ربي ما يبارك لحتا واحد يدير بين هدا و هدا ، و ما يباركش لمنافق و لي عندو مليون وجه ... ما يباركش لإنسان يضر انسان وحدوخر ، ما يباركش لبنادم ظالم ... ربي يأخر برك مي ما ينساش “ ثم يؤخرهم ليوم تشخص فيه الأبصار “ ... سما ما تحسبش ربي تغافل على الأذى تاعك .. رآه يمدلك فرصة و فرصة و فرصة ❤️
13/09/2025
... مكاش فينا لي عاش واش حب هو ، ڨع تمنينا حاجة و لقينا روحنا نعيشو في حاجة وحدوخرة ... ما على باليش ادا كاين لي لقاها كيما تمناها ! مي لي راني متأكدة منو ... هو انو ما جا يلحق لهاديك لعفسة خسر بزاف ، طاح ، جرا ، تعب و عيا ... حتا وين ما ولاش حابها باش جات هي ليه ، هاد دنيا صح جاية كيشغل معادلة رياضية باش تلحق للنتيجة الصح ، راح تضرب و تقسم و تطرح
و تجمع ... و مينداك تكون النتيجة صفر ! . ❤️
ريهام عبد القادر
12/09/2025
قبيل قريت statu ل شخص متزوج لخص رحلة الزواج من الشخص الصح ، بعيدا على الاعتقاد الخاطئ لي شفناه من بزاف ناس بسبة اختياراتهم الغالطة ...
مور زواج :
تعلمت كتابة سيناريو
أصدرت زوج كتابات
جوزت بزاف امتحانات في فترة قصيرة ، و طلعت مرتبة في خدمتي ...
زوجتي بعد الزواج :
تعلمت اللغة الفرنسية
تعلمت الخياطة
ولات دير سبور
تعودت على قراءة الكتاب
- تعلمنا بزاف حاجات مشتركة ، و بزيادة على رسم بالرصاص بورتريه ( بنتي صغيرة سبع سنين هي اصغر رسامة بورتريه في العالم )
الزواج ماشي نهاية تع حتا حاجة ، و ماشي حيط يتهدم على احلامك ... كاين زواج يخليك تزيد الفوق و تنجح ، كيما كاين زواج يطفيك و ينقص منك و يهد عليك دار كامل ماشي الحيط برك ... حكايتها اختيار برك ، خيري لي يزيد فيك هدا مكان ❤️
01/09/2025
اليوم فاتت عليا وحدة غريبة .. بصح نعرف اسمها و وين تسكن و دارهم كامل ، نعرف عيد ميلادها ، و واش تحب و واش تكره ، الحاجة لي تفرحها و لي تبكيها ، لقيت روحي نعرف طبايعها نعرف عقليتها ، نعرف أحلامها ، لقيت روحي نعرف أصغر التفاصيل لي تخصها ... بصح غريبة !❤️
24/08/2025
سيداو يقول المرأة مثل الرجل
و الاسلام يقول ليس الذكر كالأنثى
سيداو ينسب الاولاد إلى أمهاتهم
ربي قال " ادعوهم لأبائهم "
سيداو يمنح المرأة الحرية المطلقة بحيث لا ولاية لها
الاسلام يعز المرأة بالرجل فهو قوام
سيداو لا يوجد للمرأة العدة بعد الطلاق
الاسلام :“ و المطلقات يتربصن بأنفسهن ثلاثة قروء “
سيداو الورثة ڨع كيف كيف سواء أنثى ولا ذكر
الاسلام للذكر مثل حظ الأنثيين
سيداو يتزوج الرجل الرجل و كذلك المرأة
الاسلام “ أتأتون الذكران من العالمين “
سيداو الإجهاض يجوز
الاسلام يقول ولا تقتلوا أولادكم
سيداو الزنا عادي
الاسلام ولا تقربوا الزنا
مدام إحدى قوانين سيداو سارية من اليوم في الجزائر القوانين هادو جاية ف طريق عن قريب
جاء الإسلام غريب و سيعود غريب 💔
24/08/2025
باش يديرو المساواة بين الرجل و المرأة بداو بالسكن
و الجاي يعني و الجاي ؟ أسوأ طبعا ، يخي شكيل يخي دوك مدو ل صوصيالات حق الحرية زايدة و الانحلال و لي عجبها الحق الممنوح جديد هي من نفس الملة لي ذكرتها ، الغرب يبقي غرب و حنا مجتمع جزائري ملتزم خصنا صوصيال حنا ؟ سما جيتو كونطر واش قال ربي ف سورة الطلاق :﴿أَسكِنوهُنَّ مِن حَيثُ سَكَنتُم مِن وُجدِكُم وَلا تُضارّوهُنَّ لِتُضَيِّقوا عَلَيهِنَّ وَإِن كُنَّ أُولاتِ حَملٍ فَأَنفِقوا عَلَيهِنَّ حَتّى يَضَعنَ حَملَهُنَّ فَإِن أَرضَعنَ لَكُم فَآتوهُنَّ أُجورَهُنَّ وَأتَمِروا بَينَكُم بِمَعروفٍ وَإِن تَعاسَرتُم فَسَتُرضِعُ لَهُ أُخرى﴾ [الطلاق: 6]
23/08/2025
قريت اقتباس ريّحني بزاف يقول:
لي يظلمك، ربي يمدّلو وقتو يخليه يظن بلي عندو الحقّ و ربح عليك، بصح مع اليامات عدالة ربي تبان، ويرجعلك حقّك يا إمّا بطريقة مباشرة يا إمّا غير مباشرة ومن غير ما تتوقّع ، علابالك علاش؟ خاطرش ماشي لازم تخمّم ف الانتقام، مكاش أقوى من عدالة ربي وقدرتو. لي ظلمك راهو يتحدى ربي شكون يقدر يتحدى ربي؟ انتقام ربي عظيم لدرجة ما تامنش بلي حقك رجع ب طريقة ما تتخيلهاش وين تكون ناسي الحكاية هاديك أصلا .. ❤️
ريهام عبد القادر
22/08/2025
لازم تكون راضي على روحك..
قررت تخدم ف شركة وتكمل على الخمسة وتخرج باش تريح ؟ ماشي مشكل، ما تقولش علاش صاحبي عندو شركة بصح ليل و نهار عايش حياتو و ماشي قد المسؤوليات ، ولا علاش لوخر راهو خدام ف أروبا و شهريتو دوبل تع شهريتي
درت بروجي و حاب تلحق ل هدف ما تقعدش تخمم
ف ناس لي عندها وقت و حياتها ليبغ و نهار كامل يحطو تصاور تع خرجات و دخلات و كل نهار وين راهم .
قررت تتعلم لغة جديدة ؟ ركز عليها و على الأساسيات و القواعد و حوس على أفلام تقدر تعاونك في مسألة نطقها ، ما يهمكش واش دير بيها و واش فايدة تتعلمها و نتا مراحش لبلاد تدعم اللغة هاديك اصلا !
قررتي تتزوجي وتحوسي على الاستقرار؟ لازم تتقبلي التأثير على حياتك وأولوياتك، ما يهمكش صاحبتك لي ما عندهاش مسؤوليات و مشاكلها مع راجلها و شحال من خطرة سمعتي على خيانتو ليها ..
قررت تدير كلش مع بعض؟ لازم تقبل الضغط وقلة الراحة لخاطرش هدا هو اختيارك تخدم و عندك هدف و مقبل على مرحلة جديدة و راح تشارك حياتك مع انسان وحدوخر ، و راح تتعلم لغة جديدة ... ما نقدروش نطبقو واش حابين نديرو على تجارب غيرنا الفاشلة ماشي كامل عندنا أهداف و ماشي كامل عندهم الوعي تع انسان يرسم هدف و يسعالو باش يلحق ليه ، اللغة حاجة مليحة تزيد في مهاراتك الذاتية و تسحقها كاش نهار.بلاك هاديك اللغة تسمح لك باش دير فيزا في بلادها و تحتاجها كدعم ، ماشي اي واحد عندو تجربة مع زواج فاشلة تقعد خايف منها و طبقها على حياتك نتا يمكن هو اختيار تاعو خطأ ولا هو شخص غير متزن أصلا ... لازم تكون دايما راضي على روحك وعلى قراراتك باش ترتاح، ولا راح تعيش حياتك كاملة حاسس بالنقص و ما تقدرش تزيد للقدام في حياتك . ❤️
ريهام عبد القادر
21/08/2025
الغل مهما تحاول تخبّيه يبان..
يبان ف إحساسك، ف نظرتك لي ما تريحش، ف كلمة صغيرة وسط الضحك، في الغيرة ، ف التركيز الزايد مع غيرك، ف الحقد ، كي تكره انسان و تبينلو العكس ... الاحساس يبين كلش .
بزاف نفوس مريضة همّها الوحيد تشوفك طايح باش يحسّوا رواحهم فوقك وأحسن منك.. والمشكل؟ عمرو ما يبان عليهم هاد شي أصلا
ربي يكفينا شرّ خلقو ❤️
20/08/2025
تخيل معايا!
تخيل لو كنت تعرف كلش من اللول: وين تروح، شكون تلقى، شكون يولي صاحبك، وين تخدم.. حتى اللحظات لي تبدلك حياتك وتشكل شخصيتك. تخيل شفت روحك فكل موقف، عشت حبك الأول، ضعفك، دموعك وفرحتك.
تخيل بلي حياتك ولات كتاب مفتوح قدامك.. واش يبقى عندها معنى؟ الحب ما يوليش حب، الصدفة ما توليش صدفة، وحتى المعاناة ما تبقاش درس. كلش يولي عادي وما يبقاش كاين لا بحث لا دهشة.
Be the first to know and let us send you an email when ريهام عبد القادر posts news and promotions. Your email address will not be used for any other purpose, and you can unsubscribe at any time.
