31/07/2025
🎙105 год таму, 31 ліпеня 1920 года, у Брэсце нарадзіўся Ігар Сікірыцкі — польскі паэт, пісьменнік, сатырык, журналіст і радыёвядучы, звязаны з літаратурным і тэатральным жыццём Лодзі.
У 1926 годзе сям’я пераехала ў Люблін, дзе Ігар атрымаў сярэднюю адукацыю. У час Другой сусветнай вайны быў сябрам Арміі Краёвай. Пасля вызвалення пачаў працаваць на радыё і вучыўся ў Люблінскім, а затым у Лодзінскім універсітэтах.
З сярэдзіны 1940-х гадоў жыў у Лодзі, дзе працаваў радыёвядучым і кіраўніком шэрагу тэатральных калектываў. Быў мастацкім кіраўніком Тэатра Сатырыкаў і тэатра «7:15», супрацоўнічаў з тэатрам «Арлекін», а ў другой палове жыцця цалкам прысвяціў сябе літаратуры.
Дэбютаваў яшчэ перад вайной. Пісаў вершы, аповесці, сатыры, п’есы, перакладаў з беларускай, рускай і малдоўскай моў. Аўтар перакладу «Віцязя ў тыгровай скуры» на польскую. Яго п’есы ставіліся на сцэнах Ольштына, а творы друкаваліся ў часопісах і кнігах.
Актыўна ўдзельнічаў у грамадскім жыцці: быў дэпутатам Народнай Рады Лодзі, сябрам Польскай секцыі ЮНЕСКА і інш. У 1983 годзе ўганараваны Ордэнам Усмешкі.
Памёр 2 студзеня 1985 года ў Лодзі, дзе і пахаваны. У 1989 годзе імем брэстчаніна была названая адна з вуліц польскага горада.
