Diaspora Today

25/12/2025

24/12/2025

MPJD njofton për bllokada të qarkullimit rrugor në Serbi

Ministria e Punëve të Jashtme dhe Diasporës (MPJD) ka njoftuar se sot, më 24 dhjetor, do të bllokohet përkohësisht qarkullimi rrugor në segmentin rrugor në fshatin Kastrat të Kurshumlisë në Serbi, për shkak të aktiviteteve të paralajmëruara nga banorët lokalë.
Sipas njoftimit ë MPJD, bllokimi do të zgjasë nga ora 11:50 deri në ora 15:50. Po ashtu, MPJD bën të ditur se bllokime të qarkullimit janë paralajmëruar edhe në data të tjera.

MPJD njofton edhe për bllokada të tjera. “Më 27 dhjetor 2025, qarkullimi do të bllokohet nga ora 11:52 deri në ora 18:52, ndërsa më 3 janar 2026, bllokimi do të zgjasë nga ora 09:00 deri në ora 24:00”, thuhet në njoftim.

MPJD ka këshilluar mërgimtarët që kanë planifikuar udhëtime drejt vendlindjes apo janë në tranzit përmes këtij segmenti rrugor, që të planifikojnë me kohë lëvizjet e tyre dhe të shfrytëzojnë rrugë alternative.

Për informacione shtesë mund të kontaktoni Qendrën për Menaxhim të Krizave Konsullore (QKMK) në numrat e telefonit: +383 45 198 000
+383 45 198 606
dhe 0800 500 95

21/12/2025

Filmi i ri për Nënë Terezën

India në vitet 1940: Filmi "Tereza - Një jetë mes dritës dhe hijes" tregon ikonën e kishës katolike mes vetëdyshimit, parimeve dhe gatishmërisë për sakrificë. Dhe shtron pyetjen: A ishte Tereza feministe?

Tereza ishte 19 vjeç, kur shkoi si novice (fillestare) në Indi, ku u përball me mjerimin, urinë dhe sëmundjen. Ajo jetoi si murgeshë në Kalkuta, në urdhërin katolik Loreto, i cili i kushtohej arsimit dhe punës misionare në Indi. Kalkuta ishte e mbipopulluar, shërbimet shtetërore ishin të mbingarkuara dhe sistemi shëndetësor pothuajse inekzistent. Menjëherë pas shpalljes së pavarësisë nga Britania e Madhe, pas rreth 200 vjetësh sundimi kolonial, India përballej me sfida të mëdha. Në vend kishte trazira, mijëra njerëz humbën jetën në incidente të dhunshme.

Në këtë kaos na çon filmi "Tereza - Një jetë mes dritës dhe hijes", pa zbukurime estetike, në një qytet me zhurma, ngushtësi dhe dyndje njerëzish. Tereza, e lindur në vitin 1910 si Anjezë Gonxhe Bojaxhiu në Shkupin e sotëm, shfaqet aty si një grua, që misionin e saj e kërkon mes rrënojave dhe vështirësive. Gjatë një udhëtimi me tren ajo duhet të ketë përjetuar "vokacionin e saj": jo për të jetuar më vetëm për Zotin, por në mes të më varfërve ndër të varfërit.

Filmi tregon Terezën (të luajtur në mënyrë të jashtëzakonshme nga Noomi Rapace) jo si një figurë të mbinatyrshme të dritës, por si një grua që përplaset me kishën e saj. Sepse projekti i saj ishte revolucionar: të linte manastirin, të themelonte urdhërin e saj, të zhvendosej në mes të lagjeve të varfëra, të ndihmonte njerëzit e sëmurë dhe ata që po vdisnin - si një murgeshë urdhëri jashtë urdhërit. Kisha e frenoi, sepse dëshira e Terezës nënkuptonte largim nga traditat e vjetra dhe mosbindje. Por ajo mbeti kokëfortë. Vetëm në vitin 1948 Vatikani u dorëzua dhe në vitin 1950 ajo themeloi më në fund urdhërin global të "Misionareve të Bamirësisë" .

Tereza qe e ashpër në çështjen e abortit. Në fjalimin e saj në marrjen e çmimit Nobel (1979) ajo e përshkroi abortin si "vrasje" dhe "shkatërruesin më të madh të paqes". Si rezultat ajo u bë një udhëheqëse morale e lëvizjeve konservatore dhe në të njëjtën kohë objektiv i kritikës feministe, që e akuzoi atë se ia nënshtronte të drejtat e grave idealit të gatishmërisë për të bërë sakrifica.

Megjithatë për regjisoren e filmit, Teona Strugar Mitevska, Tereza kishte tipare feministe: "Ajo ia dha vetes lirinë, për të qenë ajo që ishte, për të arritur qëllimin e saj. Kjo e bën atë për mendimin tim një figurë jashtëzakonisht feministe", u shpreh Mitevska në një intervistë për revistën kinematografike filmdienst.

(DW)

21/12/2025

Kosovë: Pritje të gjata në Merdarë

Qendra Kombëtare për Menaxhim Kufitar njofton për gjendjen aktuale në pikat kufitare, ku kolona më të gjata po regjistrohen në Merdarë, ku pritjet për hyrje në Kosovë janë mbi tri orë.

Bëhet e ditur se situata është përmirësuar në pikën kufitare Dheu i Bardhë, ku më herët pritjet
arrinin deri në tri orë, ndërsa tani ato janë reduktuar në rreth 30 deri në 40 minuta.

Në pikat e tjera kufitare, qarkullimi po zhvillohet normalisht dhe nuk raportohet për pritje të gjata.

20/12/2025

Osmani: Njohja e Kosovës nga Bahamet - një moment historik

Presidentja e Kosovës, Vjosa Osmani njoftoi dje se Bahamet, vend në Karaibe, e ka njohur pavarësinë e Kosovës. Ajo e ka cilësuar këtë vendim si moment historik për vendin, duke shtuar se kjo njohje ka ardhur pas një pune të gjatë dhe angazhimi të madh të Presidencës.

“Ky është një moment historik i jashtëzakonshëm për të arriturat e vendit tonë. Jemi jashtëzakonisht të lumtur që, pas një pune të gjatë dhe angazhimi të madh e intensiv të presidencës, sot kemi nënshkruar marrëveshjen për njohje së bashku me kryeministrin Davis dhe gjithashtu marrëveshjen për vendosje të marrëdhënieve diplomatike”, ka deklaruar presidentja Osmani.

Njohja nga Bahamet është e katërta këtë vit për Kosovën, pasi më herët dy shtete afrikane, Sudani dhe Kenia, si dhe Siria nga Lindja e Mesme e njohën atë.

19/12/2025

BE: Kredi për Ukrainën, por pa përdorur asetet ruse

Krerët e shteteve dhe qeverive të vendeve të BE-së kanë arritur një kompromis mbi financimin e ardhshëm të Ukrainës.

Siç njoftoi Kancelari Merz pas samitit të BE-së në Bruksel, Ukraina do të marrë një kredi pa interes prej 90 miliardë eurosh nga BE-ja. Asetet ruse do të mbeten të ngrira për momentin - por vetëm nëse Rusia i paguan Ukrainës kompensim.

Më herët, presidenti ukrainas Volodymyr Zelensky u kishte kërkuar udhëheqësve të përdornin 200 miliardë euro nga asetet e ngrira ruse, por Belgjika, ku mbahet pjesa më e madhe e parave të gatshme, kërkoi garanci për ndarjen e përgjegjësisë, gjë që rezultoi shumë e vështirë për vendet e tjera.

18/12/2025

Gjermania njeh patentat e shoferëve të Malit të Zi

Kryeministri i Malit të Zi, Milojko Spajiq njoftoi se patentat e shoferëve të këtij vendi do të njihen në Republikën Federale të Gjermanisë, duke i dhënë fund problemit me të cilin përballen qytetarët malazezë që jetojnë dhe punojnë në Gjermani.

Spajiq bëri të ditur se ka nënshkruan Deklaratën për Njohjen Reciproke të Patentave të Shoferëve me Ministrin gjerman të Transportit, Patrick Schnieder, duke theksuar se kjo i jep fund pengesave administrative afatgjata për shoferët malazezë në Gjermani.

Siç pritet, vendimi do të hyjë në fuqi në gjysmën e parë të vitit 2026.

18/12/2025

Von der Leyen: Kosovës do t’i ndahen 205 milionë euro në fillim të vitit të ardhshëm

Presidentja e Komisionit Evropian, Ursula von der Leyen theksoi se kalimi i pushtetit të qeverisjes lokale në veri, pas zgjedhjeve të fundit lokale, ka qenë paqësor.

"Falë këtij zhvillimi pozitiv, Bashkimi Evropian do të ecë përpara me procesin e heqjes së masave ndaj Kosovës, ka theksuar ai.

Von der Leyen njoftoi se BE planifikon të ofrojë 216 milionë euro ndihmë financiare, ndërsa 205 milionë euro pritet të lirohen në fillim të vitit të ardhshëm.

“Jam e lumtur të njoftoj se po ecim përpara për të hequr masat ndaj Kosovës. Ne po programojmë 216 milionë euro ndihmë financiare. Dhe kemi ndërmend të lëshojmë 205 milionë euro në fillim të vitit të ardhshëm”, ka shkruar Von der Leyen në platformën “X”.

18/12/2025

Osmani: “Kosovës do t’i hiqen të gjitha masat - një pjesë tani e pjesa tjetër në fund të janarit“

“Kemi lajme të shkëlqyeshme për Kosovën. Në fund të Samitit ndërmjet Bashkimit Evropian dhe Ballkanit Perëndimor, pas diskutimeve intensive me partnerët tanë u mor vendimi që të gjitha masat t’i hiqen Kosovës, ku një pjesë e madhe hiqet sot, kurse pjesa tjetër në fund të janarit”, tha mbrëmë Presidentja e Kosovës, Vjosa Osmani.

Osmani e vlerësoi vendimin si një lajm shumë pozitiv për Kosovën, duke theksuar se ai reflekton përparim në bashkëpunimin me Bashkimin Evropian.

Ajo shtoi se kjo hap rrugën për vazhdimin e reformave dhe forcimin e marrëdhënieve evropiane, duke nënvizuar rëndësinë e angazhimit të Kosovës për të përmbushur standardet e kërkuara.

17/12/2025

Kosovë: Sot fillon fushata zgjedhore

Sot fillon fushata e subjekteve politike për zgjedhjet e parakohshme në Kosovë që mbahen më 28 dhjetor. Do të jetë kjo fushata e katërt zgjedhore në Kosovë gjatë këtij viti.

Pas zgjedhjeve parlamentare të 9 shkurtit dhe atyre lokale të 12 tetorit dhe 9 nëntorit, subjektet politike kërkojnë sërish mbështetjen e votuesve në zgjedhjet e parakohshme.

Në zgjedhjet parakohshme për Kuvendin e Kosovës marrin pjesë 24 subjekte politike, prej të cilave, 18 parti politike, 3 koalicione, 2 iniciativa qytetare dhe 1 kandidat i pavarur, ndërkaq numri i përgjithshëm i kandidatëve që garojnë për ulëse në Kuvend është 1,180 kandidatë.

17/12/2025

Aktorja Fatlume Bunjaku do të marrë pjesë në Berlinale si “Shooting Star 2026”

Qendra Kombëtare e Kinematografisë shqiptare, ka njoftuar se aktorja kosovare Fatlume Bunjaku, është përzgjedhur si një nga 10 aktorët më premtuese të Europës për vitin 2026, në kuadër të programit «European Shooting Stars». Ajo është nominuar me rolin e saj ne filmin «HANA», të regjisorit Ujkan Hysaj.

Gjatë Berlinale 2026, talentet e përzgjedhura do të marrin pjesë në një program katërditor, i cili përfshin sesione rrjetëzimi, takime me përfaqësues të industrisë, aktivitete për shtypin, ceremoninë e ndarjes së Çmimit European Shooting Stars, si edhe një moment të veçantë në tapetin e kuq, me prezantimin zyrtar të grupit në Berlinale Palast.

16/12/2025

Nëse jeni të interesuar për shtëpi ekskluzive...

Në lagjen Simfonia në Zllatar, vetëm pesë kilometra larg nga qendra e Prishtinës, po ndërtohen rreth 40 shtëpi ekskluzive, sipas standardeve të fundit evropiane.

Kompleksi gjendet në një zonë shumë të bukur, me ajër të pastër, hapësira të mjaftueshme banimi, me infrastrukturë të përshtatshme, kopsht e shkollë për fëmijë, mundësi të shumta për sport e argëtim.

Të gjitha informacionet i gjeni në:

Internet: www.mana-dev.com

Telefon: +383 44 966 667

Facebook: https://www.facebook.com/profile.php?id=61565541695679

Instagram: https://www.instagram.com/manadev.ks/?hl=de