Diaspora Today

30/09/2025

Kancelari gjerman: "Nuk jemi në luftë, por as në paqe!"

Kancelari gjerman, Friedrich Merz paralajmëroi dje për një epokë të re të “forcës brutale”, sulmon Rusinë dhe bën thirrje për kujdes në përballimin e kërcënimit nga dronët.
“Ne nuk jemi në luftë, por as në paqe nuk jemi”, tha kancelari gjerman, duke shtuar se bota po përjeton ndryshime themelore.
Në një aktivitet të organizuar nga gazeta Rheinische Post, Merz tha se rendi ndërkombëtar i bazuar në rregulla po zëvendësohet nga politika e forcës brutale, e cila shpesh shoqërohet me dhunë ushtarake. “Ne jetojmë në një botë krejtësisht të ndryshme”, tha kancelari gjerman.
Merz shprehu shqetësimin e tij në lidhje me fluturimet e fundit të dronëve mbi Danimarkë dhe shtetin gjerman Schleswig-Holstein. Ai tha se ndërsa nuk kishte asnjë tregues se dronët ishin të armatosur, ata ishin të pajisur me sisteme mbikëqyrjeje dhe kishin një hapje krahësh deri në tetë metra. “Nuk e dimë ende nga vijnë, por dyshimet po kthehen nga Rusia”, tha ai.

30/09/2025

Konstituimi i Kuvendit të Kosovës: Përfundon masa e përkohshme e Gjykatës Kushtetuese

Sot përfundon masa e përkohshme e Gjykatës Kushtetuese të Republikës së Kosovës nga 5 shtatori, me të cilën janë pezulluar të gjitha veprimet dhe vendimet e deputetëve të Kuvendit të Kosovës, duke përfshirë edhe procedurat për formimin e Qeverisë.
Gjykata vlerësonte se ndalimi i të gjitha vendimeve dhe veprimeve të deputetëve të zgjedhur të Kuvendit, dhe çdo procedurë e mëtejme për formimin e Qeverisë, mund të evitojë rreziqe apo dëme të pariparueshme që ndërlidhen me themelimin e institucioneve shtetërore dhe nxjerrjen e vendimeve në kundërshtim me Kushtetutën.
Po ashtu, Gjykata vlerësonte se, në kuptim të përcaktimeve të Ligjit, ekzistojnë rrethana të “interesit publik” e që përfshijnë ruajtjen e rendit kushtetues të Republikës së Kosovës.
Kjo masë ishte ndërmarrë pas ankesës së paraqitur nga Lista Serbe, e cila kontestoi mënyrën e zhvillimit të seancës konstituive të Kuvendit.

30/09/2025

Izraeli pranon planin amerikan për Gazën

Izraeli ka miratuar planin amerikan për t'i dhënë fund luftës në Rripin e Gazës. Kryeministri izraelit, Benjamin Netanyahu e konfirmoi këtë pas një takimi me Presidentin e SHBA-së, Donald Trump.
Plani përfshin, ndër të tjera, ndaljen e menjëhershme të operacioneve ushtarake, lirimin e të gjithë pengjeve, tërheqjen graduale të ushtrisë izraelite nga Rripi i Gazës dhe krijimin e një "këshilli të paqes“ nën udhëheqjen e Trumpit.
Ende nuk është e qartë nëse Hamasi do të pranojë kushtet e planit. Nëse nuk i pranon, Trump tha se ai do të mbështesë "sulmet e Izraelit ndaj milicisë terroriste.“

29/09/2025

29/09/2025

FFK: Albiani iu bashkua rrënjëve të tij

Kombëtarja e Kosovës ka fituar një zemër të re në fushë dhe një muri të ri në mbrojtje. Qendërmbrojtësi i talentuar i Hoffenheim-it, Albian Hajdari, ka marrë vendimin e madh për t’u bashkuar me fanellën dardane, njoftoi sot presidenti i FFK-së, Agim Ademi përmes llogarisë së tij në rrjetet sociale.
“Albiani iu bashkua rrënjëve të tij, duke u kthyer në shtëpinë e tij, Kosovën. Hajdari, i rritur në futbollin zviceran e me një karrierë premtuese në Bundesligë, tani ka zgjedhur që të shkruajë historinë e tij me fanellën dardane. Vendimi i tij është një mesazh i qartë: Kosova është foleja e ngrohtë dhe zemra gjithmonë rreh më fort për atdheun. Mirë se vjen, Albian! Kosova është më e fortë me ty!”, ka shkruar Ademi.

29/09/2025

Ylli Michelin për restorantin e Emin Hazirit në Milano

“Edhe pse nuk u bëra doktor siç donte mami, sot e bëra krenare me një yll Michelin,” thotë shefi i kuzhinës dhe pronari i restorantit "Procaccini“ në qendër të Milanos, i cili u vlerësua me këtë çmim prestigjioz në botën e gastronomisë.
Rrugëtimi i Eminit është një histori suksesi që frymëzon. Ai lindi në vitin 1995 në Klinë, por u largua me familje nga Kosova në Itali kur i kishte shtatë vjet. Në Itali, Emini zbuloi se kuzhina është pasioni i tij dhe pas shkollimit për kuzhinier fitoi përvojë në restorante të njohura me yje Michelin. Për të, ky çmim nuk është vetëm një arritje personale, por edhe një dëshmi se përkushtimi, pasioni dhe puna e palodhur mund të hapin dyer të mëdha.

29/09/2025

Osmani: "Pritje madhështore nga mërgata jonë në Philadelphia“

Presidentja e Kosovës, Vjosa Osmani, po vazhdon të qëndrojë në SHBA. Ajo është pritur nga diaspora shqiptare në Philadelphia.
“Një pritje madhështore nga mërgata jonë në Philadelphia, në shtëpinë e shqiptarit, objekt të cilin bashkatdhetarët tanë, me punë e mund, e siguruan dhe e shndërruan në shkollë shqipe. Thellësisht mirënjohëse për këtë përkushtim, që ruan e forcon gjuhën dhe identitetin tonë kombëtar”, ka shkruar Osmani në Facebook.

29/09/2025

Lufthansa shkurton 4.000 vende pune

Kompania ajrore gjermane Lufthansa planifikon të shkurtojë 4.000 vende pune deri në vitin 2030.
Bëhet e ditur se shkurtimet prekin kryesisht sektorin administrativ, jo atë operativ. Proceset e punës do të digjitalizohen, automatizohen dhe ndërlidhen për të siguruar efikasitet më të madh.
Lufthansa pretendon që deri në vitin 2030 të ketë fitime 8 deri në 10 përqind dhe për këtë "duhet të lirohet nga fuqia e tepërt e punës".

28/09/2025

Osmani: "Mirënjohje e përjetshme për aleatin tonë historik, Shtetet e Bashkuara”

Presidentja e Kosovës Vjosa Osmani ka publikuar fotografi me ish presidentin amerikan Bill Clinton.
Osmani tha se me Clinton e ndau rrëfimin e Kosovës nga çlirimi deri më sot.
“E nderuar që rrëfimin e Kosovës, nga çlirimi e deri më sot, ta ndaj së bashku me Presidentin Clinton në New York në prani të një audience të jashtëzakonshme nga e gjithë bota. Mirënjohje e përjetshme për aleatin tonë historik, Shtetet e Bashkuara”, ka shkruar presidentja në Facebook.

28/09/2025

Gjermani: Dhjetëra mijëra njerëz demonstruan kundër luftës në Gazë

Dhjetëra mijëra njerëz demonstruan dje në Gjermani kundër luftës në Gazë. Protesta më e madhe nën moton "All Eyes on Gaza" po mbahet në Berlin.
Në protestën qendrore janë mbledhur rreth 60.000 njerëz që kërkojnë fundin e luftës në Gazë. Por protesta më të vogla ka pasur edhe në pjesë të tjera të qytetit.
Në disa vende ka edhe manifestime të vogla pro-izraelite. Megjithatë shumica dërmuese e njerëzve që dolën sot në rrugë kanë kërkuar nga Izraeli që të ndërpresë sulmet në Gazë.
Organizatorët thonë madje se kanë demonstruar mbi 100.000 njerëz. Kjo është protesta më e madhe në Gjermani në të cilën kërkohet ndëprerja e agresionit izraelit në Gazë.
Demonstratat i kanë organizuar dhjetëra organizata të ndryshme.

28/09/2025

Kurti për vëllezërit Bytyqi: "Lirinë e deshën, për liri luftuan, lirinë e gëzojmë"

Kryeministri në detyrë, Albi Kurti, ka bërë homazhe te varrezat e vëllezërve Bytyqi, Yllit, Agronit e Mehmetit, në New York.
"Lirinë e deshën, për liri luftuan, lirinë e gëzojmë. Vepra e vëllezërve Yll, Agron dhe Mehmet Bytyqi është ndër shembujt më të lavdishëm të dashurisë për atdhe, kurse vrasja e tyre dëshmi e pamohueshme e krimeve të shtetit gjenocidal të Serbisë", ka shkruar Kurti në Facebook.
Ai ka shtuar se "ideali i tyre na shërben si udhërrëfyes për të ecur përpara, në mënyrë që të arrijmë atë çfarë ata e kanë dashur e për të cilën janë flijuar".

27/09/2025

Osmani dhe Begaj në pritje të organizuar nga presidenti amerikan

Presidenti amerikan, Donald Trump organizoi mbrëmë një pritje në kuadër të Asamblesë së OKB, ku morën pjesë edhe presidentja e Kosovës, Vjosa Osmani dhe presidenti i Shqipërisë, Bajram Begaj.
Osmani dhe Begaj kanë postuar foto nga takimi me presidentin amerikan dhe bashkëshorten e tij.
Presidentja Osmani ka shkruar në profilin e saj në Facebook se “takim i planifikuar si protokollar me Presidentin Trump është shndërruar në një bisedë të gjatë dhe shumë përmbajtjesore.”
Ndërkaq, presidenti i Shqipërise Begaj shkruan: "Miqësia shqiptaro-amerikane, një lidhje e fortë dhe e pathyeshme, një aleance historike dhe strategjike”.