https://www.gadanewsservice.wordpress.com/

Gada News Service, Hachalu Street, Addis Ababa (2025)

26/02/2025

Qoqqoodinsaa fi walitti gaarreffannaa Bulchiinsa Tigiraay

Barreeffama yaada kana keessatti, Benedict Michael, barreessaa walaba ta’e, rakkoo siyaasaa guddachaa dhufe Tigray, bakka qoqqoodamiinsi keessoo Adda Bilisummaa ummata Tigiraay (TPLF) keessatti bulchiinsa laamsha’uu fi balaa waldhabdee haaromfame olkaasuu qorate.

Barreeffamni kun akkamitti naannoon amma gareewwan lama gidduutti akka qoodamu kan ibsu yoo ta’u, Debretsion Gebremichael (PHD) zoonii giddugaleessaa fi kaaba dhiha kan to’atu yoo ta’u, Getachew Reda, Pirezidaantii Bulchiinsa Yeroo Tigray, naannoo kibbaa, dhihaa, bahaa fi kibba baha ni bulcha. Bulchiinsa tokkummaa qabu hundeessuun dadhabuun dhaabbilee mootummaa daran laaffiseera.

Barreeffamni kun falmii siyaasaatiin alatti, qaamoleen humnoota Tigray gama fudhatanii akka hammaatan hubachiisa. Gareen ajajoota waraanaa “core and upper core” jedhanii of waaman garee Debretsion’f deeggarsa isaanii ifatti kan labsan yoo ta’u, jeneraalota Wedi Asheber dabalatee qondaaltonni sadarkaa olaanaa qaban biroo tarkaanfii kana mormaniiru. “Siyaasa keessatti hirmaannaan waraanaa dursa balaa qabudha,” jechuun barreeffamni kun akeekkachiisa, paartii fi mootummaa adda baasuu dhabuun waraana naannichaa caccabuudhaaf saaxilamaadha jedheera.

Falmii keessoo bira darbee adeemsi kun too'annoon ala ta'aa jira waan ta'eef yaaddoo humnoonni alaa gidduu seenuun hookkara hamaa kaasuu danda’a jechuun ibse. Gabaasni akka agarsiisutti gareen Debretsion paartii bulchaa Eertiraa, Front for Democracy and Justice (PFDJ) waliin kan bobba’e yoo ta’u, gareen Getachew ammoo Paartii Badhaadhina Bulchaa Itoophiyaa (PP) fi mootummaa federaalaatti dhihaateera. Barreeffamni kun akka akeeketti, qindaa’inni akkasii Tigraay gara dirree waraanaa waldhabdee bakka bu’ummaatti jijjiiruu akka danda’u, “dhiibbaan alaa kun yoo itti fufe, naannichi jeequmsa haaromfame bu’aa fagoo ta’een mudachuu danda’a” jechuun akeekkachiisa.

25/02/2025

Gareen Adda Bilisummaa Uummataa Tigraay(ABUT) Dabratsiyoon Gabramikaa'eeliin durfamu mootummaa Eertiraa waliin hojjechaa jiraachuu maddeen odeeffannoo nageenya biyyaalessaa Itoophiyaa himan.

Akka maddeen nageenyaa ibsanitti, gareen caasaa nageenya Itoophiyaa waggoota dheeraaf hoogganaa kan turan Obbo Getaachaw Asaffaa fi qondaala buleessa ABUT Sibhaat Naggaatiin durfamu mootummaa Asmaraa garee Dabratsiyoon faana waliin walqabsiisuuf hojjechaa tureera.

Hoggantoonni olaanoo murna ABUT Dabratsiyoon Gabramikaa'eeliin durfamuu gara Asmaraa deemuun bulchiinsa yeroo Tigraay akkamitti akka aangoo irraa kaasan maryachuus maddeen ibsaniiru.

Kanumaan wal qabatee bulchiinsi yeroo Tigraay keessatti deeggartoota hedduu akka qabuu fi kutaan dargaggootaa waraana akka hin barbaanne marii kana irratti kaafamuu isaa dhagahame, kunis bulchiinsa yeroo aangoo irraa kaasuuf rakkisaa ta’a jechuun walgahii Asmaraa irratti dubbatamutu ibsame

Kana malees qondaaltonni mootummaa Eertiraa fi hoggantoonni olaanoo murna ABUT kan Dabratsiyoon Gabramikaa'eeliin durfamuu Faannoo waliin hariiroo akkamitti uumuun akka danda’amus maryachuu maddeen nageenyaa nutti himan.

Wayituma kana Faannoon garee hedduutti qoodamee waan jiruuf gamtaa waliin uumuun rakkisaa akka ta'e, rakkoon inni kaan ammoo Walqaayitii fi Raayyaa waliin walqabatee humnoota naannoo Amaaraa waliin waliigalteerra ga’uun rakkisaa ta’a jechuun dubbatamaa akka ture maddeen nageenyaa ibsaniiru.

Haa ta'u malee, carraaqqiin kun itti fufee akka jiru dhaga'ameera.

25/02/2025

Walgahiiwwan hawaasaa jechuun walgahiin tibbana biltsiginnaan taa'amaa jiru naannoo Oromiyaatti afaan marii Afaan Amaaraa ta'uu maddeen himan.

Maddeen waltajjicha irratti hirmaatan dur yoo xiqqaate Afaan keenyaan mariyanna turre, amma sunuu hafee hirmaattonni Afaan Amaaraa akka fayyadaman dirqisiifaman jedhan.

Afaan Oromoo afaan hojii mootummaa federaalaa ta'a jedhamee eeggamaa ture hafee qe'ee keenyattuu dubbachuun hafe jedhan.

24/02/2025

Godina Salaalee Aanaa Dharraatti bulchiinsi aanichaa naannoo Amaaraa magaalaa Reemaa deemuun humnoota finxaaleyyii waliin marii adda addaa taasisaa jiraachuu maddeen himan.

Gareen garas imale kun dabballoota mootummaa, jaarsolii fi abbootii amantii jedhamanii filatamuun imalani jedhu.

Marii isaanii kana dhoksaan taasisuu kan himan keessa beektonni humnoonni finxaaleyyii viidiyoowwanii fi suuraa addaa addaa gadi baasuun miidiyaa hawaasaa irratti qoodani jiru jedhan.

Marii gareen kun dhoksaan taasisan kun dhalattoota Oromoo aanichaaf rakkoo dabalataa fida malee furmaanni dhufu hin jiru kan jedhan maddeen, callisanii ilaaluun gatii caalu uummata kaffalchiisuuf jira jedhaniiru.

Jaarsolii biyyaa, abbootii amantaa fi dargaggoota uummata biratti dhageettii qaban hidhaatti naqanii garee biraa uumuun humnoota kana waliin marii taasisuun balaa caalu hordofsiisa jedhaniiru.

Kantiibaa duraanii Magaalaa Gundo Masqalee Obbo Daamxoo Tashoomaa, Luba Darrasaa fi Yeshaanoo kanneen jedhaman warreen bulchiinsa aanaa Dharraan bakka buufamanii gara naannoo Amaaraa Reemaa jedhamu deemuun humnoota finxaaleyyii kanaan marii taasisaa turan keessaati.

Caasaawwan mootummaa aanaa Dharraa humnoota kana waliin walitti hidhachuun uummata Oromoo aanichaa irratti dararaa addaa addaa raawwataa turan jiru.

Dhalattoota Oromoo qabata Waraana Bilisummaa Oromoo waliin hariiroo qabuutiin irratti duulanii kumaatamaan qe'ee irraa buqqisanii, kumaatamaan immoo mana hidhaatti guuraniiru jedhan jiraattonni.

Mariin caasaaleen mootummaa aanichaa humnoota kana waliin taasisaa jiran kun qaama aanaa Dharraa gara bulchiinsa naannoo Amaaraa jala galchuuf tattaaffii taasifamaa jiru ta'uu himu.

Kanaaf haal duree mijeessuuf immoo uummata gandoota akka; Jirruu Daadaa, Warree Gabiroo, Manqaata, Bachoo, Baabbuu, Dirree, Iluu Waayyuu, Iluu Goodaa Caffee, Abbaadhoo, Goddiimaa, Baayyoo,Harboo Dasoo, Birjee fi gandoota biroo qabata WBO jedhuun meeshaalee gurguddaan rukkutaa qe'ee isaa irraa buqqaasaa turaniiru jedhan.

Gareen ‘YeDera Asmelash Committee’ jedhee ijaarame Aanaa Dharraa bulchiinsa naannoo Amaaraa jala galchuuf hojjechaa jira jedhaniiru. Qaamoleen bulchiinsa aanichaa garaagaraas dhoksaan garee kana waliin hojjatu jedhee uummanni komata.

Kaayyoon humnoota finxaaleyyii kanaa aanaa Dharraa bulchiinsa naannoo Amaaraa jala galchuu akka ta'e irra deddeebiin himaa kan turan, amms gandoonni baay'een to'annoo isaanii jala jiraachuu jiraattonni himu.

23/02/2025

Waliigaltee Marii Kora Waliinii

Jilli jaarmayaalee hawaasa Oromoo adda addaa, Adda Bilisummaa Oromoo (ABO) fi Kongirasii Federaalistii Oromoo (KFO) rakkoolee siyaasaa fi waraanaa Oromiyaa keessa jiruu fi jiruuf-jireenya ummataa irratti danqaa ta’e irratti yaada furmaataa barbaaduuf Gurraandhala 19, 2025 kaasee hanga Gurraandhala 22, 2025tti guyyoota afuriif marii bal’aa Hoteela Ililliitti taasifneerra. Marii taasifame kana keessatti haalli amma Oromiyaa keessa jiruu fi ummatni Oromoo itti jiru haala lubbuun namaa guyya guyyaan itti badaa jiru, haala namni hojjatee jiraatuu itti dadhabe, haala ummatni wabii jireenyaa itti dhabee waan godhu wallaale keessa jiraachuu isaa gadi fageenyaan hubachuu dandeenyeerra. Ummata Oromoo rakkoolee fi danqaa hamaa kana keessaa baasanii nagaa waaraan akka bu’uu danda’uuf akka armaan gadiitti irratti waliif galleerra.

1. Nagaa buusuu fi nagaa tiksuu ilaalchisee
a. Jilli Jaarmiyaalee Hawaasa Oromoo adda addaa irraa walgahii kana irratti argamne ummatni Oromoo haqaa fi bilisummaa isaa dhabee erga Sirna Naafxanyaa jalatti kufee kaasee hanga har’aatti qe’een isaa akka nagaa dhabee fi jeequmsa keessa akka jiru hubannee; nagaa waaraa jiruu fi jireenya ummataatiif barbaachisu buusuuf bilisummaa fi haqi ummata Oromoo sarbame guutummaatti deebii argachuu akka qabu amannee; waraanni Oromiyaa keessaa dhaabatee nagaan akka bu’uu fi nageenyi ummataas haala amansiisaa ta’een akka tikfamuu qabu waliigaluun dhimma kana ABO fi KFOn dirqama ofitti fudhatanii wantoota humni isaanii danda’e hunda akka raawwatan amaanaa itti kennanneerra.
b. Jilli Jaarmiyaalee Hawaasa Oromoo adda addaa irraa walgahii kana irratti argamne rakkoo siyaasaa fi bulchiinsaa Oromiyaa keessa jiraniif furmaata maayii kennuun barbaachisaa akka ta’e hubannee ABO fi KFOn, ummatni Oromoo mootummaa isaa haala dimokratawaa fi bilisa ta’een hanga filatutti akkasumas tajaajila ummataa barbaarbachisu kan kennu Mootummaa Cehumsaa Waloo Oromiyaa, Paartilee Oromiyaa fi qaama dhimmi ilaallatu hunda hammate yeroo murtaa’eef akka hundeessan amaanaa itti kennanneerra.

c. Jilli Jaarmayaalee Hawaasa Oromoo adda addaa irraa walgahii kana irratti argamne Waraanni Bilisummaa Oromoo (WBO)n nagaa amansiisaa Oromiyaa keessatti buusuuf qooda olaanaa akka qabu amanuun, ABO fi KFOn waraanni kun bulchiinsa siyaasaa Mootummaa Cehumsaa Waloo Oromiyaa hundeeffamu jalatti itti gaafatamummaa fudhatee seera, nagaa fi dangaa Oromiyaa akka tiksuu danda’u haala barbaachisaa akka qindeessanii fi guutaniif amaanaa itti kennanneerra.

2. Rakkoo Magaalaa Finfinnee fi Daangaa Oromiyaa furuu ilaalchisee
a. Jilli Jaarmiyaalee Hawaasa Oromoo adda addaa irraa walgahii kana irratti argamne Magaalaan Finfinnee seenaanis ta’e seeraan qabeenya ummata Oromoo fi Magaalaa guddoo Oromiyaa akka taate guutummaatti amanuun Magaalaan kun itti waamamni ishii akka mootummaa Oromiyaatiif taatu ABO fi KFOn itti gaafatamummaa ofitti fudhatanii akka mirkaneessan amaanaa itti kennanneerra.
b. Jilli Jaarmiyaalee Hawaasa Oromoo adda addaa irraa walgahii kana irratti argamne Walloo, Dirre Dawaa, Matakkal, Moyyaalee, Madda Walaabuu fi kkf dabalatee daangaaleen Oromiyaa karaa adda addaatiin irraa ciccitanii mootummaa naannoolee adda addaa Oromiyaa daangessan keessatti akka hafanii jiran amanuun ABO fi KFOn itti gaafatamummaa ofitti fudhatanii seera addunyaa fi seera biyyi qabdu irratti hundaa’uun akka Oromiyaa keessatti dachaasan amaanaa itti kennanneerra.

3. Tokkummaa fi Ijaarsa ummata Oromoo cimsuu ilaalchisee
a. Jilli Jaarmiyaalee Hawaasa Oromoo adda addaa irraa walgahii kana irratti argamne Sirni Gadaa/Siinqee hundee tokkummaa fi ijaarsa siyaasaa, dinagdee, hawaasummaa, aadaa fi nageenya Oromootiif qabaachaa ture sirriitti hubannee ABO fi KFOn sirni Gadaa/Siinqee kun gadi fageenyaan qoratamee, ummata wajjin marii bal’aan taasifamee haaromsi jaarraa keessa jirru wajjin walmadaalu itti taasifamee sirna Oromoon itti bulu akka ta’uu danda’u waan barbaachisu hunda akka taasisan amaanaa itti kennanneerra.

4. Mirga Sabaa fi Sab-lammoota Oromiyaa keessa jiraatan ilaalchisee
a. Jilli Jaarmiyaalee Hawaasa Oromoo adda addaa irraa walgahii kana irratti argamne Sirni Gadaa ummatni Oromoo akkamitti akka kanneen Oromoo hin taane wajjin kabajaa fi michummaan jiraatamu haalaan kan barsiisee fi muuxannoo itti qabu ta’uu isaa hubachuun fuulduras ABO fi KFOn haala ummatni Oromoo sabaa fi sab-lammootni sodaa tokko malee mirgi isaanii guutummaatti kabajamee wajjin jiraatamuu danda’u irratti hojjatanii fi dhugoomsan amaanaa itti kennanneerra.

5. Hariiroo Mootummaa Oromiyaa fi Mootummaa Federaalaa Jidduu jiraachuu qabu ilaalchisee
a. Jilli Jaarmiyaalee Hawaasa Oromoo adda addaa irraa walgahii kana irratti argamne Mootummaa Federaalaa keessatti olaantummaan seeraa kabajamaa akka hin jirre, ummatni Oromoo akka baay’ina isaa fi gumaacha isaatti jaarmiyaalee mootummaa Federaalaa keessatti bakka bu’umsa akka hin qabne, walabummaan dhaabbattoota (institiyuushiinii) kanneen akka Mana Murtii, Polisii Federaalaa, Humna Ittisa Biyyaa fi kkf akka hin jirre, qabeenya waloo Federaalaatti gaheen ummata Oromoo xiqqaa ta’uu hubannee ABO fi KFOn wantota daddaban kana haala sirreessuu fi dantaan ummata Oromoo mootummaa Federaalaa keessatti kabajamuu qabu irratti itti gaafatamummaan akka hojjatan amaanaa itti kennanneera.
Nuti jilli hawaasa Oromoo adda addaa Kora Waliinii kana irratti argamne
1. Jila Waltajjii Qabaa Abbootii Gadaa Oromiyaa (Hojimaata Gumii Abboota Gadaa Oromoo),
2. Jila Yaa’ii 1966 (Waldaa Maccaa fi Tuulamaa),
3. Jila Irkoo 1976, (Hojimaata Idilee Addaa Duraanii)
4. Jila Yaa’ii Ganyaa Harooreessaa (Haadha Siinqee),
5. Jila Abbaa Dhugaa (Hojimaata Abbaa Muudaa/Ayyaantuu ),
6. Jila Wayyooma Anaajinaa (Hojimaata Dirree Sheek Huseen)
7. Jila Wayyooma Soof Umar (Abbaa Murtii),
8. Jila Nagummaa Dambii (Hojimaata Sayidii Alfaqii /Yaa’a Danbii)
9. Jila Jaarroollee Biyyoolessaa Oromiyaa, (Bakka buutota Lammiilee Oromiyaa),
10. Jila Og-afaanii (Hayyoota Yunivarsitii),
11. Jila Teessoo Magarsaa Badhaasaa (Hojimaata Qulqulluu Sinodoosii Oromiyaa Teessoo Pheexiroos)
12. Jila Waldaa Makaana Iyeesuus Itoophiyaa (Jila Sadaasa 24, 2023),
13. Jila Dhugeeffannaa Uumaa (Dhaabbata Hordoftoota Amantaa Waaqeffannaa)
14. Jila Yuuba 1ffaa (Dhimmoota Mirga Namoomaa fi Sivilii Oromoo)
15. Jila Waahilan Waltajjii (Yuba 4ffaa),
16. Jila Yaa’aa Haaromsa Finfinnee (Hawaasa Finnaa Finnee)
Dhuma irratti Jilli Guula Waliinii ABO fi KFO amaanaa itti kenname kana akka seeraa fi sirnaan raawwatan deggersa nu irraa barbaadamu hunda kennuuf waadaa seenneerra.

Jila Jaarmiyaalee Hawaasaa Oromoo fi Jaarmiyaalee Siyaasaa Oromoo ABO fi KFO
Gurraandhala 22, 2025
Finfinnee

02/02/2025

Iccitii waa'ee ogguramuu Lammaa Magarsaa....!

19/05/2024

'Raayyaan Ittisa Biyyaa' Paartii Bilxiginnaa Gocha Hammeenyaa Suukanneessaa Ummata Nagaa irratti raawwachuu itti fufe.

Ibsa Adda Bilisummaa Oromoo

Waraanni Paartii Bilxiginnaan ajajamee Oromiyaa gubaa jiru, golee naannichaa hundatti namoota nagaa gargaarsa hin qabne sodaachisuu, ajjeechaa fi saamicha hamaa raawwachuu itti fufee jira. Dhaadannoo ifatti paartii PPn labsame 'Qurxummii bal’eessuuf galaana gogsuu' jedhu hordofuun, Raayyaan Ittisa Biyyaa nageenya ummataa keessumaa ammoo nageenya qonnaan bulaa tiksuun irraa eegamu, kaayyoo Bilxiginnaa galmaan ga’uudhaaf gocha suukaneessaa namoota nagaa ittisa hin qabnee fi qonnaan bultoota irratti raawwatuu itti fufeera.

Gaafa Caamsaa 16, 2024 Godina Shawaa Kaabaa Ona Sulultaa Ganda Liilloo Cabaqaa jedhamutti humnoonni mootummaan Bilxiginnaa hidhachiisee bobbaase qonnaan bultoota obbolaa sadii ta’an irraa loon 50 fi midhaan kuntaala 20 ol saamanii jiru. Isaanis:

Taaddasee Tsaggaa
Abbaay Tsaggaa fi
Gaaddisaa Tsaggaa jedhamu.

Maddoonni amanamoon akka agarsiisanitti, namoonni nagaan hedduun butamanii eessa akka jiran kan hin beekamne ta’uu ibsaniiru.

Akkasumas godinoota kanneen akka Baalee, Arsii fi Shawaa Bahaa keessatti waraanni Paartii Bilxiginnaa akkasumas dabballootnii fi kaabinootni isaa maatiin qonnaan bulaa hundi midhaan kg 25, waraanaaf akka gumaachu ajaja itti dabarsuun ummata ofiifuu waan ittiin jiraatu hin qabne gidirsaa jiran.

Godinootuma kana keessatti barattoonni kutaa 5ffaa hanga 12ffaatti tokko tokkoon isaanii qarshii 100 waraanaaf akka gumaachan waraanni PP ajaja dabarseera. Ummata gumaachuu hin dandeenyee fi fedhii hin qabneen ammoo WBO deggertu ittiin jechuun sodaachisaa fi doorsisaa jiru.

Isaan kunniin gochoota suukanneessoo hedduu keessaa isaan muraasa. Golee Oromiyaa fi naannolee biyyattii biroo hunda keessatti gochoonni hammeenyaa akkanaa hedduutu mul’atu.

Dhaabbileen mirga namoomaa keessoo fi idil-addunyaa fi nagaa jaallattootni ummata qonnaan bulaa dhiphina keessa jiru kana cinaa dhaabbatan, gara jabummaa suukanneessaa kana akka dhaabsisanii fi addunyaatti akka beeksisan waamicha goona. Guutummaa biyya Itoophiyaa keessatti lubbuun qonnaan bultoota miliyoonotaan lakkaa’amanii barbadaa’aa jira. Ummanni Oromoo gocha hammeenyaa isa irratti raawwatamaa jiru hunda akka qalbifatuu fi hammeenya kanas akka of irraa qolatuuf akka falmatu waamicha goona.

Injifannoo Ummata Bal'aaf!
Adda Bilisummaa Oromoo
Caamsaa 17, 2024
Finfinnee

25/04/2024

It's helpfull for take away!
https://www.facebook.com/reel/717949669733812?mibextid=rS40aB7S9Ucbxw6v

17/04/2024

Ajajaan olaanaa ABO-WBO Marroo Dirribaafi Itti aanaan ajajaa ABO-WBO Gammachuu Abbooyyee mootummaan rakkoo uummanni keessa jiruufi waldhabdeen siyaasaa jiru karaa nagaan akka hiikamuuf fedhiifi akeeka akka hin qabne ibsan.

Marii araaraa marsaa 2ffaa Tanzaaniyaa Daar ees salaam irratti geggeeffame irratti nuti wareegamnee deebii Oromoon barbaadu ni argama jennee rakkoofi tarkaanfii guddaa ofirratti fudhachuun dirree qabsootii baanee qilleensa mootummaan to'atu keessa darbinee Tanzaaniyaa Daar ees Salam deemne jedhan.

Gareen mootummaa immoo rakkoo siyaasaaf marii siyaasaa taasisuu dhiisuun faayidaan nu sossobuuf yaalii taasisaa turan jechuun af gaaffii kaleessaa Arraata biyyoolessa Oromiyaa irratti taasisaniin ibsanii jiru.

Dhimma araaraaf qaamoleen gidduu keenya turan waggoota lamaa oliif nu gidduu deddeemaa turan kan jedhan ajajoonni kunneen, osoo mariin araaraa hin eegaliin dura Jeneevaatti mariin taasifamaa erga turee booda nu bira ga'ame jedhan.

Nutis rakkoo uummanni keessa jiru furuun dirqama waan ta'eef jennee ofirratti murteessuun Tanzaaniyaa Daar ees salaam deemnu illee gareen mootummaa hidhannoo hiikkachuu qabdu yaada jedhu qabatanii dhiyaatan jedhan.

Dhimma kana irratti dipilomaatonni nu gidduu turan rakkoon akkasiin hin furamu jechuun itti himaa turuu ibsan.

Kaayyoon garee mootummaa bakka bu'ee dhiyaate waldhabdee siyaasaa jiru furuu osoo hin taanee gaaffiifi yaadni isaan qabatanii dhiyaatan mariifi waliigaltee malee hidhannoo hiikkachuu irratti kan jedhan, kaayyoon isaanii hooggansa ABO-WBO fi Waraana Bilisummaa Oromoo adda baasuuf malee kaayyoo araara dhugaa qabaatanii hin turre jedhu.

Waraana Bilisummaa Oromoo hiikkachiisuun hawaasatti dabaluu yaada jedhu qofa qabatanii dhiyaatan jechuun haala Daar ees salaam ture ibsu.

Hooggansi dirree irraa kan deemne erga mari'atamee waliigalteerra ga'ameera sadarkaa jedhamurra erga ga'anii booda dirree irraa deemne jedhu, ajajaan ABO-WBO Marroo Dirribaafi itti aanaan ajajaa ABO-WBO Gammachuu Abbooyyee.

Gareen ABO-WBO seeruma biyyattii bu'uura taasifannee gaaffiiwwan qabnu dhiyeessinuuf illee gareen mootummaa bakka bu'e kun deebiin isaanii gaaffiin keessan biyya diiga jechuu qofa ture jedhan.

Nuti lachuu waraana keenya waraana uummata tiksu taasisuu qabna jennee yaada dhiyeessinus gareen mootummaa bakka bu'e fudhachuu dhabuun akka waliif hin galamne taasisaniiru jedhu.

Waraana gama lachuu kan uummata tiksu taasisuu, waraanni yeroo mooraa seenu dabaree dabareen seenee leenjii fudhachaa mootummaan immoo waajjira akka banannu nuuf eeyyamuu, uummataan wal nu argisiisuufi mari'achuu yaada keenya uummataaf dhiyeessuu yaada jedhu dhiyeessinus gareen mootummaa fudhachuuf qophaa'oo hin turre jedhan.

Qaamoleen dipilomaasii fi ambaasaaddaroonni nu gidduu turan rakkataa turuu kan ibsan qondaalonni ABO-WBO kun, sababa gareen mootummaa diduuf gaafatan illee deebii irraa dhabaa turan jechuun, dhumarratti adeemsa ture addaan kutanii ba'uun waliigaltee malee hafe jedhan.

Seera biyyattii caqasnee gaaffii dhiyeessinuuf "seerri biyyattii hin eeyyamu" jechaa ture gareen mootummaa bakka bu'ee araara irratti argame jedhan.

Yeroo rakkatu gareen mootummaa bakka bu'e kun dhumarratti ambaasaaddaroonnifi dipilomaatota kana nurraa baasaatii ergaa muummichi ministeeraa isiniif dhaame isinitti himnaa jechuun akka daa'imaatti nu sossobaa turan jechuun himu.

Dhumarratti yaada dubbatan yeroo dhabanitti qaamota nu gidduu jiran irraa fagaannee daqiiqaa shaniif waliin dubbachuu yaalle jedhan.

Wayita kana "wal taanee faannoofi shaabiyaa lollaa waraana keessan fidaa" jedhee muummichi ministeeraa ergaa isiniif dhaameera jechuun nuuf himan jedhan.

Tuutni mootummaa bakka bu'e kun qabsoo Oromoos ta'e kan biyyattii keessa jiru quba hin qaban kan jedhan ajajoonni ABO-WBO kun, mootummaan araara dhugaa buusuuf osoo hin taane WBO diiguu, faayidaan sossobuuf maqaa araara jedhu jala dhokatee dhufe jechuun himu.

Ambaasaddaroonni nu gidduu turan waan jiru hunda sirriitti hubatanii taajjabaniiru kan jedhan, Ambaasaaddaroonni sun illee maalummaa WBO sirriiti hubachuufi quba qabaachuu ibsan jiru jedhan.

Dhumarratti garee mootummaa biraa deebiifi yaada dhabnaan waliigaltee dhukaasa dhaabuu wal mallatteessaa gargaarsa namoomaa uumataaf dhiyeessinaa jedhamnaan baqatan kan jedhan, marii marsaa biraafis akkaataa walitti deebinu irrattis dubbachuu diduun pirootokoolii achiiyyuu eeguu akka hin dandeenye himan.

Rakkoon WBO qawwee kaasise rakkoo siyaasaati kan jedhan ajajoonni kun, kaayyoon keenya guddaan ejjennoofi yaada keenya addunyaan akka hubattu taasisuun milkoofneerra jedhan.

Marii araaraa marsaa 2ffaa booda gama isaatiin mootummaan ibsa baaseen ABO-WBO'n araara akka hin barbaanne ibsee turuun, yeroo muraasa keessatti dhabamsiifna jedhee ture.

17/04/2024

WBO'n Zoonii Harsadee Godina baha Shaggar aanaa Boosat keessatti waraana PP du'aa fi madoon adabe.

Ebla 17, 2024 irree fi gaachanni uummata Oromoo WBO'n tarkaanfii laalessaa Zoonii haaraa Harsadee keessatti fudhateen injifannoo boonsaa galmeessee jira.

Ebla 13, 2024 Zoonii Harsadeetti Buttaan Jaal Obsaan hoogganamu Godina baha Shaggar aanaa Boosat ganda Golboo mitmittii bakka addaa Abbayyii, ganda Gugsaa Doddot naannawwaa Boosat karra torbaa fi ganda Dhaddacha bal'aa karaa Ethio-Djibouti irratti tarkaanfii laalessaa waraana faashistii PP irratti jajjabeewwan WBO fudhataniin humna diinaa irraa 15 du'aanii fi hedduu ammoo madoon adabamanii jiru.

Ebla 14, 2024 Ona Bosat ganda Nuuraa Heeraa keessatti muraasni Jaal Michuu, waraana weerartuu Inpaayera ixoobiyaa mooraa shanaffaa seenuun tarkaanfii guggubduu waraana diinaa irratti fudhateen wardiyyaa moorichaa ajjeesuun namoota shan madoon adabee ba'ee jira.

Godinuma baha Shaggar Zoonii Harsadee jalatti kan argaman WBO'n Aanaa Bosat keessa sosso'an kan Jaal Naannessaan durfamu tarkaanfii waraana diinaa irratti gaafa Ebla 15, 2024 ganda Battee fi Battee daalattii keessatti fudhateen loltoota diinaa 10 ol ajjeesuun madoo lakkoofsaan hin beekamne adabee jira.

Aanaa Fantaallee keessatti Buttaan Dhiirsaa basaasaa tarkaanfii laalessaa waraana nyaaphaa irratti ganama gaafa Ebla 16, 2024 sa'a 11:00 irraa jalqabuun hanga sa'a 1:00 tti daandii cirracha gurraachaa Ethio-Djibouti ganda Xuuxxutii iddoo addaa yaamurii jedhamtuu fi ganduma kana keessatti iddoo addaa ajoo saalaa jedhamtutti tarkaanfii fudhateen waraana PP du'aa fi madoon adabuun injifannoon xumuree jira.

17/04/2024

Ajjeechaa Suukanneessaan Qondaala ABO Jaal Battee Urgeessaa irratti Raawwatame Ajjeechaa Siyaasaa ti.

Ibsa Ejjennoo Caasaa Jaarmiyaa ABO Giddu-Galeessa Oromiyaa

Nuti Caasaan Jaarmiyaa ABO Giddu-Galeessaa Oromoo ajjeechaa suukanneesaan Ebla 09/2024 qondaala ABO Jaal Battee Urgeessaa irratti Magaala Maqiitti raawwatame ajjeechaa siyaasaa ti jennee amanna. Gameessi qondaalli ABO Jaal Battee Urgeessaa Baha Shaggar Ona Maqii Ganda Baqaleetti kan dhalate yeroo barataa Yuuniversitii ture irraa eegalee hanga guyyaa wareegamuutti kallattii fi al-kallattiin qabsoo bilisummaa Oromoo keessatti goota ga'ee isaa ba'achaa turee fi jaala ummanni Oromoo karaa hundaan akka ijaaramuuf hanga Waldaa Wal-gargaarsa Barattoota Oromoo hundeessuutti nama hojjechaa turee dha.
Jaal Batteen imala qabsoo bilisummaa Oromoo keessatti sochii diddaa gabrummaa barattootaa keessatti qooda fudhachaa ture. Kana keessatti dararamni hidhaa, qaama hir’isuu hanga maatii isaa reebuutti ga’uun qor-qalbiin akka miidhamuuf irratti duulameera.

Jaal Batteen Fincila Diddaa Garbummaa Qeerroo Bilisummaa Oromoon Wayyaanee angoo irraa buusuuf gaggeeffamaa ture keessatti ga'ee guddaa taphachaa tureera. Balaa kanaanis dararamni guddaan hojii idilee irraa ari'atamuu hanga hidhaatti irra ga'aa tureera. Akkuma Wayyaaneen aangoo irraa buuteen Jaal Batteen erga Hoogganni Dhaaba keenyaa gara Oromiyaatti deebi'ee yeroo isaa guutuu kennuun dirqama dhaaba irraa itti kennamu fudhachuun hojjechaa ture. Hanga guyyaa wareegamuuttis rakkoo ummata Oromoo irra ga'aa jiruu fi dhaaba isaa ABOfis karaa Miidiyaa fi carraa waltajjii argate kamittuu fayyadamuun sodaa fi nuffii tokko malee osoo of-hin qusatin sagalee ta'aafii tureera. Jaal Batteen ummata Oromoo qofaaf osoo hin taane, sabootni cunqurfamoo mirga hiree ofiif qabsa'aa jiraniif sagalee ta'aafii nama turee dha.
Walumaagalatti Jaal Battee Urgeessaa deemsa qabsoo bilisummaa Oromoo keessatti ga'ee isaa ba’achaa ture keessatti Jaallanii fi ummata isaa biratti jaallatamaa fi kabajamaa dha. Yaa ta'u malee diinotaa fi mootummaa Itoophiyaa biratti Jaal Batteen sodaatamaa dha. Sanaafi akkuma qabsaa'ota biroo bittootaan gaadi'amee kan hidhaan dararamaa ture.

Kanaaf, Ajjeechaan Gara-jabinaa Jaala keenya gameessa Jaal Battee Urgeessaa irratti raawwatame, ajjeechaa siyaasaa sirnaan raawwatame ta'uu kan akeekan, deemsa qabsoo Jaal Batteen hanga guyyaa wareegamuutti raawwataa dhufee fi amala sirni Mootummaa Bilxiginnaa hoogganoota, qondaalotaa fi miseensota ABO akkasumas qabsa'oota Oromoo maraaf qabu waggoota Ja'aaf agarsiisaa turee fi jiru hubachuun ga'aa dha.

Kana jechuun mootummaan, Hoogganni ABO akkuma gara Oromiyaa dhufeen qabsoo Oromoo galii hanqisuuf danda’an dhaabicha diiguuf, dadhaban immoo dadhabsiisuuf daboota raawwatamaa turan keessaa, hoogganootaa hanga miseensotaatti hidhuun, kaan ajjeesuu, kaan biyyaa baasuun akkasumas qabsaa'ota Oromoo hedduu hidhaan dararuu irra darbee golee Oromiyaa hundatti ajjeechaawwan raawwataniiru. Ragooleen kunneenis kan akeekan ajjeechaa siyaasaa qinda'aa mootummaa biyya bulchaa jiruun raawwatamaa turanii dha.

Kanaaf nuti caasaan Jaarmiyaa ABO Giddu-Galeessa Oromiyaa ajjeechaan suukanneessaan Jaal Battee Urgeessaa irratti raawwatame ajjeechaa Siyaasaa ti jennee amanna.
Ta'us haqni Jaal Battee Urgeessaa akkuma ajjeechaawwan kanaan dura Oromiyaatti raawwataman, kan Artiisti Daadhii Galaan, Hacaaluu Hundeessaa, Abbootii Gadaa Karrayyuu akka awwaalamee hin hafneef qorannoon bilisaa biyya keessaa hanga alaatti akka gaggeeffamu cimsinee gaafanna.

Dhuma irratti nuti Caasaan Jaarmiyaa ABO Giddu-Galeessaa Jaala keenya Jaal Battee Urgeessaa imala qabsoo bilisummaa Oromoo keessatti fakkii inni kaa’ee darbe cichoomina, kutannoo fi murannoo inni qabsoo sabaaf qabu irraa baranneerra.

Xumura irratti Lubbuu qaalii Oromoof wareegaman bara baraan yaadachaa, qabsoo bilisummaa Oromoo galiin ga'uuf nutis akkuma jaallan kaleessaa xurree isaanii osoo gad hin dhiisin, dararama ummanni Oromoo yeroo ammaa karaa Siyaasaa, Diinagdee fi Hawaasummaatiin argaa jiru irraa hambisuuf, ummata dammaqsuun, ijaaruun, humneessuun, lafa bilisa irratti dhalate irratti bilisaan jiraatee akka darbuuf qabsoo eegalame cimsinee kan itti fufnu ta'uu hubachiisna.

Injifannoo Uummata Bal'aaf!
Caasaa Jaarmiyaa ABO Giddu-Galeessa Oromiyaa
Ebla 16, 2024
Finfinnee

10/04/2024

Eid Mubarak to all!

Gada News Service

26/02/2025

25/02/2025

25/02/2025

24/02/2025

23/02/2025

02/02/2025

19/05/2024

25/04/2024

17/04/2024

17/04/2024

17/04/2024

10/04/2024

Address

Website

Alerts

Contact The Business

Shortcuts

Share

Category