06/09/2025
🔴 كاين وحدة المنصّة غامضة سميتها Yango Play طاحت فجأة كي الساعقة من شهور قليلة، واليوم ولات من أكبر منصّات البث فالمشرق والمغرب العربي!
تدخل تشوفها تلقاها دايرة روحها "عربية" ومقرها دبي... وواش تلقى فيها؟ أفلام، مسلسلات كبار عندهم حقوق عرضهم، حتى إنتاجات أصلية وازينات... وزيد، مشي غير هك، راهي تقدّم حتى موسيقى وألعاب، وتفكر تزيد خدمات أخرى فالطريق...
⚫️ بصح السؤال اللي يحرق:
منين جات هاذ المنصة؟ شكون مولها؟ شكون يسير فيها بصحّة؟ وشكون راه يجمع الداتا تاع الناس اللي تستعملها؟
هل بصح "عربية" كيما راهم يبانولنا؟ ولا عندها يد خفية مرتبطة بالكيان الصهيوني؟
شد روحك مليح معايا لأن الموضوع هذا خطييير، ورايحين ندخلو لقصّة تبرد الدم:
🔹️ نرجعو للبداية...
الحكاية بدات فـ روسيا عام 1997 كي تأسسات شركة Yandex على يد "أركادي فولوز"... الرجل هذا أصله كازاخي، بصح هو ثاني عندو الجنسية الإسرائيلية ويعيش فـ تل أبيب!
المهم: الشركة هذي كانت "غوغل روسيا"، خدماتها كاملة: محرك بحث، خرائط، توصيل، طاكسي، تجارة إلكترونية... وراها شركة أم مسجلة فهولندا سميتها Yandex N.V.
🟢 الشركة هذي كبرت بزاف، وتوسعات لبرّا روسيا باسم Yango... بصح كي جات حرب أوكرانيا 2022، الغرب فرض عليها عقوبات، والشركة ولّت مهددة بالإفلاس، مما خلاها تدير إعادة هيكلة.
🟡 النتيجة؟
تفرقات الشركة:
1️⃣ Nebius Group: مقرها أمستردام، ويشرف عليها "فولوز" الإسرائيلي. هذي تخدم فالذكاء الاصطناعي والسيرفرات، ومركز أعمالها الأساسي في إسرائيل. حتى كاين تقارير تقول راهي تبني سوبر-كمبيوتر وطني لإسرائيل بفلوس ضخمة.
2️⃣ Yango Group: هذي اللي بقات محتفظة بالعلامة التجارية "Yango"، خدمات الطاكسي، الديليفري... ومن بعدها زادو أسّسو فرع جديد: Yango Play.
مقرها دبي، ورئيسها "دانييل شوليكو"، اللي كان أصلاً مدير فـ Yandex ويخدم مع "فولوز" مباشرة.
🔵 المفاجأة:
Yango Group عندها نشاط رسمي فـ إسرائيل! طاكسي، سوبرماركت ديليفري، وحتى شركات مسجلة باسمها فالأراضي المحتلة.
وبعدها بعام 2024، في عزّ حرب غزة، قرّرو يطلقو منصة Yango Play، ويقدموها كـ"منصة عربية" للمحتوى... وبداو يصرفو ملايين على الإعلانات والترويج حتى ولّات موجودة فكل دار عربية تقريبًا.
🟡 بصح الأموال هذي منين جات؟
على الورق المنصة تحت مسؤولية Yango Group فالإمارات.
لكن كي تحوس تلقى اسم غريب: Funtech Loyalty Card Services L.L.C.
شركة وهمية، ما تعرفش عليها والو، لا مالكها، لا تاريخها... وهي اللي مكتوبة فالـ Play Store كأنها المالك الحقيقي للتطبيق!
🔹️ والأخطر:
التطبيق يطلب منك صلاحيات تدخل لصورك، فيديوهاتك، ملفاتك، تسجيلاتك الصوتية، وحتى الـ GPS تاعك! يعني بصحّة انت تعطيهم مفتاح حياتك كاملة بيدك!
🔵 وكي زادو دققو فالصفحة الرسمية تاعهم فـ Facebook، لقاو حوالي 12 أدمن يسيروها من إسرائيل! وبعد ما تفضح الأمر، راهم مسحوهم بسرعة... بصح السكرينشوت بقا كدليل!
🟢 المعنى واضح:
التحكم في المنصة، فالخلفية، راه ممكن يكون إسرائيلي... والبيانات اللي يجمعوها على الملايين من العرب، راهي أخطر من أي سلاح.
⚫️ لأن البيانات اليوم تقدر تغيّر رأي الشعوب، توجه أفكارها، وتخليها تشوف الدنيا بالطريقة اللي هما يحبوها... تخيّل معايا، محتوى ترفيهي بريء في الظاهر، بصح فالحقيقة يخدم أجندة مدروسة باش يغيّر قيمك ومفاهيمك على الدين، العائلة، والوطن...
🟠 السؤال الكبير:
هل بصح Yango Play منصة "عربية بريئة"؟
ولا راهم دايرين بينا أكبر عملية غسيل أدمغة وسرقة بيانات فالعالم العربي تحت ستار "الأفلام والموسيقى"؟
🔹️ بصراحة، لازم توضيح رسمي وشفاف من إدارة المنصة...
لأن الحكاية خطيرة ومايش لعب.
---
VisaTik
