JMN Amharic

24/09/2026

የኦነግ የድርድር ጥያቄ IIየህውሃት ማሳሰብያII አሜሪካ እና ቻይና ጥምረት

24/09/2026

https://youtu.be/0Wro2oN1t-c?si=3BXjzYYC9n1W3h1p

ጠቅላይ ሚኒስትር ዐቢይ (ዶ/ር) ለይፋዊ የሥራ ጉብኝት ጅቡቲ ገቡህወሓት የአፍሪካ ኅብረት መግለጫ መድረ...

24/09/2026

በሰሜን ኢትዮጵያ በፍጥነት እየተባባሰ ያለው ሁኔታ እና ይህ ሁኔታ በሕዝቡ ላይ እያሳደረ ያለው ተጽዕኖ በጥልቅ እንደሚያሳስበው የአውሮፓ ኅብረት ገለፀ።

በበርካታ አካባቢዎች ወታደራዊ እንቅስቃሴ ስለመኖራቸው የሚወጡ ዘገባዎች፣ እንዲሁም በትግራይ የሚገኙትን የመቀለ፣ የአክሱም እና የሽረ አየር ማረፊያዎች የህወሓት ኃይሎች መቆጣጠራቸውም አሳስቦኛል ሲል ኅብረቱ ባወጣው መግለጫ አስታውቋል።

ባለፉት ሳምንታትም በኢትዮጵያ መከላከያ ሠራዊት የተፈጸሙ በርካታ የድሮን ጥቃቶችን በስጋት ሲከታተል እንደቆየም ጠቅሷል።

“ውጥረቱን በአስቸኳይ ማርገብ ያስፈልጋል” ያለው የአውሮፓ ኅብረት፣ ሁለቱም አካላት ግጭትን በዘላቂነት ለማቆም ለተደረሰው ስምምነት ዳግም ቁርጠኝነታቸውን እንዲያሳዩ ጠይቋል። ለዚህም “ጊዜው አልረፈደም” ብሏል።

ልዩነቶች ሊፈቱ የሚችሉት በውይይት ብቻ እንጂ በወታደራዊ እርምጃ እንዳልሆነም ገልጿል።

የሲቪሎችን ደኅንነት መጠበቅን እና የሰብዓዊ ድጋፍ ሥራዎችን ገለልተኝነትና ነፃነት ማክበርን ጨምሮ የግጭቱ ተሳታፊዎች ዓለም አቀፍ የሰብዓዊነት ሕግን እንዲያከብሩ ኅብረቱ አሳስቧል።

የአውሮፓ ኅብረት በዚሁ መግለጫው፣ በሰብዓዊ ድጋፍ መኪኖች ላይ የሚደርሱጥቃቶችን እና የሰብዓዊ ድጋፍ ተደራሽነትን የሚከለክል ማንኛውንም እርምጃ በጽኑ እንደሚያወግዝ አስታውቋል።

ኅብረቱ ውጥረትን ለማርገብ የሚደረጉ ጥረቶችን፣ በአፍሪካ ኅብረት የሚመራውን የሽምግልና ሂደት እና ትርጉም ያለው ውይይትን ለመደገፍ ያለውን ቁርጠኝነት አረጋግጧል።

24/09/2026

አንድ ከፍተኛ የኢራን ወታደራዊ አማካሪ በድጋሚ አሜሪካ ቴህራን ላይ ጥቃት የምትከፍት ከሆነ አዲሱ ጦርነት እስከ ሕንድ ውቅያኖስ ሊሰፋ እንደሚችል አስጠነቀቁ።

የኢራን የወታደራዊ ጉዳዮች ከፍተኛ መሪ ከፍተኛ አማካሪ ሜጀር ጄኔራል ያህያ ራሂም ሳፋቪ ሐሙስ ዕለት የአገሪቱ የጦር ኃይል ለተለያዩ ሁኔታዎች ዕቅዶችን አዘጋጅቷል ማለታቸውን የፋርስ ዜና ወኪል ዘግቧል።

ሳፋቪ “በአሜሪካው ፕሬዝዳንት ትራምፕ እና እስራኤል ጠቅላይ ሚኒስትር ኔታንያሁ አእምሮ ውስጥ ምን እየተከናወነ እንዳለ አናውቅም” ብለዋል።

የኢራን ጦር በአገሪቱ ተቋማት ወይም ብሔራዊ ጥቅሞች ላይ ተጨማሪ የአሜሪካ ወይም የእስራኤል ጥቃቶች ቢከሰቱ በሚል ለከፋ ሁኔታዎች መዘጋጀቱን ገልጸው፣ ግጭቱ ሊሰፋ እንደሚችልም አስጠንቅቀዋል።

“አሁን ጦርነቱ ከባህር ሰላጤው እና ከሆርሙዝ ወሽመጥ ወደ ቀይ ባህር ተስፋፍቷል። ከአሜሪካ ጋር የሚደረገው ቀጣይ ጦርነት ወደ ሕንድ ውቅያኖስ ወይም ወደ ሌላ ቦታ ሊሰፋ ይችላል” ብለዋል።

24/09/2026

የትግራይ ክልል ዋና ከተማ መቀለ ነዋሪዎች ረቡዕ ዕለት የተቀሰቀሰው ጦርነት ሊባባስ ይችላል በሚል ፍራቻ ምግብ እና ሌሎች መሠረታዊ ዕቃዎችን በብዛት መሸመት መጀመራቸውን ሮይተርስ ዘገበ።

የትግራይ ኃይሎች ረቡዕት ማለዳ በክልሉ የሚገኙ ሦስት አውሮፕላን ማረፊያዎችን ከተቆጣጠሩ በኋላ "ተከፈተብን" ያሉትን ጥቃት ለመከላከል ኃይሎቻቸው "እርምጃ እንዲወስዱ ማዘዛቸውን" ገልጸዋል።

የመንግሥታቱ ድርጅት እና የአውሮፓ ኅብረት ተፋላሚ ወገኖች ከግጭት እንዲታቀቡ እና ለሁለት ዓመታት የዘለቀውን ደም አፋሳሽ ጦርነት ወዳስቆመው የፕሪቶሪያ ስምምነት እንዲመለሱ አሳስበዋል።

በፌደራል መንግሥቱ በኩል በይፋ ስለ ግጭቱ የተባለ ነገር ባይኖርም ጠቅላይ ሚኒስትሩ የምሥራቅ አፍሪካ ጉዳዮች አማካሪ አቶ ጌታቸው የህወሓት ኃይሎች በአፋር እና በአማራ ክልሎች በሚገኙ ቦታዎች በኩል ሙሉ ጥቃት መክፈታቸውን በመግለጽ ጦርነት መቀስቀሱ "እጅግ የሚያሳዝን" ክስተት ነው ብለዋል።

አቶ ጌታቸው "የህወሓት የፖለቲካ እና የወታደራዊ አመራር ኃላፊነት የጎደለው አካሄድ ወደ አዲስ ምዕራፍ መሸጋገሩን" ሲሉም አክለዋል።

ሮይተርስ በስልክ ያነጋገራቸው የመቀለ ነዋሪዎች “አስፈላጊ ይሆናል ያልነውን ሁሉ እየገዛን ነው” ሲሉ ተናግረዋል።

ለደኅንነታቸው ሲባል ስማቸው እንዳይጠቀስ የጠየቁት የከተማዋ ነዋሪ “ሁሉንም መሠረታዊ ፍላጎቶች ለማግኘት ወይም ለመግዛት እጅግ አስቸጋሪ እየሆነ መጥቷል” ብለዋል።

“በተጨማሪም ሁኔታው ​​ከዚህ ቀደም በነበረው ጦርነት ወቅት እንደታየው ዓይነት ወደ ከበባ ሊሸጋገር ይችላል የሚል ስጋትም እያደገ ነው” ሲሉም አክለዋል።

ነዋሪው በተጨማሪም በመቀለ ጎዳናዎች ላይ የፀጥታ አካላት እንደሚንቀሳቀሱ፣ የድሮን ድምጽ እንደሚሰማ ተናግረው የምግብ ሸቀጦች ሊጠፉ ይችላሉ ብለው እንደሚሰጉም ተናግረዋል።

በአዲግራት ከተማ የሚኖሩ ሌላ ነዋሪደግሞ ሰዎች በፍርሃት የምግብ ሸቀጦችን በብዛት በመግዛታቸው ሱቆች ባዶ መሆናቸውን ገልጸዋል።

"የሱቆች መደርደሪያዎች ባዶ በመሆናቸው የምግብ እጥረት እየተባባሰ ነው፤ እንዲሁም የአስፈላጊ መድኃኒቶች እጥረት አለ፤ ዋጋቸውም ቢሆን እጅግ በጣም ውድ ነው" ሲሉ ለሮይተርስ ተናግረዋል።

ሁለቱም ነዋሪዎች ወጣቶች በግዴታ ወደ ጦርነቱ እንዲቀላቀሉ ሲደረጉ መመልከታቸውን እና ይህም በሕዝቡ ዘንድ ስጋት መፍጠሩን ተናግረዋል።

የአዲግራት ነዋሪው የህወሓትን የምልመላ ተግባር በመጥቀስ “ባለፈው ጦርነት አባቱን ያጣ አንድ የ18 ዓመት ወጣት አውቃለሁ፤ በግዴታ ወሰዱት” ብለዋል።

በ2012 ዓ.ም. ተጀምሮ ለሁለት ዓመት የተካሄደው ደም አፋሳሽ ሰሜን ኢትዮጵያ ጦርነት በክልሉ የምግብ፣ የገንዘብ እና የመድኃኒት እጥረት እንዲፈጠር አድርጎ ነበር።

ደም አፋሳሹ የትግራይ ጦርነት በፕሪቶርያ ስምምነት ከተቋጨ ከአምስት ዓመታት በኋላ ረቡዕ መስከረም 13 ዳግመኛ ተቀስቅሷል።

ከዚህ አስቀድሞ ደግሞ መስከረም 10/2019 ዓ.ም. አመሻሽ ላይ ህወሓት አባል የሆነበት ሰባት ታጣቂ ቡድኖችን "ትብብር ለኅልውና" የተሰኘ ጥምረት መመሥረታቸውን ይፋ አድርገዋል።

የጥምረቱ መመሥረት ይፋ ከመደረጉ በፊትም የህወሓት መሪዎች የፌደራል መንግሥቱን "የመጣል ዓላማ" እንዳላቸው ሲገልጹ የነበረ ሲሆን፤ ባለፉት ወራትም የፌደራል መንግሥቱ የትግራይ ኃይሎችን ዒላማ ያደረጉ ተደጋጋሚ የድሮን ጥቃቶችን ሲፈጽም ቆይቷል።

እየተባባሰ የመጣው ውጥረት ረቡዕ ወደለየለት ግጭት ተሻግሮ በአማራ እና በአፋር ክልሎች አዋሳኝ አካበቢዎች ውጊያዎች መካሄዳቸው ተዘግቧል

24/09/2026

የኢትዮጵያ መከላከያ ሠራዊት ህወሓት ማክሰኞ መስከረም 12/2019 ዓ.ም. በይዞታ ቀጣናው ላይ የከፈተውን ጥቃት ማክሸፉን አስታወቀ።

ሠራዊቱ በማኅበራዊ ሚዲያ ገጹ ላይ ባጋራው መረጃ እንዳለው ማክሰኞ ለረቡዕ አጥቢያ ከሌሊቱ 9 ሰዓት ጀምሮ የህወሓት ታጣቂዎች በሰሜን ምሥራቅ ዕዝ የግዳጅ ቀጣና ጥቃት መፈጸሙን ገልጿል።

የሰሜን ምሥራቅ ዕዝ አዛዥ ሌተናል ጀነራል አሰፋ ቸኮልን የጠቀሰው መረጃ "ህወሓት እና መሰል ተጣማሪ ቡድኖች በቀጣናው ሰብረው ለመግባት" ሙከራ ማድረጋቸውን እና መክሸፉን አመልክቷል።

ጥቃቱ በሰሜን ወሎ ዞን ተኩለሽ፣ ድልድይ፣ ቀይ አፈር፣ በረሃ ማርያም፣ ባይብዋ፣ በጭሮ እና ኩቤ ቀረንሳ በሚባሉ አካባቢዎች በኩል መሞከሩን ገልጿል።

ይህ ሠራዊቱ ያጋራው መረጃ በሰሜን ኢትዮጵያ ግጭት መቀስቀሱን ተከትሎ ከተለያዩ ወገኖች መግለጫ እና ዘገባ ሲወጣ ቆይቶ ከኢትዮጵያ መንግሥት በኩል ምንም ሳይባል ከቆየ በኋላ ነው።

24/09/2026

ሠላም ጠል የሆነው ህገ-ወጡ ህወሃት በለኮሰው እሳት መለብለቡን የዕዙ አዛዥ ገለፁ።

ከሰላም ይልቅ ጦርነትን የሚያሥቀድመው ህወሃት ከኢትዮጵያ ታሪካዊ ጠላቶች ጋር ተጣምሮ መስከረም 12 ቀን 2019 ዓ.ም ከሌሊቱ 9 ሰዓት ጀምሮ በሰሜን ምስራቅ ዕዝ የግዳጅ ቀጣና በከፈተው ማጥቃት በዕዙ ሠራዊት ጠንካራ ክንድ የተመከተ ሲሆን ታጣቂዎቹን ጨምሮ የተለያዬ ዓይነት መሳሪያና ተተኳሽ በቁጥጥር ስር ውሏል።

የሰሜን ምስራቅ ዕዝ አዛዥ ሌተናል ጀነራል አሰፋ ቸኮል ህወሃት እና መሰል ተጣማሪ ቡድኖች በቀጣናው ሰብሮ በመግባት ህዝብን የመዝረፍ እና የመበተን ዓላማቸው መክሸፉን ገልፀው የዕዙ ሠራዊት በወሰደው ፈጣን የፀረ-ማጥቃት ምላሽ በህገ ወጡ ህወሃት ቡድን ላይ ከፍተኛ ሰብዓዊና ቁሳዊ ኪሳራ ማድረስ መቻሉን አሥረድተዋል።

ህወሃት እና ታሪካዊ ጠላቶቻችን ኢትዮጵያን የማፍረስ አላማ አሸክመው ያጣመሩት ቡድኑ በሰሜን ወሎ ዞን ተኩለሽ ፣ ድልድይ ፣ቀይ አፈር ፣ በረሃ ማርያም ፣ ባይብዋ ፣በጭሮ እና ኩቤ ቀረንሳ በሚባሉ አካባቢዎች ላይ ያለ የሌለ ኃይሉን አሰልፎ ሾልኮ ለመግባት የሞከረ ሲሆን በደረሰበት ጠንካራ ምት ንብረት እና የሰው ኃይሉን እያንጠባጠበ ወደመጣበት ለመመለስ መገደዱን አዛዡ ተናግረዋል።

ሠላም ጠል የሆነው ቡድን በጀመረው እና ሠራዊታችን ባካሄደው መልሶ ማጥቃት በርካታ የቡድን እና የነፍስ ወከፍ የጦር መሳሪያዎችም ተማርከዋል።

በዚህም መሰረት 04 ዲሽቃ ፣ 22 መትረየስ ፣ 08 ስናይፐር፣ 50 ክላሽንኮፍ ጠብመንጃ ፣ 03 አርፒጂ7፣ 1ዐ አይኮም የመገናኛ ሬድዮ፣ 01 አይነት 77 የመገናኛ ሬድዮ፣ 03 የድሸቃ ወሳ እግር፣ 11 የአይኮም መገናኛ ባትሪ እና 12 አይኮም ቻርጀር ይገኙበታል። በተጨማሪም በርካታ የጠላት ኃይል ሲማረክ 272 ተገድሏል፣ 260 የጠላት ኃይል ቆስሏል።

አሁን ላይ ሠራዊቱ የጠላትን ሁኔታ እያነበበ ከያዛቸው ቁልፍ ወታደራዊ መሬቶች እየተወረወረ የተጠኑ ፀረ-ማጥቃቶችን በመፈፀም የግዳጅ ቀጣናውን ከጠላት የማፅዳት ወሳኝ ግዳጆችን በመፈፀም ላይ ይገኛል።

ዕድሜ ልኩን ከስህተቱ የማይማረው ህገ-ወጡ ህወሃት ካሰባሰባቸው ጀሌዎቹ ጋር ግንባር በመፍጠር የሞከረው የሽብር ተግባር በእንጭጩ እንዲቀጭ እና ዕዙ ድል እንዲቀዳጅ የአካባቢው ማህበረሰብ ላበረከተው ድጋፍና ሚና የሰሜን ምስራቅ ዕዝ አዛዥ ምስጋና አቅርበዋል። መረጃውን ያደረሠን የሰሜን ምስራቅ ዕዝ ነው

24/09/2026

የሌተናንት ጄነራል ታደሰ ወረደን መኖሪያ ቤት ሲጠብቁ የነበሩ የፀጥታ ባልደረቦች ትናንት ምሽት "እንደተቀየሩ" እና ቤተሰባቸውም "ወደ ውጭ መውጣት" እንዳልቻለ ቢቢሲ ከምንጮቹ ለመረዳት ችሏል።

የሌተናንት ጄነራል ታደሰ የቅርብ ቤተሰብ እንደገለጹት፤ ረቡዕ መስከረም 13/2019 ዓ. ም. ምሽት "ወደ 4 ሰዓት እስከ 5 ሰዓት ባለው ጊዜ ውስጥ" ከዚህ ቀደም የነበሩት ጥበቃዎች በሌሎች ተተክተዋል።

በፕሪቶሪያ ስምምነት መሠረት የተቋቋመውን የትግራይ ጊዜያዊ አስተዳደር ለአንድ ዓመት ሲመሩ የነበሩት ሌተናንት ጄነራል ታደሰን እንዲጠብቁ ተመድበው የነበሩት የፀጥታ አባላት ከተቀየሩ በኋላ ቤተሰባቸው "ከቤት መውጣት እንዳልቻለ" የቢቢሲ ምንጭ ተናግረዋል። ሌሎች ቤተሰቦቻቸው "ከውጭ ወደ ቤት እንዳይገቡ መከልከላቸውንም" አክለዋል።

ላለፉት ሦስት ወራት ሌተናንት ጄነራል ታደሰ "እንቅስቃሴያቸው ተገድቦ ከቤት ሳይወጡ" እንደቆዩ የገለጹት የቅርብ ቤተሰብ፤ በትግራይ ክልል አስተዳደር የተመደቡ "ወደ አምስት የሚደርሱ ጠባቂዎች እየተለዋወጡ ጥበቃ ያደርጉ እንደነበር" ተናግረዋል።

ሆኖም ግን ለሌተናንት ጄነራል ታደሰ የተመደቡት የጥበቃዎች ቁጥራቸው ተቀንሶ የቀሩት "ወደ አምስት የሚደርሱ ጠባቂዎች" ትናንት "መለወጣቸውን" አስረድተዋል።

ከዚህ ቀደም የነበሩት ጠባቂዎች በሌሎች እንደሚለወጡ "አያውቁም ነበር" ያሉት የሌተናንት ጄነራል ታደሰ የቅርብ ቤተሰብ፤ "ከዛሬ ጀምሮ ሥራ ጨርሳችኋል" ሲሉ ለቀድሞዎቹ ጠባቂዎች መንገራቸውን አስረድተዋል።

"[የተቀየሩት ጠባቂዎች] ትናንት [ረቡዕ] በአራት አቅጣጫ አካባቢውን ዞሩት። ድንገት ወደ ጊቢው መጡባቸው። እነሱም [የቀድሞ ጠባቂዎች] በማያውቁት ሁኔታ ከዛሬ ጀምሮ ሥራ ጨርሳችኋል አሏቸው።"

ከረቡዕ መስከረም 13 ጀምሮ እስከ ዛሬ ሐሙስ ድረስ በሌተናንት ጄነራል ታደሰ መኖሪያ ቤት ቅጥር ጊቢ ውስጥ እና ከውጭም ያሉት ጠባቂዎች "ከ10 በላይ እንደሚሆኑ" በአካባቢው ያሉ የቢቢሲ ምንጭ አስታውቀዋል።

24/09/2026

ኢትዮጵያ "የውጭ ጣልቃ ገብነቶች" ቢኖሩም እንኳን "በከፍተኛ ሁኔታ ተቆጥባ" እንደቆየች እና ከጎረቤት አገራት ጋር ያላትን ግንኙነት "እንዳሻሻለች" ፕሬዝዳንት ታዬ አፅቀሥላሴ ተናገሩ።

ፕሬዝዳንቱ በኒው ዮርክ በተካሄደው የተባበሩት መንግሥታት ጠቅላላ ጉባዔ ላይ ባደረጉት ንግግር ኢትዮጵያ ለቀጣናው መረጋጋት ስላላት ድርሻ መግለጻቸውን ሮይተርስ የዜና ወኪል ዘግቧል።

ፕሬዝዳንቱ ይህንን የተናገሩት በፌደራል ኃይሎች እና በትግራይ ታጣቂዎች መካከል ግጭት እንደ አዲስ በተቀሰቀሰበት ወቅት ነው።

ትናንት ረቡዕ መስከረም 13/2019 ዓ. ም. ማለዳ የትግራይ ኃይሎች መቀለ የሚገኘውን አውሮፕላን ማረፊያ መቆጣጠራቸው ከተገለጸ በኋላ በአፋር እና በአማራ ክልሎች በሚገኙ ቦታዎች ውጊያዎች መካሄዳቸው ተዘግቧል።

ፕሬዝዳንት ታዬ፤ በተመድ ጉባዔ ባደረጉት ንግግር ኢትዮጵያ ቀጣናዊ ትስስሯን በማጠናከር እና በሱዳን ሰላም እንዲሰፍን የሚደረጉ ጥረቶችን ብትደግፍም "የውጭ ኃይሎች ጣልቃ እየገቡ" እንደሆነ ጠቁመዋል።

እነዚህ የውጭ ኃይሎች ማን እንደሆኑ በስም አልጠቀሱም።

የአፍሪካ ኅብረት ኮሚሽን ሊቀ መንበር ማሕሙድ አሊ ዩሱፍ ትናንት ማምሻውን ባወጡት መግለጫ፤ የኢትዮጵያ አጎራባች አገራት ግጭቱን ከሚያባብሱ ድርጊቶች እንዲቆጠቡ አሳስበዋል።

በሰሜን ኢትዮጵያ የተቀሰቀሰው ውጥረት እና ወታደራዊ መካረር "እጅግ እንዳሳሰባቸው" ገልጸውም ጎረቤት አገራቱ "ግጭቱ እንዲቆም እና ንግግር እንዲደረግ" ሚናቸውን እንዲወጡም ጠይቀዋል።

24/09/2026

የኢራኑ ፕሬዝዳንት ማሱድ ፔዤሽኪያን በተባበሩት መንግሥታት ጠቅላላ ጉባዔ ላይ ባደረጉት ንግግር አገራቸው “እንደማትንበረከክ” ተናገሩ።

የአሜሪካው ፕሬዝዳንት ዶናልድ ትራምፕ በጉባዔው ላይ ባደረጉት ንግግር ኢራንን “ለማጥፋት” መዛታቸውን ተከትሎ የኢራኑ ፕሬዝዳንት በሰጡት ምላሽ ነው ይህንን የተናገሩት።

አሜሪካ እና እስራኤል በኢራን ላይ ጦርነት ከከፈቱ ሰባት ወራት ተቆጥረዋል።

የኢራኑ ፕሬዝዳንት አገራቸው አሁንም ለዲፕሎማሲያዊ ንግግር ዝግጁ መሆኗን ገልጸዋል።

ለትራምፕ ዛቻ በሰጡት ምላሽም “ማዕቀቦች ሲጣሉ፣ ጫናው ሲበረታ እና ግብዝነቱ ሲባባስ ኢራናውያን የበለጠ ራሳቸውን ይከላከላሉ” ብለዋል።

አሜሪካ በባሕረ ሰላጤው የሚያልፉ የኢራን መርከቦች ላይ የጣለችውን ክልከላ ስታነሳ ቴህራን ከስምምነት እንደምትደርስ ፕሬዝዳንቱ ጨምረው ገልጸዋል።

“ሁሉም አካል ከሆርሙዝ ወሽመጥ እየተጠቀመ እኛ ብቻ ክልከላ ሊጣልብን አይችልም” ብለዋል።

የኢራን ፕሬዝዳንት በተመድ ጠቅላላ ጉባዔ ላይ ንግግር ማድረግ ሲጀምሩ የአሜሪካ ልዑካን አዳራሹን ጥለው ወጥተዋል። እስካሁን ድረስ በፕሬዝዳንቱ ንግግር ላይ ከአሜሪካ በኩል አስተያየት አልተሰጠም።

በኒው ዮርኩ ጉባዔ ላይ የኢራን ፕሬዝዳንት “የአሜሪካው ፕሬዝዳንት አሸባሪ ብሎናል፤ እኛ የሽብር ሰለባ ነን” ብለዋል።