08/10/2025
Dronët kamikazë të FSK-së, Osmani: Vuçiq beson se mund të kërcënojë një vend të madh të NATO-s si Turqia
Presidentja e Republikës së Kosovës, Vjosa Osmani, ka reaguar ashpër ndaj deklaratave të Presidentit serb Aleksandar Vuçiq, pas reagimit të ashpër të këtij të fundit ndaj Presidentit turk, Rexhep Tayip Erdogan në lidhje me sh*tjen e dronëve në Kosovë.Në një shkrim në X, Osmani theksoi se në të njëjtën ditë kur ish-presidenti amerikan Donald Trump kishte lavdëruar Turqinë dhe Presidentin Rexhep Taip Erdogan për “udhëheqje të jashtëzakonshme në promovimin e paqes globale”, Vuçiq “pa turp po sulmon Turqinë — një shtet anëtar të NATO-s që po ndihmon në mbrojtjen e paqes”.“Në të njëjtën ditë kur Presidenti Trump lavdëroi Turqinë dhe Presidentin Erdoğan për udhëheqjen e tyre të jashtëzakonshme në promovimin e paqes dhe sigurisë globale, Vuçiç po sulmon pa turp Turqinë — një vend që, si anëtar i NATO-s, po na ndihmon të mbrojmë paqen.Jam krenare që kam punuar ngushtë me Presidentin Erdoğan, një njeri fjale, i cili gjithmonë ka treguar kujdes të thellë dhe të sinqertë për të gjithë popujt e rajonit tonë dhe ka dhënë një kontribut të jashtëzakonshëm në ruajtjen e stabilitetit, sigurisë dhe paqes. Ndërkohë, Vuçiç duket se beson se mund të kërcënojë një vend të madh të NATO-s si Turqia, ashtu siç kërcënon vendet fqinje. Në vend që të bashkëpunojë ngushtë me shtetet anëtare të NATO-s, ai përparon në bashkëpunim ushtarak me Rusinë, Kinën dhe Iranin.Ne do të vazhdojmë të forcojmë lidhjet me aleatët e NATO-s, duke modernizuar kapacitetet tona mbrojtëse sipas standardeve të NATO-s, për të siguruar paqe dhe stabilitet për popullin tonë dhe për të kontribuar aktivisht në sigurinë kolektive. Vuçiç do të duhej të bënte të njëjtën gjë, në vend që të sulmojë vazhdimisht fqinjët e tij. Por, për mendjen e tij hegjemone, e mbetur në të kaluarën dhe e fiksuar pas ngacmimit të të tjerëve, një nivel i tillë pjekurie duket i paarritshëm.”
