Diaspora Today

14/06/2026

Katy Perry performon në “Sunny Hill Festival”

Këngëtarja e famshme amerikane, Katy Perry do të performojë në edicionin e sivjetmë të “Sunny Hill Festival” që mbahet nga 31 korriku deri më 2 gusht në Prishtinë, njoftojnë mediat. Ajo do të jetë një nga emrat kryesorë të programit.

Turneu festivalor i Perry-t përfshin disa nga ngjarjet më të njohura muzikore në Spanjë, Portugali, Belgjikë, Francë, Itali dhe Maltë, ndërsa ndalesa në Kosovë vjen si një nga pikat kulmore të verës së saj evropiane.

Përfshirja e “Sunny Hill Festival” në agjendën zyrtare të një prej emrave më të njohur të muzikës po tregon ndikimin në rritje të festivalit kosovar në skenën ndërkombëtare.

14/06/2026

Revolucioni "Flamingo": Sot mbahet protesta në Këln të Gjermanisë

Protestat kundër projektit turistik në Zvërnec dhe politikës aktuale të Shqipërise janë shtrirë tashmë në disa shtete të botës.

Sipas organizatorëve, këtë të diel më 14 qershor, pritet që diaspora shqiptare të zhvillojë tubime njëkohësisht në 17 qytete të mëdha në disa shtete të botës.

Në Shtetet e Bashkuara të Amerikës dhe Kanada, protestat do të mbahen në New York, Chicago, Boston, Michigan dhe Toronto, ndërsa në Gjermani në Berlin, Mynih, Këln dhe Stuttgart, duke e bërë këtë vend një nga pikat kryesore të mobilizimit.

Protesta në Këln të Gjermanisë fillon sot në orën 17 dhe mbahet para Katedrales së Këlnit (Kölner Dom).

14/06/2026

12/06/2026

Ambasada e Kosovës në Gjermani: 12 qershori - dita kur nisi epoka e lirisë në Kosovë

Ambasada e Kosovës në Berlin uroi Ditën e Çlirimit të Kosovës, 12 qershorin dhe publikoi në faqen e saj disa fotografi që sjellin kujtimet e ditës kur Kosova nisi epokën e lirisë, 27 vite më parë. Më 12 qershor 1999, me hyrjen e trupave të NATO-s, përfshirë Bundeswehr-in gjerman.

Në këtë ditë "mori fund një periudhë e rëndë e dhunës, represionit dhe spastrimit etnik ndaj popullsisë civile të Kosovës, për të nisur kështu rrugëtimin drejt paqes, demokracisë dhe ndërtimit të një të ardhmeje më të sigurt“, shkruan në faqen e Ambasadës Kosovës në Gjermani.

"Në këtë ditë të veçantë, me respekt dhe mirënjohje të thellë kujtojmë lavdinë e Ushtrisë Çlirimtare të Kosovës dhe rolin vendimtar të aleatëve për lirinë, paqen dhe sigurinë e Kosovës. Lavdi e përjetshme dëshmorëve dhe të rënëve për liri!“

12/06/2026

Histori suksesi nga Gjermania: Adrian Simnica mban fjalim në Bundestag

Edhe një histori suksesi e të rinjve shqiptarë vjen nga Gjermania. 20-vjeçari Adrian Simnica, me prejardhje nga Kosova, është përzgjedhur si pjesëmarrës në programin prestigjioz “Jugend und Parlament” (Rinia dhe Parlamenti), i cili organizohet në Berlin dhe u mundëson të rinjve të njihen nga afër me proceset vendimmarrëse politike në Gjermani.

Pjesëmarrja në këtë program konsiderohet një privilegj i veçantë, pasi mbledh të rinjtë më të angazhuar dhe më premtues nga vende dhe komunitete të ndryshme, duke u ofruar atyre mundësinë të simulojnë punën parlamentare dhe të kontribuojnë me idetë e tyre në diskutime me rëndësi politike dhe shoqërore.

Adriani pati mundësinë të mbajë edhe një fjalim në Bundestagun Gjerman, duke përcjellë mesazhe për rolin dhe potencialin e brezit të ri në shoqëri.

Pavarësisht moshës së re, Simnica tashmë mban disa pozita me përgjegjësi të rëndësishme shoqërore dhe politike në Nordrhein-Westfalen (NRW), një nga rajonet më të mëdha të Gjermanisë, me rreth 600 mijë banorë në zonën ku ai vepron.

“Të përfaqësosh të rinjtë në një arenë të tillë nuk është vetëm nder, por edhe një përgjegjësi e madhe për të treguar se brezi i ri ka ide, guxim dhe fuqi për të sjellë ndryshime pozitive”, është shprehur ai.

12/06/2026

Kosovë: NATO paralajmëron zvogëlimin e trupave në Kosovë

NATO ka paralajmëruar zvogëlimin e numrit të ushtarëve në Kosovë, duke argumentuar se situata e sigurisë në vend po përmirësohet vazhdimisht.

Vendimi për reduktimin e trupave të KFOR-it vjen pas një shqyrtimi të plotë dhe një vlerësimi të bazuar në inteligjencë të situatës së sigurisë, njofton RTK.

"Ndërsa siguria në Kosovë mbetet përgjithësisht e qëndrueshme, NATO do të optimizojë praninë e KFOR-it në Kosovë dhe do të përshtatë gradualisht nivelin aktual të forcës së tij gjatë vitit të ardhshëm", thuhet në komunikatën e Shtabit Suprem të Fuqive Aleate në Evropë (SHAPE).

Ndërkohë, sot më 12.06.2026, shënohet 27-vjetori i hyrjes së NATO-s në Kosovë, kur trupat paqeruajtëse të NATO-s u vendosen në Kosovë pas bombardimeve kundër caqeve ushtarake e policore serbe në Kosovë dhe Serbi.

12 qershori i vitit 1999 ishte dita që shënoi fundin e luftës në Kosovë. Sulmet mbi infrastrukturën serbe nisën më 24 mars, dhe zgjatën deri më 10 qershor 1999.

11/06/2026

11/06/2026

Revolucioni „Flamingo“: Paralajmërohen protesta të reja në Gjermani

Protestat kundër projektit turistik në Zvërnec dhe politikës aktuale të Shqipërise i kanë kaluar kufijtë e Shqipërisë dhe po mbahen në shume qytete të Evropës dhe botës.

Në Gjermani janë mbajtur tashme disa tubime, e janë paralajëruar edhe protesta të reja.

Në ftesën për protestën në Hamburg më 13.06.2026 thuhet:

"Ftojmë të gjithë shqiptarët e Hamburgut, Hannoverit, Bremenit dhe zonave përreth të bashkohen në këtë protestë paqësore për drejtësi, dinjitet dhe një Shqipëri më të ndershme."

Më 14.06. do të mbahet edhe protesta e shqiptarëve në diasporë në Këln.

11/06/2026

Konsullata e Kosovës në Dyseldorf: Ftesë për takimin “Kafe me Diasporën” në Bonn

Konsullata e Përgjithshme e Kosovës në Dyseldorf i fton përzemërsisht të gjithë bashkatdhetarët të marrin pjesë në takimin “Kafe me Diasporën” në Bonn, ku do të jetë i pranishëm konsulli i përgjithshëm në Dyseldorf, Behar Isma.

Do të jetë kjo një mundësi e mirë për t’u takuar, për të shkëmbyer mendime dhe për të diskutuar tema me interes për komunitetin tonë, thuhet në ftesën e Konsullatës.

Takimi synon të forcojë komunikimin dhe bashkëpunimin me mërgatën, të dëgjojmë idetë, sugjerimet dhe shqetësimet tuaja, si dhe të krijojmë një hapësirë të hapur për bashkëbisedim në një atmosferë miqësore dhe të afërt.

Vendi: Cafe 5 Senses, Konstantinstraße 2, 53179 Bonn-Bad Godesberg

Data: E mërkurë, 17 qershor 2026 - duke filluar nga ora 18:00

11/06/2026

Gjermani: Më 1 korrik skadon ulja e çmimeve të karburanteve

Qeveria gjermane ka vendosur të mos vazhdojë subvencionet për uljen e çmimeve të karburanteve. Kjo do të thotë se nga data 1 korrik 2026, nuk do të të ketë më subvencione prej 17 cent për një litër karburante.

"Pas diskutimeve të gjata, kemi vendosur që zbritja e karburantit do të skadojë siç ishte planifikuar më 30 qershor", deklarojnë përfaqësuesit e partive në pushtet - CDU dhe SPD. Ata theksojnë se janë përgatitur të parandalojnë një rritje të mundshme të çmimeve, por nuk shpjegojnë si do të bëjnë këtë.