18/08/2026
📌درك أنت راجل علاه تروح تفتح محل ألبسة ولا أحذية نسائية وتقعد تبيع فيه أنت ولا تحط فيه واحد راجل يخدم فيه؟ من قلّة المشاريع والأفكار يعني! معليش قال فيها خدمة ودراهم دير طفلة ولا بنات يخدمو فيه،
مافهمتش واش شعورك وأنت تنيڨوسي معاهم على بيجامة وتقترح عليها الألوان وليطاي وهي توصفلك المقاسات والشد والجذب وبلا مانحكيو على الدصارة من الطرفين!
والمحيّر أكثر المرأة اللي تشري ملابسها من محل يبيع فيه راجل وتقيس تما وتبدل وهادي عجبتني وهادي ماجاتش قدي... واش من دين تبّعي ختي؟ واللي قالتلهم أسكتو كامل هي الراجل اللي يدّي مرتو لهاد المحلات ويشوف بلي رجال اللي يخدمو فيها وفرحان عادي.. هذا من الطحين بزاف رجع فرينة.
أحشمو شوي ترضى أنت مرتك تشري ملابسها الداخلية من عند واحد راجل؟ ولا مرتك فالدار حارمها حتى من الهواء وأنت في المحل تفضلي ا مدام قلشيه ا مدام، أصلا هاد النوع تلقى أغلبيتهم نهار كامل جونتي مع زبوناتهم هيهي هاها طالق خدودو مع كل وحدة تدخل عندو.. برا يضحك مع أي حاجة فيها تاء التأنيث، بصح هو غير يدخل للدار تقول ضربو جنّي يزيّر وجهو يلعبها مقلق مايضحكش مكرّه حياة مرتو وولادو، أمثال هؤلاء ما تفهم تقول ربي يهديهم ولا ربي يدّيهم.
