17/01/2025
راح يفيدك 💪😍
كاين اربعة مشاكل كبار يعاني منها الأغلبية
1- ضائعين في دوامة من المعلومات ومزال مابداوش ❌
2- مكانش راس المال ❌
3- العقلية ❌
4- التطبيق والاستمرارية ❌
خاوتي: راح نجاوب عليهم بسرعة: ⏱️
💡1- المشكل الاول :💡
بكري كانت المعلومة ماكانش خلاص ، وضرك ولات غير هيا ، وهاذي حاجة عادية انك تكون تائه وهذا يحدث للجميع.
لكن لازم تعتمد طريقة 20٪ تعلم و 80% تطبيق .. وزيد حنا الجزائريين نحبوا نفهموا في كلش، نحبوا نعرفوا كلش وكي تجي الصح في التطبيق 0.
اختر اَي مجال المهم أبدا برك بصح (اعطيلوا الوقت ، ركز فيه ، وماتبدلش حتى تكون متاكد انك جربت وعاودت , جربت وعاودت x 100000)
هاذاك الوقت دير حاجة اخرى.
💡2- راس المال:💡
مانبداوش نتفلسفو بزاف كاين 2 حلول وانت خير: تروح تخدم برا بشهرية وتلم وجي تستثمر بشوي.
ولا تروح تشوف المجالات المجانية بصح بشرط انها تعطيك نتيجة على المدى البعيد ( الترافيك المجاني، seo ، ريسكين و التطبيقات ، يوتيوب ، النشر في الصفحات و القروبات ، ايباي ....)
💡3- العقلية:💡
بكل صراحة عقلية الجزائري ماتخرجش على العمل في الانترنات:
⛔ مزروبين
⛔ نفهمو في كلش
⛔ نحقرو بالعين
⛔ نحبوا نطيروا
⛔ نلعبوها بزاف
⛔ حاسبين رواحنا
⛔ محلبين ونحبوا نربحوا ليه ليه
⛔ نتدخلوا في حوايج خاطيينا
⛔ نسبوا بعضانا ، نلوموا بعضانا
⛔ واحد يحاسب في واحد
⛔ موالفين لازم يعطونا السكنا ويعطونا الخدمة وووو
⛔ و اهم شيى التدخل في الخصوصيات
⛔ حقرونا صديقي
واعرة علينا باش نبدلوا العقلية وصعيبة بزاف ولازمها الوقت لكن طريقة صحيحة انك تركز على نفسك وتسال نفسك انوا المشكل فيك ماشي الناس والمحيط. ⁉️🤔
الناس كآمل ولات تعرف بلي ادا حاب تنجح تنجح والعقلية الانهزامية و الاعذار ماولاوش ياكلوا. 🤮
💡4- الاستمرارية : consistency 💡
اذا سالت اَي محترف وقلت له ماهو سر النجاح؟ 💰
يعطيك نفس الإجابة consistency او الاستمرارية. 🇯🇵
اذا درت نفس الحاجة كل يوم لازم تجي النتيجة مثلا:
اذا كان عندك قناة يوتيوب وراك تطلع كل يوم فيديو. صحيح راح تفشل النهار الاول ، الثاني تزيد تحسنو وتفشل ، والثالث تزيد تبدل و 0 مشاهدة ،
وزيد 100 فيديو وماكن والو ، بصح كن متاكد إنّو بالوقت والاستمرارية تلقى روحك تطورت بزاف ونوعية الفيديوهات رايحة تكون أحسن من هذاك رقم 1. وبشوي تبدأ تبان النتيجة. 📆
وقس على كل المجالات.
وفقكم ♥
