07/08/2026
GAMTAA BARSIISA ISLAAMUMMAATIIN!
Kutaa 1ffaa...
===========================
Barbaachisummaa gamtaa, balaa gamtooma dhabuun fiduu fi bu'aa gamtooma qabaachuun qabu kutaawwan kana dura maxxansine keessatti ilaallee jirra. Inni kutaawwan darban keessatti ilaalle haalota walii galaa keessaa muraasa yoo tahu; kutaa kanaa fi kutaawwan itti aanan keessatti ammoo; 'GAMTAA BARSIISA ISLAAMUMMAATIIN' kan jedhu waliin ilaalla.
Bu'uurri islaamummaa gamtaa fi wal marii (shuuraa) irratti kan bu'uureffame yoo tahu; barbaachisummaa gamtaa ibsuuf ragaa kam caalaayyu ragaan barsiisa islaamummaa keessaa argamu madda (source) qorannoo dhimma gamtoomaa irratti taasifamu kamiifuu ragaa qabatamaa fi beekumsa irratti hundaa'edha. Barsiisa islaamummaa keessatti dhaloota irraa eegalee hanga hafuura baafannaa dhumaatti ilmi namaa gamtaan akka jiraatu fi gamtooma wal mariin(shuuraan) akka cimsatu barsiifama.
Jalqaba uumamaatii hanga ammaatti; ammaa hanga xumura fuula lafaatti barsiisa gamtoomatti waamu malee; barsiifna faffacaati fi sochii dhuunfaatti affeeru hin jiru hin jiraatus. Kana jechuun, bu'uurri cimaan daddaaqinsa fi hoollannaa hin mudaanne ijaara jabaa gamtooma irratti bu'uureffame tahuu agarsiisa. Fakkeenyota barsiifni islaamaa gamtaa ti affeeruu agarsiisa keessaa muraasa akka armaan gadiitti haa ilaallu mee!
*wal mariin(shuuraan)dhimmoota islaamummaa keessatti akkaan barbaachisaa tahuu isaa:- Shuuraan(wal mariin) aadaa dhimmoota hawaas-diinagdee islaamaa ittiin furuuf, cimsuuf, utubuuf, soroorsuuf itti wal mari'atan yoo tahu; eegaa wal mariin nama tokkoon gaggeeffamu waan hin jirreef; marichi(shuuraan) nama sadi(3) sanaa oliin taa'ama jechuudha. Kuni agarsiiftuu sirrii barsiifni islaamaa gamtooma cimsee barsiisu fi itti waamuu akkasumas gamtoomatti haajamuu agarsiisudha.
*Salaata dhuunfaan salaatamu caalaa; salaanni jama'aan(tuutan) salaatamu irra gorfamaa tahuu:- Namni tokko kan kophaa isaatti salaatu fi kan tuutaan salaatu mindaan isaa wal adda tahuun barsiisa islaamaa keessatti argama. Kana jechuun, namni salaata zuhrii yeroo isaa eeggatee kophaa salaate fi haaluma wal fakkaataan inni biraa salaata zuhrii yeroo isaa eeggatee tuutan salaate tokko yeroo wal fakkaataa fi salaata wal fakkaataa salaatee otuu jiruu isa tuutaan salaate sanatu irra mindeeffamaadha jechuu dha. Inni kuni agarsiiftuu sirrii fi guddaa islaamummaan gamtoomatti ajajuu ti. Itti fufa...........
