imbere, urwaruka rw'uburundi ruzokura rubona iyo ruja..Uyo mugambi ugitangura, abatari bake barawurwanije, bakavuga ko amahera tuwushizemwo ari ayo twononye ariko ubu si ko babisanze. Ubu umugambi ugejeje heza urwaruka kuko kiretse abakweze amaguru, abatari bake baramaze kuvyaza PAEEJ umusaruro.”

KIGEGA, ni urupimo rwiza n’ikimenyetso kitabesha ko kwiremera ubutunzi bishoboka ku rwaruka, bisunze impano zabo n’ubutunzi k**a Imana yahaye Uburundi.

Nyenicubahiro Evariste arashimira kandi urwaruka rumaze kuronswa ingurane n'ikigo PAEEJ, kuko abatari bake bamaze guheza kuriha umutahe bahawe, mbere biyumviriye n'iyindi migambi impande y'iyambere ibafasha kwiteza imbere.

youtu.be/YOm0kW_BJVs?si… via

KIGEGA, isoko y’ibihingurirwa mu gusa | Mu ndwi imwe umunt...

04/06/2026

Ikigo cakira impfuvyi c’i Bujumbura kw’i Jabe caronkejwe inyubako nshasha
Ikigo cakira impfuvyi c’i Bujumbura kw’I Jabe (Orphelinat Officiel de Bujumbura) caronkejwe inyubako nshasha zigizwe n’ivyumba umunani n’utuzu twasurwumwe vyubatswe ku mfashanyo y’ishirahamwe ry’abagiraneza ryo muri Amerika ryitwa “Love God Love Others Global USA”.
Umuyobozi w’ikigo cakira impfuvyi c’i Bujumbura, Kwizera Espérance, yavuze ko iyo mfashanyo ije mu gihe ikenewe cane, kuko ikigo gisanzwe kireze abana 72 bo mu myaka itandukanye bitoroshe ko barererwa ahanta hatameze neza, mu gihe izo nyubakwa zatanguye gukora mu mwaka w’1973. Muri abo bana harimwo abakivuka, abari mu mashure y’intango, ayisumbuye hamwe n’abash*tse no muri za kaminuza.
Yasiguye ko abo bana bafise abakozi babitwararika nk’abavyeyi babo, ariko ko ikigo kigifise intambamyi zitari nke zisaba uburyo bwinshi. Mu ziri imbere harimwo ukwitaho abana bato bafatwa n’indwara zitandukanye zisaba gukurikiranwa n’abahinga mu vy’ubuvuzi, hamwe n’abana bagendana ubumuga buboneka n’ubutaboneka bakeneye ubufasha bwabo kugira bakure neza.
Revérend Pasteur Pierre Claver Nicimpaye yaserukiye iryo shirahamwe yavuze ko uwo mugambi watanguye inyuma y’aho hari umwe mu bana yigeze kurererwa muri ico kigo, akaja kuba hanze y’Uburundi. Uwo mwana ni we yabahuje n’abagiraneza bo muri Amerika, baca bafata ingingo yo gushigikira ico kigo biciye mu bikorwa bitandukanye vy’iterambere.
Yamenyesheje ko ibikorwa vyashikirijwe ari igice ca mbere c’umugambi. Mu gice ca kabiri, hategekanijwe gusanura inyubako za kera kuko ico kigo catanguye mu mwaka w’1973.
Uwo yaserukiye iryo shirahamwe “Love God Love Others” yashikirije kandi utuganuke tugizwe ahanini n’ibifungurwa vy’abana, yongera yemeza ko bazobandanya gukorana n’ikigo hamwe no kugishigikira mu migambi itandukanye izorushiriza guteza imbere imibereho y’izo mpfuvyi.
Ndayisasire Alice, yari yaserukiye Ubushikiranganji harimwo gushigikirana, yashimye ico gikorwa c’urukundo. Yavuze ko iyo mfashanyo igaragaza uruhara rukomeye rw’abagiraneza mu gushigikira Reta mu kwitaho abana badafise imiryango ibarera.
Yamenyesheje kandi ko izo nyubako nshasha zigiye gutuma abana barererwa muri ico kigo baba ahantu heza kandi hakwije ibisabwa.

04/06/2026

Umukuru w'igihugu c'Uburundi akaba n'umukuru w'ishirahamwe ry'ubumwe bwa Afrika Evariste Ndayishimiye, yahaye umubonano kuri uno wa 03 Ruheshi 2026 ku kirimba i Gitega,Joshua munonge kibezi aserukira ishirahamwe ry'abakongomani baba mu gihugu ca Reta zunze Ubumwe za Amerika. Nk'uko vyashikirijwe na Floribert BIYEREKE, icegera c'umuvugizi w'Umukuru w'igihugu c'Uburundi, uwo aserukira iryo shirahamwe, akaba ryaserukiwe na Munonge ryari rizanwe no gushimira Umukuru w'igihugu c'Uburundi kukuntu ariko arafasha kugarukana amahoro n'umutekano mu karere k'ubuseruko bwa Reta iharanira intwaro rusangi ya Congo, akavuga ko ishirahamwe Munonge yaserukiye ritazohengeshanya kwama ryerekana ko umukuru w'igihugu c'Uburundi Evariste Ndayishimiye yabaye inyenyeri mu gufasha guharanira agateka k'abanyekongo mu kubaho mu mahoro n'umutekano.

04/06/2026

: Umukuru w'igihugu c'Uburundi Evariste Ndayishimiye ahamagarira abarongoye amadini n’amashengero kugira uruhara rugaragara mu gush*tsa imbonakazoza y’Uburundi.

Mu kiyago co guhanahana ivyiyumviro n’abarongoye amadini n’amashengero mu Burundi ku ruhara rw’abamenyeshamana mu gush*tsa imbonakazoza y’Uburundi, Umukuru w’Igihugu c’Uburundi, Evariste Ndayishimiye, yabahamagariye gutahura ko imbonakazoza y’igihugu ari urugendo rurerure kandi ko na bo bafise uruhara ntangere muri rwo.
Yasiguye ko hafi ibice 98 kw’ijana vy’Abarundi bemera Imana kandi bakayisenga. Kubw’ivyo, yavuze ko abarongoye amadini n’amashengero bafise ubushobozi bwo gufasha igihugu gutera imbere mu gihe inyigisho batanga zoba izihamagarira abayoboke babo gukora cane, kurwiza umwimbu, guhingura no gushora ibidandazwa hanze y’igihugu.
Umukuru w’Igihugu yabasavye kandi gushiraho uburyo bubafasha kumenya neza uko abayoboke babo babayeho, kugira ngo bashobore kubafasha gutera imbere mu gushigikira umugambi wa Reta w'igihugu cifashe mu mwaka w'2040, giteye imbere mu mwaka w'2060. Kubw'Umukuru w'igihugu, ivyo birashoboka gusa ni mugihe abarongoye amadini n’amashengero babigizemwo uruhara, bakerekana inzira n’ico abayoboke babo bokora, kuko ari bo batanga ingaburo y’imitima.
Yagize ati : « Kugira ubutunzi bw’igihugu buduge, namwe ni mukore kugira muduze ubutunzi bw’amashengero n'amadini murongoye, eka n’ubw’abayoboke banyu. »
Nyenicubahiro Evariste Ndayishimiye yasavye kandi abo barongozi kumenya gutorera inyishu ibibazo biri mu mashengero n'amadini yabo. Yamenyesheje ko mu mashengero n'amadini 804 abarizwa mu Burundi, ayarenga 700 afise amatati atandukanye yongera abahamagarira kumenya neza ico Imana yabaremeye, kugira bashobore kuyobora neza amashengero n'amadini yabo no kuyashikana aho Imana ishaka ko ashika. Inyuma yo kwumva izo mpanuro, biciye ku ciyumviro c'Umukuru w'igihugu, abarongoye amadini n'amashengero bakaba biyemeje ko bagiye kuzokwubaka ikigo kirimwo n'amashure y'imyuga kizobamwo abana bo mw'ibarabara mu gushigikira Reta mu migambi y'iterambere.

03/06/2026

Gitega, 03 ruheshi 2026: Umukuru w’Igihugu c'Uburundi Nyenicubahiro Evariste Ndayishimiye arash*tse ku kibuga c'umupira w'amaguru citiriwe Ingoma mu ntara ya Gitega aho aje mu kiyago n'abarongoye amadini n'amashengero mu Burundi mu ntumbero yo kurabira hamwe uruhara rw'abamenyeshamana mu gush*tsa imbonakazoza y'Uburundi.

03/06/2026

Abaririmvyi benshi n'abagenzi, turaramukanya ahubwo ndabahamagaye ababishaka tuze dukorane mu myiyamamazo ya 2027, twiginane : Presida Evariste Ndayishimiye

03/06/2026

Uyu munsi ndavuga nti mu bihungu bifungura neza muri Afrika, u Burundi burimwo; Prezida Evariste Ndayishimiye

02/06/2026

Inama Nshingamateka y’Uburundi yarakoranye kuri uyu wa kabiri, igenekerezo rya 2 Ruheshi 2026, kugira yige yongere yemeze impinyanyuro zakozwe n'Inama Nkenguzamateka ku nteguro zibiri z’amabwirizwa ku masezerano hagati ya Repubulika y’Uburundi na Leta Zunze Ubumwe z’Abarabu.
Integuro ya mbere ikaba ijanye n’integuro y itegeko ryo kwemeza amasezerano hagati ya Reta y’Uburundi na Leta Zunze Ubumwe z’Abarabu mu kudatoza amakori incuro zibiri no kurwanya kutariha amakori ku mwimbu. Ayo masezerano akaba yashiriweko umukono i Abu Dhabi muri Reta Zunze Ubumwe z'Abarabu, ku wa 6 Ruhuhuma 2017, mu ntumbero yo gukomeza ugufashanya mu vy’ubutunzi hagati y’ibihugu vyompi no guteza imbere igisata c'ubudandaji.
Integuro ya kabiri y’itegeko ikaba ijanye n amasezerano hagati ya Reta Zunze Ubumwe z Abarabu ku bijanye no guteza imbere no gukingira imitahe hagati y'ibihugu vyompi.
Inyuma yo guhanahana ivyiyumviro ku vyahinyanyuwe n'Inama Nkenguzamateka kuri izo nteguro, Inama Nshingamteka ikaba yaciye yemeza izo nteguro.