Geda News Service

09/03/2026

ABO-WBOn gabaasni Aministii Intarnaashinaal hanqinna qorannoo, dubbii qabatamaa hin taanee akka meeshaatti fayyadamuu fi loogiin kan guuttameedha jedhe.

Aministii Intarnaashinaal Waraanni Bilisummaa Oromoo miidhaa saalaa, gabrummaa saalaa fi buqqaatii Oromiyaa keessatti raawwatee jira jechuun ibsuu hordofee, ABO-WBOn ibsa balaaleefannaa baaseen, ibsichi hanqinna qorannoo fi loogiin kan guuttameedha jedhe.

​"Miidhaan koorniyaa irratti hunda'e (Gender-based violence) hawaasa kamiyyuu keessatti yakkoota suukanneessoo keessaa isa tokkodha kan jedhe ABO-WBOn, Miidhaan saalaa dubartootaa fi ijoollee durbaa Oromiyaa keessatti fi Oromiyaan alatti mudatu yakka haqa irraa fagaateedha jedha.

Gochoonni akkanaa ifatti balaaleffatamuu, qaama walaba ta'een qoratamuu fi mana murtiitti dhiyaachuu qaba jechuun ibse.

Waraanni Bilisummaa Oromoo ibsa baaseen, “yakkoota namoota nagaa, keessattuu dubartoota irratti raawwataman haaluun, sababa itti kennuun ykn akka salphaatti ilaaluun gonkumaa hin danda'amu. Waggoota dheeraaf, miidhaawwan Oromiyaa keessatti raawwataman kunniin dhokfamaa turaniiru; gidiraa miidhamtootaa galmeessuufi haalli isaan keessa jiran xiyyeeffannoo addunyaa akka argatu gochuuf carraaqqii haqaa taasifamu kamiyyuu nuti ni simanna” jedhe.

Haa ta'u malee, gabaasni Amnesty International, “Namni Tokko Na Gargaaruuf Hin Dhufne” mata duree jedhun bahe miidhaawwan waggoota dheeraaf xiyyeeffannoo dhaban gara addunyaatti baasuun isaa gaarii ta'us, gabaasichi hanqina mala qorannoo (methodological weakness), dogoggora ragaalee bu'uuraa, fi dhimma tokko qofa irratti xiyyeeffachuun isaa walitti bu'iinsa xaxamaa ta'e kana akka salphaatti ilaaluuf yaaluu isaa agarsiisa jechuun qeeqe.

​Gabaasichi dhimma qabatamaa ragaadhaan deeggarame kan akka humnoonni hidhatan biroo Waraana Bilisummaa Oromoo (WBO/OLA) fakkaatanii (impersonating) gocha kana raawwachuu danda'an irratti xiyyeeffannoo dhabee jira jedhe.

Dhugaan kunis dhaabbilee akka The Washington Post, Rooytarsi fi Komishinii Mirga Namoomaa Itoophiyaatiin mirkanaa'ee jira jechuun qaamota gocha kana raawwatan haala amansiisaa ta'een adda baasuun yoo hin danda'amne, itti gaafatamummaa mirkaneessuun hin danda'amu.” jechuun ibse jira.

Gabaasni tokko yoo qulqullina hin qabaanne, namni yakka raawwate siriitti waan hin beekamneef haqni ni bada kan jedhu ABO-WBOn, Miidhamtoonni gabaasa dhugaa fi ragaa qabatamaa irratti hunda'e argachuuf mirga qabu jedhe.

Aministii Intarnaashinaal ragaa gocha sanaa qabaatus, eenyu akka raawwate garuu "mirkaneessuu hin dandeenye” kan jedhe Waraanni Bilisummaa Oromoo Marroo Dirribaa Lammeessaatiin durfamu, eenyummaa qaamota yakka guddaa kana raawwatani mirkaneessuu dhabuun yaaddoo guddaadha jedhe.

Gabaasichi qaamota Waraana Bilisummaa Oromoo fakkaatani gocha suukaneessaa kana raawwachuun maqaa ABO-WBO balleessan akka jiran hin eeree jechuun ibse.

Yakki waraanaa dhimma baay'ee ulfaataa waan ta'eef, eenyummaan abbaa raawwatee osoo hin mirkanaa'in gabaasni akkasii ba'uun dogoggora guddaa jechuun addessee jira.

Gareen mootummaa waliin hidhata qabu kan WBO fakkaatee namoota nagaa ajjeessaa akka ture The Washington Post gabaasuu kan eere ibsi ABO-WBO, Qaamni iccitii hooggantoota olaanoo of keesssa qabu kan Koree Nageenyaa jedhamu fi ajaja ajjeechaa suukanneessaa kennuun, karaa miidiyaatiin ammoo WBOtti quba qabu jiraachuu isaa Rooytarsi gabaasuu yaadachise.

Mootummaan mala qurxummii qabuuf bishaan gogsuu jedhu fayyadamuun ummata fixaa turuu kan ibse ABO-WBOn, ​Gabaasichi miidhaa miidhamtootaa gadi fageenyaan himuullee, miidhaan kun "siyaasa mootummaa" kan itti yaadamee karoorfame ta'uu isaa dagatee jira jechuun kun ammoo amantummaa gabaasichaa gadi buusaa jedhe.

​"Gabaasichi qorannoo haalaan hin gaggeeffamne (shoddy research) fi dogoggora ragaalee bu'uuraa kan gabaasicha amansiisummaa isaa (credibility) gadi buusu qaba kan jedhu ibsi kun, Qorannoon tokko amansiisaa ta'uuf, ragaaleen dhiyaatan haala qabatamaa ta'een mirkaneessu qaba, garuu gabaasni kun hanqina mala qorannoo irratti hunda'uun, ragaalee dogoggoraa fi walitti hin hidhamne dhiyeessee jira.” jedhee jira.

Gabaasichi WBO irratti qofa xiyyeeffachuun, yakka mootummaan Itoophiyaa humnoonni Raayyaa ittisa biyyaa fi milishaan raawwatan kan akka ajjeechaa jumlaa, miidhaa saalqunnamtii dubartootaa fi buqqaatii uummataa osoo hin ibsi bira darbee jedhe.

Amainistii Intarnaashinaal mala Qorannoo Fagoo fi Ragaalee hin mirkanaa'in fayyadame jechuun, Qorannoon lafa irratti (field research) hin gaggeeffamne, haala qabatamaa naannicha keessa jiru sirriitti hubachuu hin danda'u jedhe.

​"Waraanni Bilisummaa Oromoo (WBO) yakkoota hedduu irratti qorannoo walabaa akka godhamu deddeebi'ee waamicha dhiyeessaa turee jira kan jedhu ibsi kun, haa ta'u malee, waamichoonni kunniin mootummaa Itoophiyaa fi deegartoota isaa biratti fudhatama hin arganne jedhe.

​Mala qorannoo walabaa dhiisuun kun, siyaasa mootummaan Itoophiyaa itti fayyadamuudha kan jedhu ABO-WBOn Mootummaan kun yeroo dheeraaf adeemsa itti gaafatamummaa idil-addunyaa (international accountability) mormaa tureera. Fakkeenyaaf, mootummaan kun duula dippiloomaasii cimaa gaggeessuun, 'Komishinii Ogeeyyii Mirga Namoomaa Itoophiyaa' kan Tokkummaa Mootummootaa (UN) jala ture akka dhaabbatu godhee jira jechuun ibse.

​Waraanni Bilisummaa Oromoo qorannoo hunda-galeessa (comprehensive) fi walaba ta'e akka taasifamu jechuun waamicha yoo taasisu, qorannoon kun Oromiyaa dhihaa keessatti miidhaa raawwatame qofa osoo hin taane, naannoolee Oromiyaa bakka miidhaan gurguddaan raawwatamuu isaa ragaan jiru hunda keessatti gaggeeffamuu qaba jedhe.

​Miidhamtootaaf haqaa mirkaneessuun adeemsa walaba ta'e, iftoomina qabu, fi qaamolee walitti bu'iinsa kana keessatti hirmaatan hunda qorachuu barbaachisaa ta'uu eeruun, Mala akkasii qofaan itti gaafatamummaa mirkaneessuun kabajaa fi mirga miidhamtootaa eeguun ni danda'ama jechuun ibse jira.

01/03/2026

Waraana Ameerikaa fi Israa'el waliin ta'uun Iraan irratti bananiin hoogganaan olaanaan Iraan Ayaatolaa Alii Kameenii Sambata kaleessaa Gurraandhala 28/2026 waajjira isaa keessatti ajjeefamuu miidiyaaleen Iraan mirkaneessani jiru.

Iraan hogganaa ishee waggoota 37f ishee bulche kanaaf gaddaa guyyoota 40 yoo labsitu, haleellaa haaloo bahiinsaa Israa'eli fi buufaatalee waraana Ameerikaa biyyoota baha giddugaleessaa keessa jiran irratti kan fudhattu ta'u ibsitee jirti.

Humni Eegumsa Warraaqsaa Islaamaa Iraan tarkaanfii haaloo bahuu "akkaan hamaa ta'e" buufata US fi Israa'el irratti akka fudhatu dhaadatee jira.

Pirezidantiin Ameerikaa Doonaald Tiraamp hoogganaan waliigalaa Iraan, Ayaatolaa Alii Kameenii, haleellaa US fi Israa’el Teehiraan irratti gaggeessaniin ajjeefamuu beeksisuun
"Seenaa keessatti namoota hunda caalaa hamoo ta'an keessaa tokko kan ta'e, Alii Kameenii, du'eera. Tooftaa hordoffii keenyaa baay'ee cimaa ta'eefi intelejensii keenyaa jalaa ba'uu hin dandeenye," jedhe.

Akka heera mootummaa Iraanitti Ayatolaa Alii Kameenii kan bakka bu'u qaamni filatu the Assembly of Leadership Experts jedhama.

Gidduutti ammoo pirezidantiin biyyattii, dursaan qaama seera baastuufi miseensi tajaajila amantaa Mana-maree Eegdotaa waliin ta'uun itti gaafatamummaa inni qabu fudhatu.

Ajjeefamuun Gaggeessaa Waliigalaa Iraan Ayaatolaa Alii Kameenii Iraanitti yeroo akkaan murteessaadha jedhamaa jira.

Iraan guutummaa Baha Gidugaleessaa keessatti, biyyoota michuu US ta'aniifi buufataaleen waraanaa US kanneen Dubaay, Dohaa, Baahireen fi Kuweet jiranirratti haleellaa raawwattee jirti.

Humni Warraaqsa Islaamaa Iraan haleellaa halo bahiinsaa ni raawwadha jedhee dhaadachuu hordofee, Pireezidaantiin Ameerikaa Doonaald Tiraamp "Iraan haleellaa raawwannaan humna kanaan dura argitee hin beekneen haleellaa" jedhe.

Haleellaa hanga ammaatti Israa'el fi Ameerikaan Iraan keessatti raawwataniin namooni 200 ol ajjeefamuu gabaafamee jira.

Ayaatolaa Alii Kameenii alatti ajajaa Humna Waraanaa Walii Galaa Iraan Meejar Jeneraal Abdulraahiim Musaawii akkasumas Ajajaa Eegdota Warraaqsaa Iraan Meejar Jeneraaal Mohaammed Paakpu, Barreessaa Mana Maree Waraana Iraan Alii Shaamkaaniifi Birgaader Janaraal Aziiz Naasirzaadeehi ajjeefamuu isaanii gabaafamee jira.

30/01/2026

Ijaarsa buufata xiyyaaraa Aabbuu Seeraa waliin walqabatee namoonni buqqaafamuun gaaffii mirgaa isaanii gaafatan hidhamaa jiraachuun dhagahame.

Maddeen keenya magaalaa Boshooftuutii yaada isaanii nuuf kennan akka jedhanitti, sababa gaafii mirgaa fi mirgaa qonnaan bultoota Aabbuu falman qofaaf mana hidhaa bulchiinsa magaalaa Bishooftutti namoonni heddun maatii waliin dararamaa jiru jedhan.

1.Roobaa Tashoomaa

2.Mulee Damissee

3. Dasuu Addisuu

4. Birruu Hongoshaa

5. Addisuu Kabbadaa kanneen hidhaman keessaa ta'uu himan.

Waliigalatti namoonni lakkoofsan 20 ta'an mana hidhaa Bishooftuu ganda 3 fi mana hidhaa aanaa Dhaka Booraa keessatti iraarfamaa jiru jedhan.

16/01/2026

Waa'ee waraan'a Bilisummaa Oromoo(WBO) bifa gabaabduu (brief) ta'een isiniif qindeessineerra, hidhaa(link) gadii cuqaasun baraa...! Website keenya subscribe gochuun maatii ta'aa, yeroo waa maxxansinu bifa salphaan isin qaqqaba!

Waraanni Bilisummaa Oromoo (WBO) kan yeroo baay’ee mootummaa Itoophiyaatiin Shanee (yookiin ABO-Shanee) jedhamee waamamu garee hidhate kan saba-boonummaa (ethno-nationalist) yoo ta’u, irra caalaa n…

15/01/2026

Bahi giddu galeessaa lafa yeroo heddu waraannii irraa hin fagaannedha. Naannon kun ardii Awurooppa, Afrikaafi Eshiyaa kan wal-qunnamsiisu waan taateef akka naannawa tarsimawaa addunyaatti ilaalama.
Naannoon kun biyyoota akka Saawudii Arabiyaa, UAE, Masrii, Israa'el, Sooriyaa, Iraan, Tarkiifi Yaman dabalatee biyyoota 17 ta'an of keessaa qaba. Muddama Iraanitti tibbana muudate hordofee, Ameerikaan akka Iraan rukuttu dhaadataa turte.
odeessa guutuu isaa

Waa’ee buufataalee waraana Ameerikaa naannawa galoo galaana keessa jiranii maal beekna? Humna Qilleensaa Ameerikaa Bahi giddu galeessaa lafa yeroo heddu waraannii irraa hin fagaannedha. Naann…

15/11/2025

Sichi raajii argitu..... W B O duratti....💪

27/10/2025

Shira mootummaa PP dhaggeeffadhaa akkaataa isaan ummata Noonnoo itti ficci*siisan!
Viidiyoo kana hanga dhumaatti dhaggeeffadhu!
si ajjees.anii si gowwoomsanii of jala si hiriirsuf diraamaa sirratti dalagu dammaqii ilmaan kee jala hiriirii guyyaa roorroo of irraa gabaabsi. Callistee teessa taanan kan kana caalutu dhufaa jira dammaqi! Tola du' uun ni gaha....!

26/02/2025

Qoqqoodinsaa fi walitti gaarreffannaa Bulchiinsa Tigiraay

Barreeffama yaada kana keessatti, Benedict Michael, barreessaa walaba ta’e, rakkoo siyaasaa guddachaa dhufe Tigray, bakka qoqqoodamiinsi keessoo Adda Bilisummaa ummata Tigiraay (TPLF) keessatti bulchiinsa laamsha’uu fi balaa waldhabdee haaromfame olkaasuu qorate.

Barreeffamni kun akkamitti naannoon amma gareewwan lama gidduutti akka qoodamu kan ibsu yoo ta’u, Debretsion Gebremichael (PHD) zoonii giddugaleessaa fi kaaba dhiha kan to’atu yoo ta’u, Getachew Reda, Pirezidaantii Bulchiinsa Yeroo Tigray, naannoo kibbaa, dhihaa, bahaa fi kibba baha ni bulcha. Bulchiinsa tokkummaa qabu hundeessuun dadhabuun dhaabbilee mootummaa daran laaffiseera.

Barreeffamni kun falmii siyaasaatiin alatti, qaamoleen humnoota Tigray gama fudhatanii akka hammaatan hubachiisa. Gareen ajajoota waraanaa “core and upper core” jedhanii of waaman garee Debretsion’f deeggarsa isaanii ifatti kan labsan yoo ta’u, jeneraalota Wedi Asheber dabalatee qondaaltonni sadarkaa olaanaa qaban biroo tarkaanfii kana mormaniiru. “Siyaasa keessatti hirmaannaan waraanaa dursa balaa qabudha,” jechuun barreeffamni kun akeekkachiisa, paartii fi mootummaa adda baasuu dhabuun waraana naannichaa caccabuudhaaf saaxilamaadha jedheera.

Falmii keessoo bira darbee adeemsi kun too'annoon ala ta'aa jira waan ta'eef yaaddoo humnoonni alaa gidduu seenuun hookkara hamaa kaasuu danda’a jechuun ibse. Gabaasni akka agarsiisutti gareen Debretsion paartii bulchaa Eertiraa, Front for Democracy and Justice (PFDJ) waliin kan bobba’e yoo ta’u, gareen Getachew ammoo Paartii Badhaadhina Bulchaa Itoophiyaa (PP) fi mootummaa federaalaatti dhihaateera. Barreeffamni kun akka akeeketti, qindaa’inni akkasii Tigraay gara dirree waraanaa waldhabdee bakka bu’ummaatti jijjiiruu akka danda’u, “dhiibbaan alaa kun yoo itti fufe, naannichi jeequmsa haaromfame bu’aa fagoo ta’een mudachuu danda’a” jechuun akeekkachiisa.

25/02/2025

Gareen Adda Bilisummaa Uummataa Tigraay(ABUT) Dabratsiyoon Gabramikaa'eeliin durfamu mootummaa Eertiraa waliin hojjechaa jiraachuu maddeen odeeffannoo nageenya biyyaalessaa Itoophiyaa himan.

Akka maddeen nageenyaa ibsanitti, gareen caasaa nageenya Itoophiyaa waggoota dheeraaf hoogganaa kan turan Obbo Getaachaw Asaffaa fi qondaala buleessa ABUT Sibhaat Naggaatiin durfamu mootummaa Asmaraa garee Dabratsiyoon faana waliin walqabsiisuuf hojjechaa tureera.

Hoggantoonni olaanoo murna ABUT Dabratsiyoon Gabramikaa'eeliin durfamuu gara Asmaraa deemuun bulchiinsa yeroo Tigraay akkamitti akka aangoo irraa kaasan maryachuus maddeen ibsaniiru.

Kanumaan wal qabatee bulchiinsi yeroo Tigraay keessatti deeggartoota hedduu akka qabuu fi kutaan dargaggootaa waraana akka hin barbaanne marii kana irratti kaafamuu isaa dhagahame, kunis bulchiinsa yeroo aangoo irraa kaasuuf rakkisaa ta’a jechuun walgahii Asmaraa irratti dubbatamutu ibsame

Kana malees qondaaltonni mootummaa Eertiraa fi hoggantoonni olaanoo murna ABUT kan Dabratsiyoon Gabramikaa'eeliin durfamuu Faannoo waliin hariiroo akkamitti uumuun akka danda’amus maryachuu maddeen nageenyaa nutti himan.

Wayituma kana Faannoon garee hedduutti qoodamee waan jiruuf gamtaa waliin uumuun rakkisaa akka ta'e, rakkoon inni kaan ammoo Walqaayitii fi Raayyaa waliin walqabatee humnoota naannoo Amaaraa waliin waliigalteerra ga’uun rakkisaa ta’a jechuun dubbatamaa akka ture maddeen nageenyaa ibsaniiru.

Haa ta'u malee, carraaqqiin kun itti fufee akka jiru dhaga'ameera.

25/02/2025

Walgahiiwwan hawaasaa jechuun walgahiin tibbana biltsiginnaan taa'amaa jiru naannoo Oromiyaatti afaan marii Afaan Amaaraa ta'uu maddeen himan.

Maddeen waltajjicha irratti hirmaatan dur yoo xiqqaate Afaan keenyaan mariyanna turre, amma sunuu hafee hirmaattonni Afaan Amaaraa akka fayyadaman dirqisiifaman jedhan.

Afaan Oromoo afaan hojii mootummaa federaalaa ta'a jedhamee eeggamaa ture hafee qe'ee keenyattuu dubbachuun hafe jedhan.

24/02/2025

Godina Salaalee Aanaa Dharraatti bulchiinsi aanichaa naannoo Amaaraa magaalaa Reemaa deemuun humnoota finxaaleyyii waliin marii adda addaa taasisaa jiraachuu maddeen himan.

Gareen garas imale kun dabballoota mootummaa, jaarsolii fi abbootii amantii jedhamanii filatamuun imalani jedhu.

Marii isaanii kana dhoksaan taasisuu kan himan keessa beektonni humnoonni finxaaleyyii viidiyoowwanii fi suuraa addaa addaa gadi baasuun miidiyaa hawaasaa irratti qoodani jiru jedhan.

Marii gareen kun dhoksaan taasisan kun dhalattoota Oromoo aanichaaf rakkoo dabalataa fida malee furmaanni dhufu hin jiru kan jedhan maddeen, callisanii ilaaluun gatii caalu uummata kaffalchiisuuf jira jedhaniiru.

Jaarsolii biyyaa, abbootii amantaa fi dargaggoota uummata biratti dhageettii qaban hidhaatti naqanii garee biraa uumuun humnoota kana waliin marii taasisuun balaa caalu hordofsiisa jedhaniiru.

Kantiibaa duraanii Magaalaa Gundo Masqalee Obbo Daamxoo Tashoomaa, Luba Darrasaa fi Yeshaanoo kanneen jedhaman warreen bulchiinsa aanaa Dharraan bakka buufamanii gara naannoo Amaaraa Reemaa jedhamu deemuun humnoota finxaaleyyii kanaan marii taasisaa turan keessaati.

Caasaawwan mootummaa aanaa Dharraa humnoota kana waliin walitti hidhachuun uummata Oromoo aanichaa irratti dararaa addaa addaa raawwataa turan jiru.

Dhalattoota Oromoo qabata Waraana Bilisummaa Oromoo waliin hariiroo qabuutiin irratti duulanii kumaatamaan qe'ee irraa buqqisanii, kumaatamaan immoo mana hidhaatti guuraniiru jedhan jiraattonni.

Mariin caasaaleen mootummaa aanichaa humnoota kana waliin taasisaa jiran kun qaama aanaa Dharraa gara bulchiinsa naannoo Amaaraa jala galchuuf tattaaffii taasifamaa jiru ta'uu himu.

Kanaaf haal duree mijeessuuf immoo uummata gandoota akka; Jirruu Daadaa, Warree Gabiroo, Manqaata, Bachoo, Baabbuu, Dirree, Iluu Waayyuu, Iluu Goodaa Caffee, Abbaadhoo, Goddiimaa, Baayyoo,Harboo Dasoo, Birjee fi gandoota biroo qabata WBO jedhuun meeshaalee gurguddaan rukkutaa qe'ee isaa irraa buqqaasaa turaniiru jedhan.

Gareen ‘YeDera Asmelash Committee’ jedhee ijaarame Aanaa Dharraa bulchiinsa naannoo Amaaraa jala galchuuf hojjechaa jira jedhaniiru. Qaamoleen bulchiinsa aanichaa garaagaraas dhoksaan garee kana waliin hojjatu jedhee uummanni komata.

Kaayyoon humnoota finxaaleyyii kanaa aanaa Dharraa bulchiinsa naannoo Amaaraa jala galchuu akka ta'e irra deddeebiin himaa kan turan, amms gandoonni baay'een to'annoo isaanii jala jiraachuu jiraattonni himu.