29/08/2025
ባለቤቴን ምን ላድርገው?
እኔና ባለቤቴ ከተጋባን 10 ዓመት ሞልቶናል። ሁለት ቆንጅዬ ልጆችን አፍርተናል። ልጆቻችን በጣም አስተዋዮችና መልካም አስተሳሰብ ያላቸው ናቸው። ለልጆቼ ተጣልቶ ማደር እንደማይቻል አስተምሬያቸዋለሁ።
እና ሁሌ ማታ ማታ ከመተኛታቸው በፊት እርስ በርስ የተቀያየሙትን ተነጋግረው ይቅርታ ተባብለው ከዛ ፀልየው ነው የሚተኙት። እኔ ግን ምንም እንኳን ለነሱ ይህን ባስተምርም የኔ ውስጥ ግን አብዛኛውን ጊዜ ነገር ይዞ ነው የሚተኛው። ከባለቤቴ ጋር ከተጋባን ይህንን ያህል አመት ብንቆይም ሁልጊዜ ቤታችንን የሚበጠብጡ ሴቶች አይጠፉም። ባለቤቴ የቤተክርስቲያን አገልጋይ ነው። ስለዚህ ብዙ እህቶች ለፀሎትም ሆነ ለምክር ያገኙታል። በጣም ተደጋጋሚ ከሴቶች ጋር የሚፃፃፈውን ሜሴጅ አገኛለሁ። አብዛኛው የመመካከር ሳይሆን የመዋደድ መልእክቶች ናቸው።
ሕይወቴን የበጠበጡትንና እየበጠበጡ ያሉትን ሴቶች እዚ ላይ ታግ አድርጌ ባጋልጣቸው ደስ ይለኝ ነበር ግን እንደነሱ አይነት ስነ ምግባር ያለኝ አይነት ሰው አይደለሁም።
ያው እንዳልኳችሁ ለምክርና ለእርዳታ ይመጡና የቤታችን ርዕስ ሆነው ይቀራሉ። ከነሱ ጋር ያለውን ነገር እንዲያቆም ደጋግሜ ብጠይቀውም ውሸት ከመደርደር ውጪ ምንም አያደርግም። ትቻለው ባለበት ሌሊት ሳይሰርዝ የተዋቸውን የፍቅር መልእክቶች አገኛለሁ። ለመንኩ አስለመንኩ ግን በአፉ እንጂ በልቡ ከነሱ ጋር ነው። አሁን እያመመኝ መጣ፣ በዚች 2 አመት ውስጥ በጣም የተግባባት እህት አለች።
ትልቅ ልጅ አላት። ልጇ እስቸጋሪ ነው እሱን ለመርዳት የተጀመረ ግንኙነት ጠነከረ። እወድሻለሁ እወድሃለሁ መባባሉ እንደቀጠለ ነው። ቁርስ በላሽልኝ፣ ምሳ በላሽልኝ፣ እራት በላሽልኝ፣ ተኛሽልኝ፣ ተኛህልኝ፣ ቤት ከመግባቴ በፊት ድምፅሽን ልስማ ብዬ ነው? እሺ እንትናዬ። ቤት ስትገባ ተኝተዋል እንዴ? አዎ ተኝተዋል። አይዞህ እንትናዬ መባባሉ በዛ። እነዚህ መልእክቶች
ሳይሰረዙ ከሚያመልጡት መካከል ያነበብኳቸው ናቸው።
በጣም ሲመረኝ ልጆቼን አስቀምጬ መጀመሪያ ምንም ነገር የነሱ ጥፋት እንዳልሆነ ካስረዳኋቸው በኋላ ልንለያይ ነው ካባታችሁ ጋር ስላቸው ትልቋ ልጄ 8 ዓመቷ ስቅስቅ ብላ አለቀሰች። ፈጣሪ ሁሉን ያስተካክላል እኔ እፀልያለሁ ብላ አለቀሰች። ልጄ 8 ትሁን እንጂ በጣም ታስተውላለች። ለነሱ ስል ብዙ አመት ኖርኩኝ። የራሱን ጥፋት ለመደበቅ ሲል ብዙ ይዋሻል። ሰው ሰላም ሲሆን ደስ አይልሽም? ሕይወቴን ልትበጠብጪ ነው የፈለግሽው፣ ከሷ ገር ምንም ግንኙነት የለኝም ይለኛል። ዛሬ ከሌሊቱ 7 ሰዓት ስነቃ የተረሳ መልክት አገኘሁበት።
ለምን ስልኩን ታያለሽ አትበሉኝ። በነገራችሁ ላይ ቤት አካባቢ ሲደርስ የተደወለውን እና ሜሴጆችን ይሰርዛል።
በዚህ ሳምንት ታዲያ ለልጄቼ ያሰራሁት የመኝታ ቤት ጌጥ ነበረ እና ዋትስ አፕ ላይ እሱን ፎቶ አንስቶ አግኝቻት አላቅም ለሚላት ሴትዮ ልኮላታል። ከፎቶው በላይ ቪዲዮ ኮል ተደዋውለው ከዛ ###x አሳየሽኝ አይደል ያምራሉ አንድ ቀን ባካል አየዋለሁ ይላታል እሷም እሺ ትላለች።
እሺ እንዴት ብዬ ልተኛ? ምን ላድርግ? ለልጆቼ ብዬ እስከምን ጥግ ድረስ ነው መጎዳት ያለብኝ? ይኸው ከዚችኛዋ ጋር 2 አመት ሞላን ስታበጣብጠን። ደጋግሜ ቤታችንን እየበጠበጠች መሆኑን ነገርኳት ግን ልትሰማኝ አልፈለገችም። እሱ እንደለመደው በውሸት ላይ ውሸት ያቀላጥፋል።
ይቺ ሴት ስትጠራው ታማ የተኛች ልጁን ከነትኩሳቷ ትቷት ይሄዳል። ብዙ ጊዜ በብዙ ሰዎች አስመከርኩት፣ በቤተሰብ፣ በቤተክርስቲያን መሪዎች፣ በጓደኛ ብቻ ብዙ ሞከርኩ ።ለሁሉም የተለያየ ታሪክ ይተርካል። ልጆቼ ምክኪኖች ምን ላድርግ? ከዚ በፊት የነበረች ነበረች 7 ዓመት ትዳር የሆነችብኝ። እሷ ስትቀር ይቺ መጣች። ልጆቼ ያላባት ማደግ እንደሚችሉ እንዴት ላሳውቃቸው።
ስነልቦናቸው እንዳይጎዳ ምን ላድርግ?
ሸርርርርር
እህታችሁ ነኝ ምክሩኝ
