19/03/2026
Dhimma boba’aan wal-qabatee namoota 14 yakka Malaammaltummaan shakkaman irratti beellamni qorannoo dabalataa hayyamame
Finfinnee, Bitootessa 10, 2018 (FMC) - Dhimma boba’aan wal-qabatee namoota 14 yakka malaammaltummaatiin shakkaman irratti beellamni qorannoo dabalataa hayyamameera.
Dhaddachi Beellamaa Mana Murtii Olaanaa Federaalaa ramaddii Lidataa, galmee shakkamtoota 14 yakka malaammaltummaa raabsa boba’aatiin shakkamuun mana murtiitti dhiyaatanii qorateera.
Shakkamtoonni kuneen faayidaa hin malle argachuuf ykn nama biroof argamsiisuuf yaaduun, boba’aa mootummaan baasii olaanaan deeggarsa taasisuun dhiyeessu qajeelfamaa fi danbiin alatti qaamolee hin malleef akka raabsamu gochuun mootummaa irratti miidhaa geessisuu isaanii ibseera.
Poolisiin akka ibsetti, shakkamtoonni kunneen dhaabbilee mootummaa federaalaa fi kutaalee magaalaa Finfinnee garaagaraa keessatti itti-gaafatamummaa irra utuu jiranuu, boba’aa mootummaan sharafa alaa olaanaan bitu dhaabbilee boba’aa galchan, abbootii buufata boba’aa naannolee fi daldaaltoota seeraan alaa (dallaalota) waliin qindoomuun kaayyoo yaadameen alatti akka oolu taasisaniiru.
Dabalataan, konkolaattonni boba’aa (booteewwan) buufata boba’aa ga’anii akka hin buusnee fi hamma mootummaan taarifa dabalutti akka turan gochuun, hanqinni boba’aa nam-tolcheen akka uumamu gochuun eeruu isa qaqqabeen to’annoo jala oolchee qulqulleessaa akka jiru dhaddachaaf ibseera.
Poolisiin qorannaa yakkaa:
* Hoji raawwachiisaa Dhaabbata Dhiyeessii Bob’aa Itiyoophiyaa ta’anii utuu jiranii namoota yeroof hin to’atamin waliin ta’uun kaampaaniiwwaniifi buufataalee raabsaa boba’aa waliin walitti dhufeenya bu’aa irratti hundaa’e uumuun oomisha bob’aa bakka ga’umsa isaan ala karaa seeraan alaan gara alaatti akka ba’uu fi kotiroobaandiin akka gurguramu gochuun isaanii eerameera.
Kanaanis, ji'a Adoolessaa bara 2017 qofa keessa, boba'aa fe'anii gara biyya keessatti kan galan booteewwan 68 (33 Dhaabbata Dhiyeessii Boba'aa Itiyoophiyaatiin kan fe'aman fi 35 immoo dhaabbata dhuunfaatiin kan fe'aman) akka miliqan taasiseera jechuun ka’umsa shakkii isaa dhaddachaaf ibseera.
Shakkamaan 2ffaa Dibaaraa Fuufaa Abbaa Taayitaa bob’aa fi Inarjii Itiyoophiyaatti Daarekteera itti aanaa Damee Boba’aa ta’anii hojjechaa utuu jiranii ittigaafatama isaanii dawwoi godhachuuun maqaa investimantiitiin qaamolee kallattiin galmaa’anii boba’an kennamuu fi heyyamni isaanii addaan cite, kanneen hayyama hin qabne ykn hojii xumuran 800f boba’aa daangaa malee akka argatan haala mijeessaniiru jedhameera.
Akkasumas, booteewwan koontiroobaandii fe’anii qabaman xalayaa seera-qabeessummaa fakkeessuun akka gadhiifaman taasisaniiru jedhamuun shakkamaniiru.
Dabalataan, mooummaan buufataalee boba’aa ijaarsa xumuraniif hayyama kenne da’oo godhachuun tajaajila buufata boba’aa haaraatiif kennamu nutu eeyyamsiise jechuun hanga qarshii miiliyoona 5 fudhachuun eeyyama akka argatan godheera.
Shakkamtoonni 3ffaa hanga 14ffaa jiran immoo, kutaalee magaalaa Finfinneetti Biiroo Daldalaa fi Indaastiriitti ramadamnii bakka hojjetanitti boba’aaan karaa seeraa fi dijiitaalaan fayyadamtootatti gurguramuu isaa hordofuufi mirkaneessuuf itti gaafatama kennameef cinatti gatuun buufataalee boba’aa waliin walitti hidhamiinsa bu’aa irratti hundaa’e uumanii oomishaaleen boba’aa karaa seeraan alaa akka bakkaa bakkatti socho’uu fi koontiroobaandiin akka gurguramu haala miijessuun warra yakka kana raawwatuuf da’oo ta’u jechuun ka’umsi shakkii dhaddachaaf ibsameera.
Kanaan wal-qabatee, Muddee 30 hanga Amajjii 30 bara 2018tti boba’aan qarshii biiliyoona 2.6 ol baasu koontiroobaandiin akka gurguramu gochuun mootummaan galii akka dhabu taasisaniiru jedhameera.
Shakkamtoonni xalayaa seerkulaaraa seeraan alaa barreessuu. konkolaattonni Finfinnee irraa boba’aa fe’anii gara kutaalee biyyattii deeman akka bob’aa hingurgurre gochuun rakkoo uumaa jiraachuu eeree , yeroon qorannoon itti qulqullaa’u dabalataa guyyaan 14 akka eeyyamamuuf beellama yeroo gaafateera.
Shakkamtoonni gama isaaniitiin yakka hin hojjenne jechuun mirgi waabii akka hayyamamuuf gaafataniiru.
Dhaddachi beellamaa falmii gama lamaanii hordofuun, hojii qorannoo poolisii jiruuf guyyoota qorannoo dabalataa 12 hayyameera.
Taarik Addunyaatu gabaase.
