07/08/2026
Magaalaa Mattuu
Carraan hojii dargaggootaa babal'achaa jira!
Bulchiinsi Magaalaa Mattuutti carraa hojii ogummaa bu'uureffate babal'isuun hojii dhabummaa hir'isuufi dargaggoota of danda'anii of jijjiiranii maatii fi biyya isaanii jijjiiran uumuuf hojii bal'aan hojjetamaa jira.
Sagantaa Paartii Badhaadhinaa keessatti dargaggoonni humna oomishaa, humna jijjiiramaa fi bu'uura badhaadhina biyyaati waan tahaniif carraa hojii waaraa uumuufi dandeettii isaanii guddisuurratti xiyyeeffannoon addaa kennamee hojjetamaa jira.
Haaluma kanaan Bulchiinsa Magaalaa Mattuutti Manni Maree Carraa Hojii Uumuu fi Ogummaa Magaalichaa gamaaggama raawwii hojii bara 2018 fi marii karoora hojii bara 2019 gaggeesseera.
Waltajjicharratti hojiiwwan bara darbe keessatti raawwataman irratti gamaaggamni bal'aan taasifamee, hanqinoota mul'atan adda baasuun kallattiin hojii fuulduraa kaa'ameera.
Waltajjii kanarratti Kantibaan Bulchiinsa Magaalaa Mattuu Obbo Tashaalee Ejarsoo mootummaan hojii uumuu fi dinagdee dargaggootaa cimsuuf xiyyeeffannoo olaanaa kennee hojjechaa jiruun bu'aa gaarii agarsiisaa jiraachuu kaasuun, pootenshaala hojii magaalaan qabdu sirnaan adda baasuun hojii dhabummaa hir'isuufi dargaggoota gara hojii fi galii itti fufaa argachuutti ceesisuun hojii ijoo ta'uu kaasaniiru.
Akkasumas mootummaan ijaarsa dinagdee hundagaleessaa fi badhaadhina biyyaa mirkaneessuuf hojii uumuu akka furtuu guddinaatti fudhatee hojjechaa jiraachuu kaasuun, dargaggoota humna oomishaa fi jijjiiramaa taasisuuf carraa hojii waaraa uumuu, ogummaa isaanii cimsuu, hojii dhuunfaa akka uuman jajjabeessuu fi invastimantii keessatti hirmaachisuurratti xiyyeeffatee hojjechaa jiraachuu ibsaniiru.
Dabalataanis, hojii dhabummaan sirna qindaa'een hoogganamuu akka qabu kaasuun, hojii barbaaddota sirnaan galmeessuu, pootenshaala hojii sadarkaa ganda irraa kaasee adda baasuu, humna namaa baratee fi leenjii gahaa argate fayyadamuun hojii uumuu irratti ciminaan hojjechuun murteessaa ta'uu hubachiisaniiru.
