25/09/2026
O Carballiño aposta por seguir reforzando os servizos de seguridade e emerxencias, tras a moción presentada por Espazo Comun.
A Corporación municipal acorda por unanimidade impulsar novas medidas para mellorar a atención á veciñanza e a coordinación dos distintos servicios.
O Concello do Carballiño seguirá traballando no reforzo e mellora dos servizos de seguridade e emerxencias municipais. Así quedou reflectido no pleno celebrado este mércores, no que a Corporación aprobou por unanimidade unha proposta de Espazo Común orientada a continuar incrementando os recursos destinados a estes servizos.
O acordo contempla solicitar a cobertura das prazas vacantes na Policía Local e no Grupo Municipal de Emerxencias, así como trasladar á Deputación de Ourense a conveniencia de ampliar os recursos humanos do Parque de Bombeiros. Tamén se solicitará ao Ministerio do Interior que valore un incremento dos efectivos da Garda Civil destinados no Carballiño.
Durante a sesión, o concelleiro de Seguridade, Alberto Otero, explicou que a Policía Local conta actualmente con 13 axentes e avanzou que o Concello solicitará á Axencia Galega de Seguridade a incorporación de novas prazas mediante o sistema de mobilidade.
O responsable municipal destacou igualmente as actuacións que se están a desenvolver para seguir mellorando a seguridade no municipio, entre elas a instalación de cámaras de videovixilancia en distintos puntos do Carballiño e a adquisición de novo material para a Policía Local.
O alcalde en funcións, José Castro-Gil, sinalou pola súa banda que xa se trasladou á Subdelegación do Goberno a conveniencia de reforzar os recursos da Garda Civil no municipio.
O acordo plenario aposta ademais por unha maior coordinación entre os diferentes corpos e servizos, co obxectivo de optimizar os recursos existentes e ofrecer unha resposta cada vez máis eficaz ás necesidades da veciñanza.
Outras cuestións abordadas no pleno
A sesión municipal incluíu tamén o debate doutras propostas. Espazo Común levou ao pleno unha iniciativa para solicitar á Confederación Hidrográfica Miño-Sil e a Augas de Galicia unha nova infraestrutura de almacenamento de auga que permita atender as necesidades futuras do municipio e favorecer o desenvolvemento do Parque Empresarial. A proposta non foi aprobada pola maioría da Corporación.
Tamén foi rexeitada a moción presentada por Sofía García para impulsar medidas relacionadas coa conciliación familiar, que contou co apoio de Espazo Común.
Na parte económica, o pleno deu luz verde á Conta Xeral correspondente ao exercicio 2025, cun volume de 16,6 millóns de euros. A cifra parte dun orzamento inicial de 11,2 millóns, incrementado posteriormente en 5,4 millóns mediante modificacións de crédito.
A sesión rematou coa aprobación das correspondentes facturas pendentes dos exercicios 2024 e 2025, puntos nos que Espazo Común e Sofía García optaron pola abstención.
