11/09/2026
د روسیې د بهرنیو چارو وزیر سرګي لاوروف وایي، روسیې د سپټمبر د ۱۱مې له بریدونو وروسته په افغانستان کې د امریکا په مشرۍ له نړیوال ائتلاف سره په بېلابېلو برخو کې همکاري کړې ده.
لاوروف په یوه مرکه کې ویلي، د روسیې ـ ناټو شورا د افغانستان په اړه یو پراخ پروګرام تصویب کړی و چې له مخې یې روسي چورلکې د نړیوال ائتلاف په واک کې ورکړل شوې، استخباراتي معلومات شریک او د ماین پاکۍ اړوند پروژې هم ترسره شوې.
د سپټمبر د ۱۱مې له بریدونو وروسته؛ لاوروف افغانستان کې د امریکا د پوځي حضور په اړه ویلي، واشنګټن له نړیوالې همکارۍ او د ملګرو ملتونو د امنیت شورا له ملاتړ څخه یوازې د ترهګرۍ پر وړاندې د مبارزې لپاره استفاده ونه کړه، بلکې خپلې جیوپولیټیکي موخې یې هم تعقیب کړې او په سیمه کې یې خپل حضور او نفوذ پراخ کړ.
لاوروف د امریکا پر دې تګلارې نیوکه کړې او ویلي یې دي چې وروسته ورته چلند په نورو برخو کې هم څرګند شو.
