12/05/2026
اليوم وأنا مروحة، تفكرت متابعة سألتني مرة: “كيفاش نجحتي في حياتك؟”
وقتها ضحكت بيني وبين روحي وقلت: “وشمن نجاح؟”
لكن وأنا ماشية تمهلت شوية، وجاتني لحظة إدراك…
أنا راجعة من الخدمة بنفس راتب طبيب بعد 6 سنين بطالة، والحمد لله 🤍
ربي عطاني الصحة، بينما بزاف ناس يوميا يصارعو أمراض وتعب نفسي وجسدي، والحمد لله.
تفكرت بلي زمان ماكانش عندي حتى مساحتي الخاصة، واليوم عايشة بهدوء، بغرفة كنت نحلم بيها، وبحياة خالية من المشاكل والصراعات. وهنا فهمت بلي النجاح ماشي غير دراهم ومظاهر… النجاح الحقيقي هو راحة البال.
بزاف بنات يظنو النجاح يعني لازم تكوني مشهورة، لابسة ماركات، ولا مسافرة كل شهر.
لكن أحيانا النجاح يكون:
• تفيقي الصباح مرتاحة وماكاش لي يكسرلك خاطرك.
• تقدري تشري حاجة كنت زمان تحشمي حتى تطلبيها.
• تولي عندك ثقة بنفسك بعدما كنت تخافي من رأي الناس.
• تتعلمي كيفاه تقولي “لا” لأي حاجة تأذيك.
• تبطلي تعيشي مقارنة مع البنات في السوشل ميديا.
أنا ماوصلتش لهاذ الشي بسهولة.
تخليت على عقلية الاعتماد على الغير، وبدأت نخدم على روحي وحدي.
قريت كتب، سمعت محاضرات، تعلمت، تعبت نفسيا، وبدلت طريقة تفكيري… لأن الإنسان كي يطور، عقله، حياته كامل تتبدل.
وصدقوني يا بنات، أخطر حاجة ديرها لنفسك هي تقعدي بالساعات تراقبي حياة الناس وتنسي حياتك أنتِ.
كاين بنات حافظين يوميات المؤثرات كامل، بصح ماعندهم حتى فكرة على أحلامهم هما.
نهار تبداي تغيري حياتك تبداي تنجحي وتتبدلي للأفضل، راح تتفاجئي بلي بعض الناس مايعجبهمش يشوفوك قوية… لأنهم تعودوا على النسخة الضعيفة منك 🤍
استثمري في نفسك:
ان شاء الله يكون ربي بعتني ليك كإشارة باش تستيقضي من الغيبوبة لي راكي فيها تعلمي لغة، ديري رياضة، حسني نفسيتك، تعلمي مهارة، افتحي مشروع صغير، ولا حتى ابدي غير بتنظيم حياتك… خطوة صغيرة كل يوم تقدر تبدل حياتك كامل بعد سنوات ✨
