07/07/2025
El Club Baloncesto Breogán SAD incorpora al sustituto de Nakic 🏀💪🏻
O internacional croata Dario Drežnjak únese ao Río Breogán
O Río Breogán reforza o seu plantel coa incorporación do ala-pivote croata Dario Drežnjak (Mostar, Bosnia e Herzegovina, 24 de marzo de 1998), un xogador de 2,04 metros de estatura e 27 anos. Trátase dun ala-pivote intenso, que destaca polo seu lanzamento exterior e pola súa capacidade para axudar no rebote.
Formado no club bosnio Široki, Drežnjak deu o salto ao KK Zadar, co que competiu na liga croata e na Liga ABA. Alí protagonizou unha notable evolución, sendo o segundo máximo anotador do equipo na tempada 2022/23, con medias de 14,3 puntos e 4,7 rebotes na liga croata, e 13,2 puntos e 4,7 rebotes na Liga Adriática. Na campaña 2023/24 mantivo a súa regularidade con 12,7 puntos e 3,7 rebotes na liga nacional, e 14,1 puntos e 4,5 rebotes na competición adriática, con porcentaxes de acerto en triplos arredor do 37 % en ambas tempadas.
Durante a pasada tempada, xogou na liga italiana co GeVi Napoli (7,9 puntos e 3,1 rebotes en 8 partidos, cun 42,9 % en triplos) e co Vanoli Cremona (8,1 puntos e 3,1 rebotes en 12 partidos, cun 32,6 % en triplos). Posteriormente, disputou a liga regular de Chipre co Keravnos BC, onde asinou medias de 9,4 puntos e 4,3 rebotes en 21 minutos por partido, cun 37,5 % en triplos nos 10 encontros que disputou.
Drežnjak foi internacional con Bosnia e Herzegovina en categorías inferiores e actualmente defende as cores da selección absoluta de Croacia, país do que tamén posúe a nacionalidade. Participou en torneos clasificatorios para o Eurobasket e os Xogos Olímpicos.
Dario Drežnjak destaca polo seu lanzamento exterior, amosándose ao longo da súa carreira como un tirador fiable desde máis alá dos 6,75 metros. Ademais, posúe unha boa capacidade física que lle permite xogar con intensidade e contribuír nas tarefas defensivas e no rebote.
