05/06/2023
هذا جامع "كتشاوة" في العاصمة ..
يقولو بناوه في 1612 ، ودارولو توسعة في 1794 .. الله أعلم ..
"كتشاوة" بالعثمانية معناها " ساحة الماعز " ،
لأنو الساحة لي بناوها فيه كانت سوق قديم تاع ماعز 🐐 ..
🕌🕌🕌🕌🕌
كي دخلت فرنسا للجزائر ، الجنرال " دي روفيغو " حب يرجعو كنيسة ..
( " دي روفيغو " هذا راه 🐖 بن 🐖 ، دار المنكر في الجزائريين ،
مسؤول على عشرات المجـ ـازر ،
وحدة منهم مجـ ـزرة " قبيلة العوفية " لي كانو ساكنين في الحراش ،
قـ ـتلهم كامل ، شيوخ نساء ولاد صغار ، وسرقولهم كلش ..
الخواتم والفلايك تاع النساء تباعو في السوق واللحم لاصق فيهم ! ..
علاجال وش ؟
شك فيهم بلي سرقو واحد الهدية بعثهالو واحد الحركي !! )
المهم ...
الجزائريين تلمو بالآلاف قدام الجامع قالولو : " علاه دار باباك ول ؟ "
وش دارلهم ؟ كي العادة ... قتـ ـلهم كـ ـامل ..
صرات مـ ـجـ ـزرة كبيرة النهار هذاك ، أكثر من 5 ألاف جزائري قتـ ـلوهم قدام الجامع ...
وخرجوا المصاحف كامل حرقوهم في الساحة ..
و تحول جامع "كتشاوة" لكنيسة " سان فيليب " ...
🕌🕌🕌🕌🕌
بعد الإستقلال ، الجزائر عاودت رجعت جامع " كتشاوة "
أذن فيه "محمد برنيس " المعروف بـ "الشيخ البليدي" .. واحد من أشهر المؤذنين في الجزائر ...
وخطب فيه الشيخ " محمد البشير الإبراهيمي " الله يرحمو ...
و رتل فيه القرآن الشيخ " عبد الباسط عبد الصمد " الله يرحمو ...
