Kaciaryna Web-design Tilda

02/01/2025

Сёлета такія цікавыя вяночкі ў мяне атрымаліся, што хочацца захаваць іх устужцы. Усе новыя для мяне.
У пачатку снежня выдалася аказія адправіць перадачку ў Вільню сябрам. Хацелася зрабіць калядны вяночак у падарунак . Але вельмі баялася з расліннай сыравіны, бо невядома, раптам на мяжы вырашаць, што нельга.
Думала ўжо кніуць гэтую ідэю, а потым ўбачыла драўляшкі, якія муж адпілоўвае на лецішчы, пакуль абшывае сцены і ўсё вырашылася)
Вырашыла, хаця б паспрабую зрабіць з гэтых кавалачкаў незвычайны, але калядны вяночак. І нечакана перадалі сябрам кавалачак нашага дома, дзе раней сустракаліся і гасцявалі)
Дзіўны і нечаканы досвед, але мне вельмі спадабаўся. Цяпер ужо ведаю, што можна зрабіць лепей і лягчэй, асабліва пры наяўнасці часу. Можа, налета зраблю яшчэ)
Як мы з коцікам запакоўвалі для перавозкі- гэта асобны канструктар і новае прачытанне скрынкі ад абутку Марка)))

02/12/2024

44.
У які бок не перавярні, усё роўна застанецца 44. Мяняй месцамі какетліва, ці не мяняй.
Ну і добра.
Усе, што ёсць, усе мае.
Лепшы спосаб правесці дзень народзінаў, як па мне- выбрацца ў вандроўку. Я выспалася, Міраслаў адпрасіўся з працы, дзецям сказаў узяць ключы ад кватэры, каб маглі вярнуцца, і мы рушылі ў вандроўку.
Пацягаліся па нашай Налібацкай пушчы.
Да сустрэчы Нёмана і Бярэзіны не даехалі, а да сустрэчы Іслачы і Бярэзіны дабраліся. Праз шмат кіламетраў цікавых лясных дарог.
Сустрэлі шэрую(!) казулю і вавёрку. Падазраю, што ў асноўным звяры глядзелі на нас з гушчароў, а не мы на ніх.
Палазілі - упершыню!- па заброшаным санаторыі. Цікава, але было капец страшна, калі зверху раздаліся нечыя крокі)
Сонца мне сёння не выдалі. Але і без яго ўдвух, не на працы, па лесе - было файна.

А пра год:
Я цалкам задаволеная сабой. Магчыма, навучылася цаніць сябе.
У асноўным гэта прафесійнае. Шмат вучобы, рознай.
Нарэшце асмелілася заявіць пра сябе, як вэб-дызайнера. І былі цікавыя праекты. Пакуль што гэта фрыланс у дадатак да асноўнай працы. Далей паглядзім. Мо так і застанецца. Бо вельмі хачу займацца вэб-дызайнам менавіта ў беларускай прасторы. А гэта на поўнае забеспячэнне сябе пакуль што не цягне. Затое мой унёсак у сваё.
На працы нечакана давялося засвоіць кадравую працу. Не тое, каб я гэтага хацела ці шукала. Але гэта някепскі новы досвед. Да таго ж, новая вучоба і веды. Усё, як я люблю.
Цяпер вучу інтэрнэт-маркетынг. Яшчэ ў скарбонку.
З нечакана замуцілі праект, . Гэта вельмі цікава, абсалютна новы досвед. Калі шчыра, ганаруся намі - і тым, як узнікла ідэя, і як мы хутка сінхранізаваліся і ажыццявілі. І гэта чарговы крок да таго, каб умець браць за сваю працу грошы. З гэтым без Іры я б адназначна не справілася)
Чамусьці я без згрызотаў прымаю грошы толькі ў выглядзе зарплаты на асноўнай працы. І там мне амаль увесь час падаецца, што гэтага малавата)
Дзеці сталеюць. Падлеткі - гэта цікава, складана, часам вельмі лёгка, часам невыносна. Але адназначна: фізічна гэта ўжо самастойныя асобы ( вось чаму мама можа па вечарах вучыцца і працаваць).
Дом на лецішчы будуецца ( рукамі Міраслава). Расліны растуць.
Жыццё працягваецца.

01/12/2024

Нашай з Дануце сёння 12 год!
Прыгожая, разумная, мілая. Здаецца, някепска прыстасаваная да жыцця і ўмее радавацца таму, што мае.
Люблю-не магу.
Няхай жыццё будзе лёгкім і цікавым! І жаданні выконваюцца так да лёгка, як і сёння.

Цяпер мы дакладна маем траіх падлеткаў. Усё цікавей і цікавей)

24/11/2024

Апошнія выхадныя восені.
Для мяне гэта заўсёды значыць, што трэба прыносіць са склепу навагоднюю валізу (у нас гэта называецца проста: трэба прынесці валізу, якую нават не ўдакладняем, яна адна), хутчэй рабіць вянок Адвента, каб паспець запаліць першую свечку, і рыхтаваць заданні ды падаруначкі дзецям да Адвенту.
Сёлета будуць заданні ад праекта Адвент па-беларуску, да якога я і сама прыклала руку.
Шчыра раю мамам і татам беларускамоўных дзетак і тым, хто шануе беларускую мову.
Вы дакладна сэканоміце час, нервы, пры гэтым зробіце чаканне Калядаў ці Новага года вясёлым і цікавым.
Усё даведацца і замовіць можна праз сайт. Перапост вітаецца!

Заданні для адвент-календара на беларускай мове

30/08/2024

Ну вось мы і прыйшлі ў тую кропку, калі не я падкідваю дзецям кнігі, а яны мне.
14-гадовы Дамінік, папрацаваўшы летам, частку грошай спусціў на кнігі, абавязкова папяровыя.
"Забіць перасмешніка" прачытаў сам, а потым прынёс пачытаць мне.
Чаму я не чытала раней? Не ведаю. І не разумею.
Але я чарговы раз на некалькі дзён завісла над кнігай. Зразумела, нічым займацца нармальна не магла, бо складана адарвацца ад чытання.
Дачытала ўначы.
Адчула, што зноў магу ісці займацца справамі, бо цяпер унутры шмат таго, што хочацца сабе ўнутры прагаварыць і асэнсаваць па слядах кнігі.
А яшчэ вельмі прыемна перакатваць у галаве думкі пра тое, як мне падабаецца мой сын, які так прыгожа сталее. І дзівіцца, што гэта маё ( мне ўвогуле часам так дзіўна і смешна, што вось гэтых вось людзей, двое з якіх глядзяць на мяне ўжо зверху, зрабіла я).
І нават патроху пачынаю адпускаць маё ўлюбёнае пачуццё віны за тое, што мы недастаткова добрыя бацькі. Бо ўсё ж такі атрымаліся ў нас добрыя чалавекі.

Проста кніга нечакана атрымалася для мяне ў першую чаргу пра бацькоўства, а потым ужо пра сацыяльную няроўнасць.
Дзіўна, канешне...

14/04/2024

Сёлета ваду на лецішчы ўключылі незвычайна рана. І мы з усяе моцы рыхтуемся да пераезду.
Памылі большую частку дома пасля зімовага будаўніцтва ( асабліва кухню!), памылі вокны, павесілі фіранкі ў гасцёўні і наверсе ў спальнях.
Я нават пасадзіла пару градак, а хлопцы ўжо з усяе моцы робяць слупы для даху тэрасы.
Пасля доўгіх спрэчак мы вырашылі, што дах у яе будзе)

У мяне цяпер вялікая занятасць і пра пераезд нават думаць было лянотна. Але пасля сёння ўжо не церпіцца дазбіраць рэчы і ехаць)

На прыродзе надзвычай хораша.

28/02/2024

Гэтай красуні Адэльцы, што на фота, сёння 16 год! Ну а я мама 16 год. Проста ашалець)

Вельмі хачу, каб мая дачушка знайшла сваё ўтульнае і надзейнае месца ў гэтым свеце, каб паверыла ў свае таленты і раскрыла іх.

Ну а фота сёння няма, бо не дазволіла. Затое галаву ад коціка😁, якую зрабілі сёння з братам, дазволіла.

Напэўна, упершыню на Адэліны народзіны выдалі такое чароўнае надвор'е.